¹ Ka bi shaklo paragbanang, Yeesho in ye Biiturush kan Yuwaana mollo Yaakubu in ammon shinui ku joori sheela nang in deeju ku jwalju. ² Ti po teerei shiknii in paaro-kuuro ti toomjui. Adoonii in ti eena kaa aaro darang, kan lanna shikni in yooro yen pek sha-shak kaa aaro. ³ Kpantidi, nang Muuja kan Ilya in peru in ti yuun paaro kan shii. ⁴ Biiturush in tewi ti Yeesho ya, "Fo-mina, yuwaa kpang ka longkuumu kama ye kama ti po te. Ke maa kunnga, Ne ta limma tam tat, dokii sheeko, dokii sheeno Muuja kan dokii sheeno Ilya." ⁵ Kaa ye tida shii ti ku ya paaro, kpantidi shungu ye pe in kau kuujui, nang ele ti ta shungui ya, "Sheyyei laano, ye ne leka, nen ti sha tomoni kping. Ma yaaro shii!" ⁶ Bara ye me an yiu-shubet yaaraa kaa te, kan shewoi, shinui in shugiyya adooju ti buk. ⁷ Nang Yeesho in waru in tau shikjui ya, "Ma wessho ya shewoi, ma illo." ⁸ Nang shinui in deero dooju pene shinui a wa shik manni niyoim, bara Yeesho shi dokni. ⁹ Kaa ye shinui ti ku shaarin ti ku sheelai, Yeesho in tol kumojui ya, "Mo ma tewo ti mondok wee ma weena shikim we war koddi ye La Niyo ta illon ti shakki kuma." ¹⁰ Me an yiu-shubetnii in tel shii ya, "Longku wen me an shubet shiire teka ya ta shirui Ilyai?" ¹¹ Yeesho in lignon ya, "Kulli Ilya ta waru, shii ta limma we dind. ¹² Pene ne ta teuma, Ilya fuwaa po warini, nang shinui a jemlo shiim, pene shinui yuwaan wee leka ti shiknii. Kaa te, La Niyo ta waraa taa shilib ti ta kirajui." ¹³ Nang me an yiu shubeti in peni shii ti ku yuuju paaro ti kuuno Yuwaana an Yulma. ¹⁴ Bara ye shinui foonna piree kan jimai, manni shwijii in waru shiknii, in juunani ka po vurumi ti toomnii in tewi ya, ¹⁵ "Fo-mina, kunngo laano, longku shii ti kpissho-biro, birang shii ti taa shilibi kping. Sho gbe ye ti shugna ti ta deet dangii ta doo. ¹⁶ Ne wannan ka shii ti me an yiu shubetko, pene shinui a dum niyan ka shiim." ¹⁷ Yeesho in liginna in tewi ya, "Ai ma ku-kira te, me an kenni lishaari kan me an shek, we war dimin ye ne ta diyani kan mai? We war dimin ye ne ta kurmo mai? Warin nen ka shii wono." ¹⁸ Yeesho in pekro shaabugi, nang in perenjun ti shik lai, nang in tasshani ti ta koddi teere. ¹⁹ Nang me an yiu shubeti in waru shikno Yeesho ku-jalju in tewi ta shinui ya, "Longku wen ye minui dum foranimmi? ²⁰ Yeesho in lignon ti shinui ya, "Longku ma kan kattan lishaari. Longku Ne ta teuma yen kulli, mam maa ka lishaari kaa ar-tinnyak, ma ta dum tewani ti sheela ye maa, "Geyaji won ti po lee' nang ta giyaro. A doo wee ma ta dum yaanim. [ ²¹ Ai peenno tr a ti perim nang bara ka for-fok kan yiu fok ]" ²² Ye tida shinui dii ti Galiili ka shaayi, shii in tewon ti shinui ya, "Ta waraa min La Niyo ta kira memme, ²³ kan shinui ta tuk shii, nang ti ku shaklo an tat shii ta illani kan dwei." Nang me an yiu shubeti in turmoju kping. ²⁴ Bara ye Yeesho kan me an yiu shubetni fooraa Kaparnaawum, me an yiu kine-buk ta mina Yamma in waru shikno Biiturush in tel shii ya, "An-shubet ma a ti anngoo kine-buk ka longku minna Yamma maa?" ²⁵ Shii in liginna ya, "Oo." Koddi ye Biiturush riina ta minai, Yeesho in yuun paaro ti shii ka toom ya, "Ke nyimmaai wen Shimon?" Me an gub ku-buk te ti yiu kine shoro kan bukii ti kira pitte, ti kira shibaju ya nangii ti kira peddi shiba memmei ya?" ²⁶ "Biiturush in liginna ya, "Ti kira peddi." Nang Yeesho in tewon ti shii ya, "Nang shibai a taajum." ²⁷ Pene ka longku yoo kamai daklo ta aa me an yiu kine-bukim, Koo ke war ta shakya Galiili, ken vingin kokman fiik yiu shirim. Shirim ye ke yikka ka toomi, ken au ta foki, nang ke ta waan laa bela ye ta ker anngo kine-buk sheeno kan sheeko."