¹ Nang peddi Parishaawai kan me an-balilo-we shinui in waru shikno Yeesho ti Urshalilima. Shinui in tewi ya, ² "Longku wen me an yiu shubetko ti kuroju yiu bi waari me an toomi? Longku shinui a ti fuddo kiraju ka we shaanim." ³ Yeesho in liginna in tewon ti shinui ya, "Nang longku wen ma sheema ma ti au shoo ma ti ta ku shorono Yamma ka longku waarimai? ⁴ Longku Yamma tenna ya, 'Min gba ti foko kan nonko.' kan 'Shi mo teka piire ti shikno foni koo nonni kulli shii ta murani.' ⁵ Pene ma mondok maa teka ti foni yei nonni ya, "We shawo ye milam ma ta weyani ti kiranoi, ne fuwaa po wakani ti Yamma," ⁶ nang shii a min gba ti me an parini ka weenim. Kaa ye shigan paarono Yamma we waani ka longku waarinma. ⁷ Ma me an wawoa ado! Kaa te ye Isheya yuwaa pigra ti kuuma ye shii teka ya, ⁸ 'Memme shurme te ti minno gbai ka dii ku-fok, pene poshaariju tali ti piree kan ne. ⁹ Shinui ti waunoi ta meere longku shinui ti shuppina kaa waariju yei pekro memme.' " ¹⁰ Nang shii in ye jimai ti jeleni in tewon ti shinui ya, "Ma yaaro man peni. ¹¹ Adoo wee ti ri ta fok niyo ye ti daklo niyom. Kan ye kaa teere, wee ti peru ti ta fok, teerei wee ti daklo niyo." ¹² Nang me an yiu shubeti in waru in tewi ti Yeesho ya, "Ke penaa Parishaawa yuwaa den koddi ye shinui paaro te ya?" ¹³ Yeesho in liginna in tewi ya, "Pere alau buk ding ye Fono ti ku-dangii tobbom ta ugron kan shoorini. ¹⁴ Ma wesshon shinui wei, shinui me an fugum me an yiu toom me an fugum. Ma niyo an fugum maa ti yiu toom niyo an fugum, shin ding ta shuwani ta jwal." ¹⁵ Biiturush in liginna ya, "Teumu wee temoi ta shuklani." ¹⁶ Yeesho in tel shinui ya, "Bambirma ti shakki kenni penani ya?" ¹⁷ Ma ti we wee ding ti ri ta fokti shaajui ta vungul ka bi in pereju ti ta oppan ta buk laa maa? ¹⁸ Pene wee ti peru ti ku fok, ti perui ti poshaari. Shinui wee ti shiwan niyoi an doon. ¹⁹ Longku ti poshaari ti perui piire nyimmo, kaa, tuk niyo, shomak, doon, jiri, jimro-shaba, kan daklo shommo peddi. ²⁰ Meen shurme tei me ti niyo in yooni mo an doon, pene sha weshiina ka kira yei fuddanim teerei wee ta li niyo in yooni mo an doonum." ²¹ Nang Yeesho in wessho po teere in wanni ta buk Taaya kan Shiidon. ²² Ti po teerei ka paamun Kanaana ti ta buk teere in waru shiknii ka yallo ya, "Fo-mina, Laano Dauda, kunngono! Ka laano La paamun ti ku taa shilibi kping ti kira shaabug." ²³ Pene Yeesho a lignon paaro ti teim. Me an yiu shubetnii in waru shiknii in beng shii ya, "Li biiroi won, longku tei ti ku ya bobak ti biimu kama." ²⁴ Pene Yeesho in lignna ya, "A shurino ti shikno koo nongum, bara ti shik shkan dinnyi mina Ishereila." ²⁵ Pene tei in waru in juunaro juunii ti toomnii, in ti tewi ya, "Fo-mina, shauno." ²⁶ Shii in lignon ti tei ya, "A nenno in shar we-ta-kele shiba in vingi ti shiba bayum." ²⁷ Tei in tewi ya, "Oo ta Fo-mina, pene koo shiba bai ti sha dogi nyittan ta wee shugyaa ti ku dangla sha weshiina fo-minaju." ²⁸ Nang Yeesho in lignon ti tei ya, "Paamun, lishaariji gba, shero mo yooro ti piree kan shi kaa ye shi lekan." Kpantidi lairo in we bang shikro ti ta koddi teerei. ²⁹ Yeesho in wessho po teere in wanni nimmi kan shakya Galiili. Nang shii in ammani ku gungum in deeni ti po teere. ³⁰ Gbong jima in waru shiknii. Shinui in wangittu ka me shwei muraaro, me an fugum, me kuulei, me baaba kan peddi gbe, in galin shinui ti toomnii, nang shii in niyan ka shinui. ³¹ Longkuuno te, jimai in ya maam ye shinui weyaa me baabai yikka ya paaro, me kuulei yuwaa bang, me shwei muraaro in yiu ya mere, kan me an fugum in yiu we ta piri. Nang shinui in yiu kum pinno Yamma Ishereila. ³² Yeesho in ye me an yiu shubetni ka nimmi in tewon ti shinui ya, "Ne ti kunngo jimai longku ye shinui diyaa kan ne po shaklo tat, nang shinui akan wee po shaanim. Nei lewo li biijui kan kpiyamum, yoo shinui wa yiu shugyani ti koko." ³³ Me an yiu shubeti in lignon ti shii ya, "Kama ta weeru appan we-ta-kele duum-duumii ti tong ti ta shwee te ka we fu-fok gbong jimai tei?" ³⁴ Yeesho in tewon ti shinui ya, "Appani ti yaa ye ma kan tei?" Shinui in liginna ya, "Appani shin parilau, kan nyamli shirim." ³⁵ Nang Yeesho in tewon ti jimai mo deeju dii ti buk. ³⁶ Shii in shokro appan we-ta-kelei kan nyamli shirimi, kan in pammina, shii in beblo ta appani, in minin ti ti me an yiu shubeti. Me an yiu shubeti in minin ti jimai. ³⁷ Memmei ding in sha ta shinui in kemreju. Nang shinui in ganglo do dogi ganga parilau kemrii kan beblan ta dogi ye diyaa. ³⁸ Shin me shuwaai shwiji shig dok sho naa-peereu, kaananii shersb kan shiba. ³⁹ Nang Yeesho in li bi jimai in shemo reeni ta gong in wanni ta kpakan-fok buk Mageedan.