¹ Ti ta dob-dob koddi teere, Hiiridush in yaaro pi shinnyino Yeesho. ² Shii in tewi ti shookni ya, "Tenei Yuwaana an ya Yulma; ye illaa ti ta duwa. Longku kumen shurme shinui ti ku ya shuran ti shiknii." ³ Longku Hiriidush yikka Yuwaana, in kpakko shii, in shou shii ti ta mina muruk ka longkuuno Hiruudiya manna molli ta Pilibush. ⁴ Longku Yuwaana tekwn ti shii ya, "A yu kpang shii in dig teim." ⁵ Hiriidush leka tuk shii, pene shii in shi memme, longku shinui sharaa Yuwaana kaa an-pigra. ⁶ Pene bara ye darang pattano Iriidush makilla, Laino Iruudiya in ya shor ti ku-dam ar Iriidush in sha tomoni. ⁷ Iriidush in deewoku kan pammo-we ya shi ta min koo wen ti tei wee tei telaa. ⁸ Ka bi ye nonto shuulla tei, in tewi ta tei ya, "Minno kuuno Yuwaana an Yulma wono ti ta gurang." ⁹ Nang gub in ya den ka longku bengoro, pene ka longku yaan pammi kan ka longku me ti po sha temrei kan shii, shii in tewi ya mo yooro. ¹⁰ Shii in shuri in wa foru kuuno Yuwaana ti ta mina muruk. ¹¹ Nang in waru ka kuunii ti ta gurang in mini ti la-geje nang tei in warin ti nonto. ¹² Nang me an yiu shubetnii in waru, in shar kumai, in wa nani. Ka biino te, shinui in wanna in wa tewi ti Yeesho. ¹³ Nang bara ye Yeesho yaaraa we te, shii in wessho po teere in ti ta gong in waani piree a doo niyom. Bara ye jimai yaaraa piri, shinui in yiu biinii ka sho ti tarang gok-minai. ¹⁴ Nang Yeesho in waru toomjui in we shik gbong jimai. Shii in kunngo shinui in shemo tassho bau shikjui. ¹⁵ Bara ye kiryippa yuwaa, me an yiu shubeti in waru shiknii in tewi ta shinui ya, "Po tenei ta shwee, kan darang fuwaa po shuwaro. Li bi jimai, longku shinui in wangro tarang meno-mina in pi-pillin weshiina ti kuuju." ¹⁶ Pene Yeesho in tewon ti shinui ya, "A doo ye shinui po koojum. Ma minin wee shinui po shaani." ¹⁷ Shinui in tewon ti shii ya, "Wee min kan tei bara appan we-ta-kele shin fuwat kan shirim shin palau." ¹⁸ Yeesho in tewi ya, "Ma warin nen ka shinui wono." ¹⁹ Nang Yeesho in tewi ti jimai mo dijiyaju dijiyii ti ku shwee. Shii in shokro appan we-ta-kelei fuwati kan shirim palawi In deero dooni ti ku-dang, shii in liin kpang kan in beblo ta appan we-ta-kelei in mibinna ti me an yiu shubetni, me an yiu shubeti in bwatton ti jimai. ²⁰ Shinui in shuyyina in kemreju. Nang shinui in paplo dogi beblan ta weshiinai kemran ganga kpumu gee-palau. ²¹ Me shuyyaai memme shin shig dok sho naa-fuwat, kaananii shereb kan shiba. ²² Kpantidi shii in li me an yiu shubeti in reeju ta gongi in kooju ti toomni we war jeleno yen dok, koddii shii in li bi jimai. ²³ Ka bi ye shii liyaa bi jimai, shii in ammoni ku sheela ka we fo-fok. Bara ye kiryippa yuwaa, shi dokni ti po teere. ²⁴ Pene gongi tida ti nangshakki paali, shum-doo in ti minin shilibi ti shinui kan pirit in ti kudo piree kan shinui. ²⁵ Pelle yaan kwii fee an palawi, Yeesho in tumjuru waru piree kan shinui, in ti yuuru mere ti ku paali. ²⁶ Bara ye me an yiu shubet weyaa shiknii ti ku yuuru mere ti ku paali, shinui in turmoju kan in ti tewi ta shinui ya, "We tei an sha-duwa," nang shinui in ya yallo kan bangi. ²⁷ Pene Yeesho in yuurin paaro ti shinui kan talii ya, "A weenan dokom! Tenei Ne! Ma wessho ya shewoi." ²⁸ Biiturush in lignon ti shii ya, "Fo-mina, maa ke, min kumen ti ne nen waru shikko ti ku dooi." ²⁹ Yeesho in tewi ya, "Waru." Longkuono te, Biiturush in peren nin ti ta gongi in ya mere ti ku doo ka we war piree kan Yeesho. ³⁰ Pene bara ye Biiturush weyaa shik pirit, shii in ya shewo. Kaa ye shii yikka shaani gun doo, shii in yallina in tewi ya, "Fo-mina, kaurono!" ³¹ Yeesho kpantidi in shou kirani, in yiru Biiturush, nang in tewon ti shii ya, "Ke mo kan kattan lishaari, longku wen ke ti ya gbobgbobi?" ³² Nang bara ye Yeesho riyaa ta gongi, piriti in sherero. ³³ Nang me an yiu shubeti me ti ta gongi in wau Yesho kan in ti tewi ya, "Kulli kei Laano Yamma." ³⁴ Koddi ye shinui teeleju won, shinui in waru ta manni buki yaa Jenishereeta. ³⁵ Bara ye memme po teere jemlaa Yeesho, shinui in shur me an shuran ti koo tong ti ta kpakan-fok po teere, nang shinui in wangittin ti shii ka koo nong ye shikii bangum. ³⁶ Shinui in beng shii ya mo shin bara tau po gerang lannanii, nang me ding taka shiki, shinui in tasshaju.