¹ Ti ta dob-dob koddi teere me an yiu shubet in waru shikno Yeesho in teli ya, "Wo nongee ye yeka gba ti ta po ya-gub ku-dangi?" ² Yeesho in ye la la-wiiu ti jeleni, in sheron ka shii ti po sheri ti shakkijui, ³ in tewon ti shinui ya, "Ne ta teuma yen kulli, mam maa paaro-ku mere ma man yooma kaa nyitti shibam, ma ta dum ri ta gubno Yammam. ⁴ Longku kaa te, maa mo muraa kuuni kaa la la-wiiu te, shii mo kan gbai ti ta po ya-gub ku-dang. ⁵ Maa mo minna wanniya ti la-wiiu la ye ti ta shommono, yikkai ne. ⁶ Pene ma mondok maa liyaa dok ti shakki nyitti shiba me me shinui kunnga kan ne in ya shasshalau, ta ya kpang in loon gbong vin issho-we ti ta bongi, in shen biinii ti ta paali yen joori. ⁷ Dogii she ku-buk ye ti li memme in ya kulnya. longku yikka ti gbare-do we kulnya shurme in waru, pene dogii sheeno mo we kulnya teere wannan ti shiknii! ⁸ Ma kirako yei shooko maa ti liiko ya shasshalau, peero ken vingi won. Ta yuuko kpang ken ri ta kerang po-ding ka gbittum kira yei sho kan ye ke kan kira palau yei sho palau in vingko ti ta deet po-ding. ⁹ Ma adooko maa ti liiko kulnya, kpikullo ken vingi won. Ta yooro kpang ti piree kan ke ken ri ta kerang po-ding ka adooko dok kan ye adooko palau in vingko ti ta deet shwal. ¹⁰ Ma jooro,mo ma beko dokti shakki nyitti shiba mem. Longku Ne ta teuma me an shuran me ti ku-dang, kpaaliya ding ti war toomno Yamma ka kwii nyitti shiba me. ¹¹ [Longku La Niyo wannai kauro me sheka]. ¹² Ma ti nyimminai wen?Ma mondok maa kan dinnyi shig-dok, nang dokti shakkijui in shekero, shii a ta wessho naa-fejereu kan fejereu ti toom gungumi in waraa gassho biino ye shekaroi maa? ¹³ Ma shii maa weena, Ne ta teuma yen kulli, shii ta ya beere ti ku dok ye weenai ti ku naa-fejereu kan fejereu mei shekommi. ¹⁴ Kaa te a lewanno Fo-mina dok ti shakki nyitti bangru-gurang in shekim." ¹⁵ "Ma molko maa yuwaako shasshalau, war shiki ken tewon kelnyoni, shakki ma maan kaji ma palau. Ma shii maa keyaa kumoni ti shikko in yaaroko, nang ke kawirra molko. ¹⁶ Pene ma shii maa yaarokom, yo niyo dok yei palau man war shiknii, longku we ding mo yooro kan me an jimro-fok palau yei tat. ¹⁷ Birang ma shii maa kuraani yaaro shinui, sheero gun paaro ti msan balla. Birang ma shii maa kuraani yaaro me an ballai, shero mo shii yooni kaa mo ta dil kan mo an yiu kine-buk. ¹⁸ Ne ta teuma yen kulli, wee ma daka ti ku-buk ta yooro dawani ti ku-dang, kan wee ma piddaa ti ku-buk fuwaa po piddani ti ku-dang. ¹⁹ Birang Ne ta teuma, ma palau ma maa kunnga ti ku wee shin bennga, ta yoon ten ti shinui ti piree kan Fono mo ti ku-dang. ²⁰ Longku piree palau yei tat galaa ti ta shommono, ti po teerei ne ti shakkijui." ²¹ Nang Biiturush in waru in Yeesho in tel shii ya, "Fo-mina, sho tiyee ye mollo ta yuuno shasshalau ye nen ti fulin bii? sho parilau?" ²² Yeesho in tewon ti shii ya, "Nei teuko na sho parilawum, pene naa-parilau sho parilau. ²³ Longkuuno te, po ya-gub ku-dang kaa dob-dob manni gubi ye leka in pen kpalan-ku birmani ti kira me shookni. ²⁴ Kaa ye shii liyaa gun yippo guni, dok ti shakki me shookni ye shii ta yiu biinii kine shig-kpumu sho shig-dok in warin shii toomnii. ²⁵ Pene kaa ye shii akan koko po anngoo shiim, nang fo-minani in min kumen ya mo pilin ka shii kan mannani kan shibani kan wee shii kan te ding, nang in anngonnin. ²⁶ Longku kaa te, nang shooki in shuwan ti toomnii, in tewi ya, "Fo-mina, kunngono, nang ka bi ne ta anngoko koo wen.' ²⁷ Nang fo-minai shook teerei, kaa ye shii kenngeni ka kunngo, in shemo foran kira ka shii kan in tukku jannii. ²⁸ Pene shook teere in peri in wa we jeenni shook, mo ye shii ta yiu bi dinaari shig-dok. Shii in mwassho shii, in yiwin shii ti gooroki, in tewi ya, "Anngono wee ne ta yiwin biiko.' ²⁹ "Pene jeenni shooki in shuwan ti toomi in ti beng shii ya, "Diijikujum, kunngono, kan ne ta anngoko bi weeko.' ³⁰ Pene yen dok shookiin kurani. kan ye kaa teerei in wanna in wa ving shii ti ta mina muruk we war koddi ye shii ta anngon wee shii ti ta yiwin biinii. ³¹ Bara ye me jeenni shooki weyaa wee yuwaaro, shinui a shu tomonim. Shinui in wanna in wa tewi ti fo-minaju wee ding yuunaro. ³² "Nang fo-mina shook teere in ye shii, in tewon ti shii ya, "Kei mo piire shook, ne wesshaako janno teere ding lonngku ye ke benngano. ³³ Ke sheeko ke ta kunngo jeenniko, kaa ye ne kunngooko maa?' ³⁴ Fo-minanii in ya den ar in min shii ti ta kira me an kpakki mo kpakko shii kan minin shilibi, we war koddi ye shii ta an anngon jan ye ding ta yiwin biinii. ³⁵ Kaa te ye Fono ti ku-dang ta yuuma ye mam maa wessho ti ma molon ma ka poshaari dokum."