¹ Yeesho in yuun paaro ti shinui birang ka temo in ti tewi ya, ² "Po ya-gub ku-dang kaa manni gubi ye yeyaa temre diyaa ka longku laani. ³ Shii in shur me an shuranni mo yeeru me munnyaa ka we war po sha temre diyaai, pene shinui in kuroju warani. ⁴ Birang gubi in shur manni shiba me an shurani ya, 'Tewon ti shinui me munnyaai ka, "Gee, Ne wiilaa po ya weshiina kiryippano. Ne karaa tangkano kan bulumi me ne kannga me shidar kan we ding wiila po yooro. Ma waru po temre diyaai.' " ⁵ Pene shinui a kaan kumoju ti shik paaroniim, in kobyoju, mondok in wannii gee doongi, mondokin wanni po pilani kan pilin. ⁶ Peddi in yippo me shooknii, in yuyyon tuwa duulan-shik, kan in tukyo shinui. ⁷ Ta aa gubi in gbanoro. Shii in me an bee deetni in wa toddo me an tukyo niyo shurme in kur gok-minajui ka deet. ⁸ Nang shii in tewi ti me shookni ya, 'Koddi diyaa yuwaaro, pene me munnyinai a nenno in warum. ⁹ Longkuuno te, ma wangro ku po kpomit koko man munnyuru memme gbe ye ma ta dumani ka we waraa sha temre diyaai.' ¹⁰ Me shooki shinui in war ku gbong koko in gangillu do memme me ding shinui weena, men kpang kan mei kpangum. Longku mina po ya diyaai in kemrero ka bino. ¹¹ Pene gubi in riirui gee binoi, shii in we shik manni shwijii mo adoo lanna diyaa ti shikim. ¹² Gub in tewon ti shii ya, 'Jeereno, duma ke riina po te adoo lanna diyaa ti shikkom mii ka yaa?' Pene niyoi in tooro kuuni. ¹³ Nang gubi in tewi ti meshookni ya, 'Ma kpakko niyo ye kira kan sho, man ving shii ti ta dil peewe, teerei piree ta ukko muru.' kan ar-wuro ¹⁴ Longku memme gbe me yeyaa, pene me shakkaai la-wiiu." ¹⁵ Nang Parishaawa shinui in wanna in gassho kokopo yiu Yeesho ti ta paaroni. ¹⁶ Nang shinui in shurin me an yiu shubetju gale kan Sheeno Hiriiduya. Shinui in tewi ti Yeesho ya, "An-shubet, min penaa kei mo an shubet yen kulli, kan ken ti shuppina ka do kokono. ¹⁷ Kei turmo ka longku nyimmono mondokum, kan birang ke ti shuk kaalim ti shakki memmem. Longku kaa te, teumu, ke nyimmaai wen? Nennaa ken anngo kine-buk ti Keishar ya koo onngoo." ¹⁸ Pene Yeesho in pen piire nyimmoju nang in tewi ya, "Longku wen ma ti ku nauno, ma me an wawo adoi? ¹⁹ Ma shukillino shik kine ye ti anngon kine-buki. Nang shinui in warin ka dinaari ti shii. ²⁰ Yeesho in tewon ti shinui ya,"Wo jirim kan shommono nong ta ma meyyei?" ²¹ Shinui in lignon ti shii ya, " Weeno Keishar." Nang Yeesho in tewon ti shinui ya, "Nang ma min ti Keishar wee weeno Keishar, kan man min ti Yamma wee weeno Yamma, " ²² Bara ye shinui yaaraa kaa te, shinui in ya maam. Nang shinui in wessho shii in kooju won. ²³ Ti ta darang teere peddi Shaduukiyaawa, me teka yaa adoo ilit ta duwam, in waru shiknii. Shinui in ya telyo in ti ²⁴ tewi ya, "An-shubet, Muuja tenna ya, 'Ma mondok maa murooni, a patiro shibam, molli ta dig mannanii in patiron shiba ti mollii.' ²⁵ Ka ma molon shin parilau. Mo ka toomi in ya diiyaa in muroni. A wessho shibam, shii in wessho mannani ti molli. ²⁶ Nang an-palau molii in ya kaa te, nang an-tati, ar we war an-parilawi. ²⁷ Ka biijui ding, paamuni in muroro. ²⁸ Wende ti ta darang ilit ta duwa, wo manna nong ta tei ti shakki ma molon parilau tei? Longku shinui shin ding digyaa tei." ²⁹ Pene Yeesho in liginna kan in tewon ti shinui ya, "Ma sheka longku mai peno paaroi yei kumenno Yammam. ³⁰ Longku ti ta darang ilit ta duwa, shinui a ta ya diyaam koo shinui in min diyaam. Kan ye kaa teere, shinui ta yooju ka me an-shuranno Yamma ti ku-dang. ³¹ Pene ti ku paaro ye kan ilit ta duwa, duma mai maaro wee tenna ma ta Yamma ya, ³² 'Nei Yammano Ibiraayim, Yammano Ishaaku, kan Yammano Yakuubu maa'? Yammai Yamma me kumayim, penei we me kan dwei." ³³ Bara ye jimai yaaraa te, shinui in ya maam kan shubet te. ³⁴ Pene bara ye Paeishaawa yaaraa ya Yeesho kannaa Shadukiyaawa, shinui in gal dooju ka shaayi. ³⁵ Dok ti shakkijui, mo penaa-we ti ta shoro, in yuun telyo in ti nau shii ya, ³⁶ "An-shubet, yen gba pekro ding ti ta shoroi shire?" ³⁷ Yeesho in lignon ti shii ya, "Lewo Fo-mina Yammako ka po shaariko ding, kan kerangko ding, kan nyimmoko ding.' ³⁸ Tenei ye dok kan yen gba pekroi. ³⁹ An palawi kaa tei, 'Lewo an-ganglangko kaa kuuko.' ⁴⁰ Shiire ding kan yuyyaan balila me an-pigra looi ti ku me shin palau me. ⁴¹ Wende kaa ye Parishaawai tida galii ka shaayi, Yeesho in tel shinui ka teliyo. ⁴² Shii in ti tewi ya, "Ma ti nyimminai wen ti kuuno Kiritii? Wo laano nong ta shii?" Shinui in lignon ti shii ya, "Shii laano Dauda." ⁴³ Yeesho in tewon ti shinui ya, "Ka yee nang ye Dauda ti ta Shoom yeyaa shii yaa, Fo-mina, in ti tewi ya, ⁴⁴ 'Fo-mina teka ti Fo-minano ya, "Deeko ti ku kirano temmeno, we war koddi ye ne ta shiwan me an geiko po tabyo shookoi' "? ⁴⁵ Ma Dauda nang maa ti ye Kiriti ka 'Fo-mina' ka yee shii shigani laano Daudai?" ⁴⁶ Adoo mo dumna lignon paaro ti shiim, kan adoo niyo telaa shii ka telyo birangum we yikka darang teere we war toom.