¹ Longku po ya-gub ku-dang kaa mo an-ku doong ye peraa kan vubnai ka we waraa pal me an shuran ka we ya shun ti ta doongni. ² Ka bi shii in kumi ta anngo shinui dinaari dok ti ta darang, shii in shur gunjui ti ta doongni. ³ Shii in peri birang pelle ks dad-darang in wa we peddii shengrii ti ku-dam po piplo-we dijiyii waani. ⁴ Shii in tewon ti shinui ya, "Ma sheema, ma koo ma wa yu shuran ti ta doongno, ne ta waraa anngoma wee nennaa ma.' Longku kaa te shinui in koo waraa shurani. ⁵ Nang shii in peri birang ka pelle shere darang kan pelle ka kettan darang in ya kaa teerei. ⁶ Birang in peri ta shii pelle ka bukan po darang, shii in wa we peddi shengrii waani. Shii in tel shinui ya, 'Longku wen ma shengrii ti po ka darang waanii?' ⁷ "Shinui in lignon ti shii ya, "A doo niyo sharaa mum.' Shii in tewon ti shinui ya, 'Ma sheema ma koo man wa ya shuran ti ta doongno.' ⁸ "Bara ye kiryippa yuwaaro, an ku doong inaabii in tewi ti la an fokni ya, 'Yo me an shurani ken wa anngo shinui we shik shuranju, li guni ka mo wanna ka bi we war ku me wanna ka toom. ⁹ "Bara ye me an shuran me wanna ka bukan po darang koo nong in yiu dinaari dok. ¹⁰ Nang shin me fooraa ka toomi in waru, shinui in li shaari shin ta yiwanii dinaari gbe. Pene koo nong ti shakkijui in yiwii dinaari dok. ¹¹ Bara ye shinui fuwaa po yippani, in yiu kpanglo den ta shinui kan mo an ku doongi. ¹² Shinui in ti tewi ya, 'Shwiji me wanna ka bi, yuwaa shuranii po koddi dok waani, nang ken anngomu po shaayi kan shinui min me sharaa tira shurani kan den darangi.' ¹³ "Pene mo an ku doongi in liginna ti mo dok shakkijui ya, 'Jeereno, nei yuuma wee daklanim. Mai kum ka toom maa ma ta ya shurani ti ku dinaari dok maa? ¹⁴ Yiu we shik shuranko ken kooko. Lewanno nen min ti shwiji me ne yeena ka bi po shaayi kan ke. ¹⁵ Ne ta dum ya wee ne leka ka kineno maa? Nangke ta ya mwisshi ka longku ye ne kan kpang poshaari ya?' ¹⁶ "Kaa te me an gbattokro ta yooju me an toom, me an toomi in yooju me an gbattokro." ¹⁷ Kaa ye Yeesho ti ku ammo Urshaliima, shii in ye me shin kpumu gee-palawi ti jele, kan ti ku kokoi shii in tewon ti shinui ya, ¹⁸ "Ma gee, kama ta ammo Urshaliima, kan ta waraa min La Niyo ti mongba ankpaa kan me an shubet shiire. Shinui ta karin kelmo muro ¹⁹ kan ta min shii ti mei Yawudaawam ka we nwinnyo foknii kan bir shiknii in sheewo shii. Ti ku shaklo an tati, shii ta illani kan dwei ²⁰ Nang non shibano Jebedi in war shikno Yeesho ka shibaro,in juunoro juunii ti toomnii, in beng manni wei ti piree kan shii. ²¹ Yeesho in tel tei ya, "Shi lekai wen?" Tei in tewi ya, "Li shibano palau me, dok ti ku kirako temme kan dok ti ku kirako jiyau, ti ta gubko." ²² Pene Yeesho in liginna in tewi ya,"Mai peno wee ma po benganim, ma ta dum she doo ta kuuro ye ta waraa sheyani ya?" Shinui in lignon ti shii ya, "Min ta dumani." ²³ Shii in tewon ti shinui ya, "Kulli ma ta dum sheyani ti ta kuurono, pene diyani ti kira temme yei ku kira jiyauno a ta minanii nem. Fono moti ku-dang limmaa po sheri teerei ka longku me shakkaa." ²⁴ Bara ye dogi kpumu ti shakki me an yiu shubeti yaaraa kaa te, shinui in yiu ya den ka ma molon palau me. ²⁵ Pene Yeesho in ye shinui ti jeleni kan tewon ya, "Ma penaa me an gub mei Yawudaawam tappaa kuujui, kan men gbidinaju ti shuklo bangjui ti kuujui. ²⁶ Pene akaa ti piree kan kamam. Kan ye kaa teere, mo leka shiwani mongba ti shakki ma yikka shii ti gbare-do in yooni shook ma, ²⁷ kan mo leka yooni an-toom, yikka shii ti gbare-do in yooni shook ma. ²⁸ Kaa ye La Niyo wannai ka longku in wau shiim, nang bara longku in ya wawo, kan in min kerangni ka longku marku memme gbe." ²⁹ Kaa ye shinui pereeju ti Jeeriko, gbong jima in yiu biinii. ³⁰ Ka me an-fugum shin palau dii ti jele koko. Bara ye shinui yaaraa ya Yeesho ti ku kowani, shinui in showin ka yallo ya, "Fo-mina, Laano Dauda, kunngomu." ³¹ Jimai in pekro shinui, in ti tebron ti shinui mo yu yititi, pene shinui in tokko-shaari yallani bang ya, "Fo-mina, Laano Dauda, kunngomu." ³² Nang Yeesho in shereni in ye shinui in tewi ya, "Ma leka nen yuuma wen?" ³³ Shinui in tewon ti shii, "Fo-mina, min ya adoomu daa akaro. ³⁴ "Nang Yeesho, kemii ka kunngo, in tau shik adoojui. Kpantidi, shinui in yiu we ta piri, nang shinui in yiwaju biinii.