¹ Kaa ye ma Yeeshi kan me an yiu-shubetni nennga Urshaliima kan shinui foonna Betapaaji, we war shik Sheela Jaitun, nang Yeesho in shur palau ti shakki me an yiu-shubet ² in tewon ti shinui ya, "Ma war meno-minai ye ti toom, nang kpantidi ma ta we girbi tooi ti po teere kan laaro. Ma piddiru shinui man warin nen. ³ Ma mondok maa yuwaa paaro ka longkuuno teere, ma ta tewon maa, 'Fo-mina leka shinui,' kan niyo teere kpantidi ta liiru ma bii ma kan shinui." ⁴ Wende tenei yuwaaro kaa tei longku in kemro wee sheeraa ta mo an-pigra. ⁵ "Ma tewo ti memme Urshaliima, 'Gee gubji ta waru shikji, shii mo an mur-ku ta waru ti ku girbi.' Ti ku la-girbi yen shwiji.' " ⁶ Nang me an yiu-shubet in wanna in wa ya kaa ye Yeesho tekan ti shinui. ⁷ Shinui in warin ka girbii kan laaro kan in lippan lannaju ti ta bi,nang Yeesho in deennin ti kwi. ⁸ Jima memme gbe in wejiyon lannaju ti do kokoi kan peddi in keyyiru kira biro dabiino in wejiyon ti ku kokoi. ⁹ Nang Jimai me kooka ti toomno Yeesho kan me yinna biinii ti ku yallo ya, "Shokranii weeno laano Dauda!" Kpangii weeno mo ta waru ti ta shommono Fo-mina! Shokranii weeno Yamma ti ku-dang bak!" ¹⁰ Koddi ye Yeesho fooraa Urshaliima, me ti tarang minai ding gbob-gbob in yiu shinui nang in ya telyo ya,"Tenei nong?" ¹¹ Jimai in liginna ya, "Tenei Yeesho, an-pigra ye penna ti Naajeret ye ti Galiili." ¹² Nang Yeesho in ri ta kudam mina Yamma. Shii in kajiyo bime an pilani kan pilin ti po teere ding. Shii in bubro dangla me an paaro-ku kine kan gburam me an piplani ka bakri. ¹³ Shii in tewon ti shinui ya, "Ballii ya, " 'Minanoi mina po for-fok,' pene man shiwan vuluk po latto shik me an-jiiri." ¹⁴ Nang me an-fugum kan me kuulei in waru shiknii ti ta mina Yammai, nang shii in niyan ka shikjui. ¹⁵ Pene bara ye mongba me ankpaa kan me an shubet ti ta shiire weyaa shik we maam ye shii yuwaa kan shiba ye ti ku yallobeere ti ta kudam mina Yamma, in ti tewi ya," shokranii Laano Dauda," shinui in kpalaju den. ¹⁶ Shinui in tewon ti shii ya, "Ke yaaraa wee ma niyo me ti ku tewani ya?" Yeesho in lignon ti shinui ya, "Oo, mai nau maarani ma, ye ya ti dak nyitti shiba kan me dum, ke liyaa shokro shommoko in peru maa?' " ¹⁷ Nang Yeesho in wessho shinui in peren nin ti tarang gok-minai in wanni Betaani, piree wiilaan yippai. ¹⁸ Kan vubnai, kaa ye shii ti koko meerini tarang gok-minai, kpiyam ti ya shii. ¹⁹ Shii in we shik biro dukni ti jele koko, shii in ammo shiki, pene a waan shiili ti taim, bara alawi. Nang shii in tewon ti biroi ya, "Mo shiili wessho yiu sheelani ti taaji birangi!" Kpantidi biroi in isshoro.. ²⁰ Bara ye me an yiu-shubet weyaa kaa te, shinui in ya maami in ti ya telyo ta shinui ya, "Ka yee biroi duknii ta isshoro peebi?" ²¹ Yeesho in liginna in tewon ti shinui ya, "Kulli Ne ta teuma, mam maa kan lishaari kan ma ti bel poshaari mam, ma ta dum yaanii bara wee yuwaa ti shik biro dokni tem, pene ma ta dum tewani ti sheela ye maa, 'Ugron shin kan guni shi shuwaju won ti ta paali doo.' kan ta dum yooro. ²² Wee ding ma bennga ti ta for-fok, kan liyaan-shaari, ma ta yiwani." ²³ Bara ye Yeesho riina ta mina Yamma, mongba ankpaa kan men gbidina memme shinui in waru shiknii ti ku yuun shubet ksn in tewi ya, "Wo ka kumenno nong ye ke ti yuun we tei kan minaako kumen tei nong?" ²⁴ Yeesho in lignon ti shinui ya, "Ne sheeno ne ta yuuma telyo dok. Mam