¹ Parishaawa kan Shadukiyaawa in waru shikno Yeesho longku in nau shii mo shukyo temo ye ti ku-dang. ² Pene shii in liginna in tewon ti shinui ya, "Ma kiryippa maa yuwaa, ma ti tewi maa ta piri ta ya kpang dwei, longku ku-dangi gakal. ³ Maa ka shaat , ma ti tewi maa booi ta ya pirit doo, longku ku-dangi gakal kan wiila ta piri.' Ma penaa ye ma po tewani kaa ye ku-dang danngan pitto, pene mai peno ye ma po twaalon-do temo koddim. ⁴ Piire ku-kira me an shomak kan me an wau shuuro ti gassho koko po we shik we temo, pene a doo we temo ye shuklonum, bara temono Yunaana." Nang Yeesho in wessho shinui in kooni won. ⁵ Bara ye me an yiu shubeti fooraa awo nan dok, pimbirim jiyee shar we-ta-kelei sheka me an yiu shubetno Yeesho. ⁶ Yeesho in tewon ti shinui ya, "Ma jooro kpang man ti shero ma bang ka longku yiij Parishaawa kan Shadukiyaawa." ⁷ Me an yiu-shubeti in deppina ti shakkiju in ti tewi ya, "We tei longku ye kamai sharu we-ta-kele ti kiramu kamam." ⁸ Yeesho penaa nyimmojui, in liginna ya, "Ma me an kattan lishaari, longku wen ma ti ku deppani ti shakki ma maa a doo we-ta-kelemmi? ⁹ Ar wende mai pena kan nyimmo ti ku awan we-ta-kele fuwat ye niyon-ding shig sho naa-fuwat shuwaa kan dogi in kemro ganga ye man shaddina maa? ¹⁰ Kan awani shin parilau ye niyo shig sho naa-peereu shuwaa kan dogi kemran ganga ye ma shaddaa maa? ¹¹ Ka yee ye mai peno ne tai ku yuuma paaro ka longku we-ta-kelemmi? Ma shero ma kpang man ti jooro yiij Parishaawa kan Shadukiyaawa." ¹² Nang shinui in peni a ti sheeroju paaroi ka longku jooro yiiji ye ti showi ti ta nyee we-ta-kelem, penei ka longku shubetParishaawa kan Shadukiyaawa. ¹³ Wende koddi ye Yeesho wanna ta kpakan-fo buk nimmi kan Kaisheeriya ye ti Pilibi, shii in tel me an yiu shubetni ya, "Ma ti tewi maa La Niyoi nong? ¹⁴ Shinui in liginna ya, "Peddi ti tewi ya kei Yuwaana an Yulma, peddi yaa Ilya, kan peddi yaa Irimiya yooi dok ti shakki me an pigra." ¹⁵ Shii in tel shinui ya, "Pene ma sheema ma ti tewi maa nei nong?" ¹⁶ Nang Shimon Biiturush in liginna ya, "Kei Kiriti, Laano Yamma mo kan dwei." ¹⁷ Yeesho in liginna in tewon ti shii ya, "Kpangii sheeko ta Shimon laano Yunaana, longku a Shukloko wei tei niyom, penei Fono mo ti ku-dang. ¹⁸ Ne ta teuko birang na kei Biiturush, kan ti ku karinkasshi te ne ta digin memme me an yiu biino kan po-dang mina deet a ta yek bangim. ¹⁹ Ne ta minko we au po-dang po ya-gub ku-dang. Birang wee ma kpakkaa ti ku-buk, ta kpakkoro ti ku-dang, kan wee ma ta piddani ti ku-buk ta piddani ti ku-dang." ²⁰ Nang Yeesho in tol kumo me an yiu shubetni mo shinui wessho tewani ti niyo dok ya shii Kiritii. ²¹ We yĩnna tĩ ta ƙɔɗɗĩĩ, Yeesho ĩn yĩʊ twaalo do paaro ti me an yiu shubetni ya yiika ti gbare-do, shin war Urshalilima, shin taa shilibi peeni-peeni ti kira me an toom, kan mongba me ankpaa kan me an shubet ti ta shorono Muuja, ta tukni, kan ta illani kan dwei ti ku darang an tat. ²² Nang Biiturush in ye shii ti jele in pekro shii ya, "Mo we te yooro tali kan ke, Fo-mina; mo we te wessho yooro ti shikkoi." ²³ Pene Yeesho in shiwa dooni in tewi ti Biiturush ya, "Meeko ta biino ta shuuro! Kei we kulnya ti piree kan ne. Longku kei turmo ka wee weeno Yammam, penei ka longku we memme." ²⁴ Nang Yeesho in tewi ti me an yiu shubetni ya, "Maa mo leka yiru biino, shii ta kura kuuni, in shar biro loo-kukuni in yiru biino. ²⁵ Longku maa mo leka kauro kerangni ta shekon ka te, kan mo shekan ka kerangni ka longkuuno, shii ta weyani. ²⁶ Longku Kpangii shire ye mondok in we ku-buk te ding, in kaano we kerangnii? Nang wo wenee ye La Niyo ta minani ka we paaro-ku kerangnii? ²⁷ Longku La Niyo ta waru ti ta shokranno Foni kan me an shuran. Nang shii ta min we shikshuranno koo nong kaa ye yuwaan shuranni. ²⁸ Ne ta teuma yen kulli, peddi shengrii ti po lee ye shinui a ta nau murom in tang waraa we shik La Niyo ta waru ti ta gubni."