¹ "Ma jooro yoo ya shuran dob ma yooro yei longku memme shinui in ti we shiki, koo yoo ma ta we we shik shuran ma ti piree kan Foma ye ti ku-dang. ² Nang mam maa ta min kunngu, mo ma biya adununu ti fok ma kaa ye me an wawo ado ti ya ti ta mina po for-fokju kan ti ku gbong kokom, longku shinui in we kum-piri ti piree kan memmem. Kulli ne ta teuma, shinui fuwaa po yiu we shik shuranju. ³ Pɛnɛ mam maa ta min ƙʊnngʊ, moko kumu kirako jiyau in pen gun wee kirako temme ti ku yaanim ⁴ longku kunnguko ta minoro ka jiri. Nang Foma ye ti we shiki ka jiri ta min ma we shik shuran ma. ⁵ Nang mam maa ta for-fok, mo ma yooma kaa we me an wawo adom, longku shinui leka in ti shereju sherii ka we for-fok ti ta mina for-fok kan ti ku bwaariya koko ka longku memme in ti we shikju, shinui fuwaa po yiu shik shuranju. ⁶ Pene ma, mam maa ta for-fok, ma reema ta gume ma ye ti nangshakki. Man nummo po-dangi kan man for-fok ti Foma, ye ti we shiki ka jiri ta min ma we shik shuran ma. ⁷ Mam maa ta for-fok, mo ma matto bi paaro kaa ye mei Yawudaawam ti ya longku shnui ti nyimmina ya ta yaaroju ka longku gbe pa-paaroju. ⁸ Longku kaa te, mo ma yooma kaa shinuim, longku Foma penaa wee ma leka ye man tang waraa beng shii. ⁹ Longku kaa te, ma for-fok kaa te: 'Fomu ti ku-dang, mo shor shik shommoko ka shaana. ¹⁰ Shero mo ya gubko waru. Shero mo nyimmoko yooro ti ku-buk kaa ye ti ku-dang ¹¹ Minmu weshiina darang ye booi. ¹² Ken foddomu janmu, kaa ye min ti fuddon jan me min ti ku yiu bi. ¹³ Moko warin mun po nawom, pene ken formu ti ta kira mo shek.' ¹⁴ Longku mam maa ti fuddo shasshalau memme, Foma ye ti ku-dang shi sheeni ta fuddoma sheema. ¹⁵ Pene mam maa ti fuddo shasshalaujum, Foma sheeni a ta fuddoma shasshalaumam. ¹⁶ "Mam maa ta yiu fok, mo ma yooma kaa me an bau kenni kaa ye me an wawo ado ti yam, longku shinui ti ya adooju ka longku shinui in shuki ti memme ya shin ti ku yiu ku-fokju. Kulli Ne ta teuma, shinui fuwaa po yiu we shik shuranju. ¹⁷ Pene ke, ke maa ta yiu ku-fokko, shak mor ti kuuko, ken shutto adooko, ¹⁸ kulang ke ta shuklani ti peddi ka ke ti ku yiu ku-fokkom, pene bara Foma mo ti we ka jiri; kan Foma mo ti we ka jiri ta min ma we shik shuranko. ¹⁹ "Mo ma gal birma ma ti ku-buk, ti piree kan joniyo koo kayuk ta daklanim, kan me an jiri ta beblani in jirim. ²⁰ Kan ye kaa teere, ma gal ti kuuma birma ti ku-dang, ti piree joniyo koo kayuk a ta daklanim, kan me an jiri ta belani in jirim. ²¹ Longku piree kan birmako, teerei piree kan poshaariko. ²² Adoi wulan deet lo-shik. Longku kaa te, ma adooko maa kpang, lo-shik ding kemii ka aaro. ²³ Pene adooko maa kpangum, lo-shikko dingkemi ka dil. Longku kaa te, ma aaro ye ti taako maa yen kulli dil, duma dil tei ka wen! ²⁴ Adoo mo ta wawo fo-mina palawum, longku koo shii ta kuroni mo dok in leweni ye dok, koo shii in kumi kan mo dok in kuroni mo dok. Ke ta wau Yamma kan birmam. ²⁵ Longku kaa te Ne ta teuma, mo ma turmoma ka longku kerangma, wee ma ta shaani koo wee ma ta sheyani; koo ka longku lo-shik ma, wee ma ta showani. Longku a kerang ye yeka weshiina, kan lo-shik yeka lanna maa? ²⁶ Ma gee ka adeewe ta pirit. Shinui a ti tobbina koo kasshanim, koo in gali ti ta kangum, pene Foma ye ti ku-dang in ti kang shinui. Mai yeko shinui kping kpang maa? ²⁷ Wo nong ti shakki ma ka longku lewanni ye ta tokko shaari joori shaklonii? ²⁸ Longku wen ma turmooma ti ku paaro ye kan lannai? Ma nyimmo kan bilit ta shwee, kaa ye shinui ti kpirin. Shinui a ti ya shuranum, kan shinui a ti bee lellewum. ²⁹ Pene Ne ta teuma, koo Sholmon ti ta shokranni a nau ya kparin kaa dok ti shakkijum. ³⁰ Ma Yamma maa ti shoppo lanna ti shik shwee me ti dan-doong, me shinui booi kan dwei kan dwei in ving shinui ti ta riwit, ka yee ye shii a ta yuuma lanna ti shik ma, ma me kan kattan li-shaarim mi? ³¹ Longku kaa te, mo ma turmoma man ti tewi maa, 'Minui ta sha wen?' koo 'Lanna wen ye min ta shoppanii?' ³² Longku mei Yawudaawam shinui ti gassho ween shurme te, kan Foma ye ti ku-dang penaa ma leka shinui. ³³ Pene ka toom ma gassho po ya gubni tida kan dobni, nang dogi wei ta min ma ding. ³⁴ Longkuuno te, mo ma turmoma ka longku dweyum, longku dwei ta turmoro ka longkukuro. Koo darang shire kan shek ye keraa tei.