¹ Ti ta dob-dob koddi ye Yeesho wiilaa po sheero we te, shii in wessho Galiili in wanni ta buk Yawuudiya ti jele shiiruk Urdun. ² Gbong jima in yiu biinii, nang shii in tassho shinui ti po teere, ³ Parishaawa in waru shiknii, in ti nau shii ya, "Nennaa niyo in tuk diyaano mannani ti ku manni wei dokro ya?" ⁴ Yeesho inginna in tew ya, "Mai maaro ye ya mo yuuna shinui ti liyan guni yuunai shwiji kan paamun maa? ⁵ Shi mo yuuna shinui birang in tewi ya, "Ka longkuuno te, shwiji ta wessho foni kan nonni in mayani kan mannani, kan shin palawi ta yooju lo-shik dok.' ⁶ Longku kaa te, shinui birang a palawum, pene dok. Longkuuno te wee Yamma mayaa ka shaayi, shero mo niyo wessho jaaro tai." ⁷ Shinui in tewon ti shii ya, "Longku wen ye Muuja pekraamu ya mo minu min takarda tuk diyaa kan minun kai biiroi woni?" ⁸ Shii in tewon ti shinui ya, "Longku bang poshaari ma, Muuja kunnga ma mo ma tuk diyaa shereb ma, pene ti liyan guni akaa teerem. ⁹ Ne ta teuma, maa mo tuka diyaa mannani, a ti ku doon shomakum, kan in digani manni, yuwaa shomak; kan niyo ye diga paamun ye tuka diyaai yuwaa shomak." ¹⁰ Me an yiu shubuti in tewiti Yeesho ya, "Maa kaa te ti ku paaro ye kan shwiji kan paamun, a yu kpang in ya diyaam." 11 Pene Yeesho in tewon ti shinui ya, "A niyo ding ye ta kumani kan shubet tem, pene bara ti me kunnga ta kumani. ¹² Longku shinui me fwara kaa ye pattinan shinui kaa te ti ta aano nonju, ka me memme shigan shinui fwara, peddi kurooju ya diyaa ka longku ri gubno Yamma. Maa mo ta dum kumani kan shubut te, shero mo shii yiu te. ¹³ Nang shinui in wangittu ti shii ka peddi nyitiri shiba longku in liin kira ti kuujui in forin-fok, pene mean yiu shubet in pekro me wannan ka shinui. ¹⁴ Pene Yeesho in tewi ya, "Ma wessho nyitti shiba, kan mo ma beelo shinui waru shiknom, longku po ya-gub ku-dangii ti peenju." ¹⁵ Shii in liin kirani ti ku nyitti shibai, nang shii in kooni ti po teere. ¹⁶ Wende manni niyoi in waru shikno Yeesho in tewi ya, "An-shubet, wo ween kpang wen ye ne ta yaani kulang nen waan kerang po dingi?" ¹⁷ Yeesho in tewon ti shii ya, "Longku wen ke ta tello ka longku ween kpangii? Ween kpangi bara dok waani, pene ke maa leka ri ta kerang po ding, jooro shoro shurme." ¹⁸ Niyoi in tewon ti shii ya, "Wo shoro shire?" Yeesho in tewonti shii ya, "Moko tuk niyom, moko yyu shomakum, moko yu jirim, moko yu jimro-shabam, ¹⁹ min gba ti foko kan nonko, kan ken leu an-ganglangko kaa kuuko." ²⁰ La-kparin shurme in tewon ti shii ya, "Ne jooraa ween shurme te ding. Ne leka birangii wen?" ²¹ Yeesho in lignon ti shii ya, "Ke maa leka ken yooko dob, koo, piplon ka wee ke kan te, ken mini ti me an kenni, nang ke ta yooko kan birma ti ku-dang, kan ken waru ken yiru biino." ²² Pene bara ye la-kparini yaaraa wee Yeesho teka, shii in kooni ka gbanan-ta-gongo, longku shii mo kan birma gbe. ²³ Yeesho in tewi ti me an yiu shubetni ya, "Kulli ne ta teuma, ta yooro shilib ti piree kan niyo an birma in ri ta po ya-gub ku-dang. ²⁴ Birang ne ta teuma, ta yooro maj-maj ti piree kan penwe in ri ti jwal yiri kan niyo an birma in ri ta po ya-gubno Yamma." ²⁵ Bara ye me an yiu shubet yaaraa kaa we te, shinui in ya maam kping kan in ya telyo ta ya, "Wo nong ta dum we markui?" ²⁶ Yeesho in gee shinui in tewon ya, "Ti piree kan memme a ta dum yoorom, pene ti piree kan Yamma koo wen ta dum yooro." ²⁷ Nang Biiturush in liginna in tewon ti shii ya, "Gee, min wesshina koo wen minun yiru biiko. Wo wen nang ye min ta weyanii?" ²⁸ Yeesho in tewon ti shinui ya, "Ne ta teuma yen kulli, ti ta koddi ye ta paaro-ku we ding, koddi ye La Niyo ta deeni ti ku shokran juk po ya gubni, in ti shiiro po-peen Ishereila kpumu gee-palau. ²⁹ Koo nong ye wesshina mina, kan ma molon men shwiji, kan men shereb, kan fowi, kan noni, kan shiba, yei doong ka longku shommono, shii ta we we-shik shuranni ye yeka sho shig-dok kan shii ta we kerang po ding. ³⁰ Pene me gbe ka toom ta yooju me an gbattokro, kan me an gbattokro ta yooju me an toom.