¹ "Mo ma shiirom, kan a ta shiiro mam. ² Longku ka peen shiire ye ma ti shiiron, ta shiiron man, birang we ker-we ye ma keraan, ta keron man ti tai. ³ Longku wen ye ke ti geeko la po-shwee lawiiu ye ti adoono molko, pene ke ti gee gbong biro ye ti ado sheekom mi? ⁴ Ka yee ke ta tewani ti molko ka, 'Shero mo ne forko la po shwe ye ti adooko, ' pene gbong biro ti ado sheekoi? ⁵ Ma me an wawo ado! Ka toom for gbong biro ye ti ado sheeko, nang ke ta dum weyani kpang ka we for la po-shwee ye ti adoono molko. ⁶ Mo ma min wee shaana ti bayi, birang kan mo ma ving lu'ulu'u ma ti toom annyanshaarim. Yoo shinui tabyo kwi ka shooju, ka bi birang shinui in shiru shikju in jadiro ma taama nyajuk-nyajuk. ⁷ "Ma bengo, ta min ma; Ma gassho, kan ma ta weyani. Yu gbaaraa, kan ta au ma. ⁸ Longku koo nong ye bennga, ta yiwani; koo nong ye gasshaa, ta weyani; kan niyo ye yuwaa gbaaraa, ta awin. ⁹ Koo wo nong ti shakki ma, ye laani maa bennga shii ka awan we-ta-kele, ta minin shiila ti shii? ¹⁰ Koo ma shii maa bennga shirim, ta minin kuretii? ¹¹ Longkuuno te, ma me an shek penaa min ween kpang ti shiba ma, pene dogii Foma ti ku-dang ta min ween kpang ti me benngani ya? ¹² Longkuuno te, koo wen ye ma leka memme in yuuma, ma sheema ma yuun ti shinui, longku tenei shoroi kan balila me an-pigrai. ¹³ "Ma ri ti kattan po-dang. Longku bangtang po-dang kan bwalang do koko ye ta war mina muro, kan ka memme gbe me ti yiu bi. ¹⁴ Pene po-dangi benjirung kan do kokoi shilib ye ta war mina kerang, nang bara memme lawiiu me ta weyani. ¹⁵ "Ma jooro me an-pigra me an shaba, me shinui ti waru shik ma ti ta lakat dinnyi pene kulli shinui an-gurateelu. ¹⁶ Ti bi shiiliju ma ta pen shinui. Memme ti leppo shiili inaabi ti shik kpaka-diling yei dugni ti shik biro bilit ya? ¹⁷ Kaa teerei, koo bang biro shire ti sheelai shiili yen kpang, pene piire biro ti sheelai piire shiili. ¹⁸ Biro yen kpang a ta sheelo shiili ye daklanim, yei biro ye daklani a ta sheelo shiili yen kpangum. ¹⁹ Koo biro shire yei sheelo shiili yen kpangum ta keyani in vingi ti ta deet. ²⁰ Kaa te nang, ma ta pen shinui ti bi shiiliju. ²¹ A koo nong ye ta teuno ya, 'Fo-mina, Fo-mina,' ye ta ri ta ya gub ku-dangum, pene bara me ti ya lewanno Fono ye ti ku-dang. ²² Memme gbe ta teuno ti ta darang teere ya, 'Fo-mina Fo-mina, duma minui yu pigra ti ta shommoko maa, ti ta shommoko minun kajiyo bi shanngau, kan ti ta shommoko minun yuyyo gbidina shuran maa?' ²³ Pɛnɛ nɛ ta tɛwɔn ti shinui tĩ pĩĩra na, Nɛĩ pɛn mam, ma ƙɔɔma won tĩ piree ƙan nɛ, ma me an yʊyyɔ shek!' ²⁴ Longkuuno te, koo nong ye yaaraa paarono kan in minn gba, ta yooju kaa niyo ye shen ye diga minani ti ku karinkasshi. ²⁵ Doo ku-dang in reru, ashaa in waru, kan pirit in pittina kan in tudira ku mina teere, pene a vuurorom, longku diga tei ti ku ar-karinkasshi. ²⁶ Pene koo nong ye yaaraa paarono kan a minin gbam, ta yooni kaa niyo ye dili mo diga minani ti ta shwiyak. ²⁷ Doo ku-dang in reru, ashaa in peru, kan pirit in pittina in tudira mina teere, kan tei in vuuroro, pene bubrantoi po ding." ²⁸ Koddi ye Yeesho fuwaa po sheero paaro te, jima memme in ya maam shubetnii, ²⁹ longku shii shuppaa shinui kaa mo kan kumen, pene a kaa me an balilajum.