¹ Bara ye Yeesho shaanan ti ku gungumi, gbong jima memme in yiu biinii. ² Kpantidi, an-baluk in waru in juunani ti toomnii in tewi ya, "Fo-mina, ke maa kunnga, ke ta dum tasshono nen yoono shaana." ³ Yeesho in shou kirani in tawin shiknii ya, "Ne kunnga. Tasshoko." Kpantidi shii in tasshani ti piree kan balukni. ⁴ Yesho in tewon ti shii ya, "Nyimmo moko yu paaro ti niyom. Kooko, shuk shikko ti me ankpaa, kan ken min kunngu ye Muuja pekraan, longku jimro ti piree kan shinui." ⁵ Bara ye shii ta riiru ta buk Kapanaawum, manni mon gba an beet in waru shiknii, in ti beng shii ⁶ kan in ti tewi ya, "Fo-mina, shookno kannii ti mina shiki muraaro kan shii ti ta shilibi kping." ⁷ Nang Yeesho in tewon ti shii ya, "Ne ta warani nen tassho shii." ⁸ Mon gba an bee deeti in liginna ya, "Fo-mina, nei nenno ken waru ken wa ri ta minanom. Bara yu paaro waani nang shookno ta tasshani. ⁹ Longku nei niyo ye liyaa ti ta gun kumen, ne kan me an bee deet ti ta gunno. Ne ti tewi ti mo dok na, 'Koo, kan shii in koona, kan ti manni mondok na, 'Waru,' kan shii in waru, kan ti shookno na yu lee,' kan shii in ya." ¹⁰ Bara ye Yeesho yaaraa te, shii in ya maam kan in tewi ti me ti yiu biini ya," Kulli ne ta teuma, Nei wa mondok mo kan li-shaari kaa we te ti Ishereilam. ¹¹ Ne tekama, memme gbe ta waru ti booli kan ta vuro, kan shinui ta diyani ti ku dangla ka shaayi kan Ibiraayim kan Ishaako kan Yaakubu, ti ta po ya gub ku-dang. ¹² Pene shiba po ya gubi ta vingyo shinui ti ta dil peewe, ti piree ta yuun kwii kan ar-ku wuro." ¹³ Yeesho in tewon ti gbong an bee deeti ya, "Koo! Kaa ye ke kunngan, kaa te mo yooro ti piree kan ke." Nang shooki in tasshani ti ta dob-dob koddi teerei. ¹⁴ Bara ye Yeesho wanna ti ta minano Biiturush, shii in we shikno gbarumno Biiturush kuttii a bangum kan agin. ¹⁵ Yeesho in tau shik kiraroi, nang bweewi in peron ten ti shikroi. Nang tei in illina in yuun shuran ti shinui. ¹⁶ Bara ye kiryippa yuwaaro, memme in wangittu ti Yeesho ka me piire shoom paalaa kuujui. Nang shii in kajiyo piire shoomi ka paaro kan in tassho shik me shikii bangum ding. ¹⁷ Ti taano te in kemro wee tenna ta fok an-pigra Isheya ya, "Shi po kuuni sharaa aginmu kama kan piramu kama." ¹⁸ Nang bara ye Yeesho weyaa shik jimai ti jeleni, nang shii in tewi ya mo shin maalaju jele nan dok Shiiruk Galiilii. ¹⁹ Nang manni mo an ya ballai in waru shiknii in tewi ya, "An-shubet, Ne ta yiu biiko ti piree ke ta warani ding." ²⁰ Yeesho in lignon ti shii ya, "Waak kan jwalju kan adeewe ku-dang kan luwaju, pene La Niyo a kan piree ta kannon kuunim." ²¹ Yen dok an yiu shubetnii in tewon ti shii ya, "Fo-mina, shero tida ne wa nannu fono." ²² Pene Yeesho in tewon ti shii ya, "Yiru biino ken wessho me kumai mo nan kumaju." ²³ Nang bara ye Yeesho riyaani ta gongi, me an yiu shubetni in yiu biinii ti tai. ²⁴ Kpantidi, gee pirit doo yen bangin illirin ti ku shakyai, kaa shum doo in ti ri ta gongi. Pene Yeesho ti ku shaklo. ²⁵ Me an yiu shubet in wanna in pigro shii ya, "Fo-mina, kauromu! Min nennga muttani!" ²⁶ Yeesho in tewon ti shinui ya, Longku wen ma ti ya shewoi, ma me kan kattan li-shaari?" Nang shii in illina in pekro piriti kan shum paalii. Nang in ya lubaj foki dok. ²⁷ Shwiji shurme in ya maam kan telyo ya, "Duma tenei peen niyo wen, ye modaa pirit kan shum dooi in ti minin gba ti shii?" ²⁸ Bara ye Yeesho wanna jelono yen dok,birang kan jele gok-min Garashinaawa, shwiji shin palau me shanngau sharaa kuujui penna ti ku duwa in kpomi kan shii. Shinui we shewo kping, tenei ye adoo niyo ti kum yiu po teerem. ²⁹ Kpantidi shinui in yiu shoppo yallo ya, "Ke lekai wen ti piree kan minui, laano Yamma?" Ken wanna po lee tida koddii yum, longku minmu shilibi ya? ³⁰ Wende ka anpali annyanjyaari mina a tali kan po teerem ti ku sha fok. ³¹ shaabugi in beng Yeesho ya, "Ke maa kayaamu, shur gunmu ti shik annyanjyaari mina me." ³² Yeesho in tewon ti shinui ya, "Ma koo!" Shanngawi in pereju nang in wa riyyaju shik annyanjyaari minai, anpalii ding in gbolin ka shinui ti gbaari in shaaju ta shakya, doo in tukyo shinui. ³³ Me an tii annyanjyaari minai in juwaju yoba nang shinui in reeju tarang gok-mina in sheeron gun wei ding, toom-toom wee yuunaro ti shik shwiji me palau me me shanngau paalaa kuujui. ³⁴ Kpantidi, me ti tarang gok-minai in perui kpom fokno Yeesho. Bara ye shinui weyaa shiknii, shinui in beng shii mo wessho kpakan fok bukju.