maa lignaano, ne ta teuma ka kumenno nong ye ne ti yuun we te. ²⁵ Yulmano Yuwaana, wannai tong ta tei? Shaanai ti ku-dang ya koo ti piree ka memme?" Shinui in deppina ti shakkiju in ti tewi ya, 'Ma kama maa teka, 'Ti ku-dang,' shii ta teumu kama ya, 'Longku wen nang mai kum kan shiim mi?' ²⁶ Pene kama maa teka, 'Ti piree kan memme,' kama shi jimai, longku shin ding ti gee Yuwaanai kaa an-pigra." ²⁷ Nang shinui in liginna ti Yeesho ya, "Minui penom." Shi sheeni in tewon ti shinui ya, "Ne sheeno ne ta teuma ka kumenno nong ye ne ti yuun we tem. ²⁸ Pene ma ti nyimminai wen? Manni niyoi kan shibani palau. Shii in war shikno modok in tewon ya, "Laano, koo ke wa yuuru shuran booi ti ta doong.' ²⁹ "Lai in lignon ya, 'Ne ta waranim,' pene ka bi in paaro-ku nyimmoni in wanna. ³⁰ Nang niyoi in war shik yen dok lai in tewon peen paaro ye boi. Shii in liginna ya, 'Ne ta warani ta an-shubet,' pene shii a warum. ³¹ Ti shakki shiba me shin palau me, wo nong ye yuwaa wee foni lekai? Shinui in lignna ya, "Mo ka toomi." Yeesho in tewon ti shinui ya, "Kulli Ne ta teuma, mo an yiu kine-buk kan me an piplani-ka-shik shinui ta ri ta gubno Yamma man ta waraa riyaani. ³² Longku Yuwaana wanna shik ma kaa te ti ta diya dob, pene mai kumu kan shim. Pene me an yiu kine-buk kan me an piplo we ka-shik in kumi kan shii. Pene ma, kan ye ma weyaa shik we tei, mai for fokma ka bi man kumi kan shiim. ³³ "Ma yaaro manni temoi. Ka manni mo an doong ye tobbaa inaabini. In kpakro foki, in oppon po kpai doo inaabii kan in digin tam po geren ti tai. Nang shii in min gee doong inaabii ti me an shirau, in wannii shalo ti manni buki. ³⁴ Bara ye koddi kassho weshiina doong nemna, shii in shur shookni ti shik me doongi ti ta kirai mo yinni sheeni weshiina doongi. ³⁵ Pene me an gee doongi in yiu shooki, shinui in yuun tuwa ti mo dok, in tuk mo dok, in kpailo an tat ka shiila. ³⁶ Birang mo an ku doongi in shur manni me shooki ti shikjui, me yeka me ka toomi gbe, nang me an gee doongi in yuun we ti shikjui kaa me ka toomi. ³⁷ Ka bi ding, shii in shurin laani ti shikjui, shii in tewi ya, 'Shinui ta min ta gba ti laani.' ³⁸ "Pene bara ye me an gee ku doongi weena shik lai, nang shinui in tewi ti kuuju ya, 'Geeru la-po-ganglang wono. Ta waru, shero kama tuk shii kaman tappo ku doongi.' ³⁹ Nang shinui in shar shii in vingi won ta bi kpakran-fok doong inaabii shinui in tuk shii. ⁴⁰ Wende kaa te, koddi ye an ku doong inaabii maa wanna, shii ta ya wen ti shik me an gee doong inaabi tei?" ⁴¹ Shinui in lignon ti shii ya, "Kulli shii ta tukyo me an shek shurme, nang in min gee doongi ti me an gee doongi dokro, me shinui ta minni po aa sheeni koddi kassho weshiina doongi." ⁴² Yeesho in tewon ti shinui ya, "Mai maaro ti ta yaan balla paaro Yamma ya, 'Shiila ye me an diye kuraa shigaro shiila shuglo minai. Tenei yaan weeno Fo-mina, kan in yooro we maam ti adoomu kama. ⁴³ Longkuuno te, Ne ta teuma, Po ya-gubno Yamma ta sharani ti piree kan ma kan in mini ti buk ye ti sheelo shiiliro. ⁴⁴ Maa mo shuga ti ku shiila sheere ta nyittoni nyit-nyit. Pene maa mo shiila sheere shugan ti kuunii, ta issho shii buk-buk." ⁴⁵ Bara ye mongba me ankpaa kan Paeishaawa yaaraa temoni te, shinui in peni shii ti ku ya paaroi ti kuuju. ⁴⁶ Shinui in yiu gassho koko po yiu shii, pene shinui in ti shi jimai, longku memme kunnga ya shii an-pigra.