¹ Bara ye Yeesho weyaa shik jimai, nang shii in ammani ku sheela. Bara ye shii shaani po diyo, me an yiu-shubetni in waru shiknii. ² Shii in au ku fokni in shuppon shinui, in ti tewi ya, ³ "Kpangi ti ku me an kenni ti ta shoom, longku sheejui ya gub ku-dang. ⁴ Kpangi she me ti ku bau kenni, longku ta kem shaarijui. ⁵ Kpangi ti ku me an yiu poshaari, longku shinui ta tappo ku ku-buk. ⁶ Kpangi ti ku me ti yaaro kpiyam kan in ti yaaro isshi fok ka longku yaani dob-dob, longku ta kem shinui. ⁷ Kpangi ti ku me ti ya kunngo, longku shinui ta we kunngo. ⁸ Kpangi ti ku me shaana ti po shaari, longku shinui ta we shikno Yamma. ⁹ Kpangi ti ku me an diyo twaalo-shaari, longku ta ye shinui ka shibano Yamma. ¹⁰ Kpangi ti ku me ti minin shilibi ka longku yaani dob-dob, longku po ya-gub ku-dangi weeju. ¹¹ Kpangii sheema ye memme maa ti kpakyoma kan in ti min ma shilibi kan in ti tebro koo peen piire ti kuuma ka shaba ka longkuuno. ¹² Ma yu beere kan twaalan-shaari kping, longku we shik shuranmai yen gbe ti ku-dang. Longku kaa te memme minaa shilibi ti me an-pigra me beyaa ma. ¹³ "Mai anjaa ku-buk. Pene ma tomon anjaa maa wiilaro, tomoni ta meerui ka yee? Birang a kpang ti ta fok niyom, bara in ukkina in tabyo kwi ka sho ta memme. ¹⁴ Mai aaro ku-buk. Gok-mina ye digii ti ku gungum a ta dum lattorom. ¹⁵ Pene memme a ti wul deet in assho kwi ti gun gurangum, pene ti dayii ti ku dangla, nang tei ta ee ku memme ta minai ding. ¹⁶ Shero mo aaro ma ee ti toom memme kulang shinui in we shik kpang shuran ma kan shinui in wau Foma ti ku-dang. ¹⁷ "Mo ma nyimmo maa ne wannai foddo fok shoro koo me an-pigrai. Nei warui ka longku fokjum, pene bara nen kemro shinui. ¹⁸ Longku kulli ne ta teuma na ku-dang kan ku-buk ta wiilaju, koo koran-we dok koo lawiiu a ta wiilani ti ta shorom, ar we war we ding ta kemron. ¹⁹ Longku kaa te, maa mo belaa ti ta dok shakki shoro shurme in ti shuppo peddi ya mo piime yu ta ye shii mo kattani ti ta ya-gub ku-dang. Pene maa mo shoraa shinui in ti shuppo shinui ta ye shinui ka mon gba ti ta ya-gub ku-dang. ²⁰ Longku ne ti ku teuma na bara mam maa yu dob in yek she me an ya balla kan Parishaawam, ma ta dum ri ta ya-gub ku-dangum. ²¹ Ma yaaraa ye tennan ti shinui milam ya, 'Mo ko tuk niyom, kan, 'Maa mo tuka ku ta ri ta shilib shiire.' ²² Pene ne ta teuma ma koo nong ye yuwaa den kan molli shii ta ri ta taa shilib shiire; kan maa mo teka ti molli ya, 'Kei piire niyo!' Ke ta ri ta taa shilib me an galo; kan maa mo teka ya, 'Kei dili!' shii ta ri ta deet ku-dang. ²³ Longku kaa we te, ke maa ta min kunngu ti ku po li-dungo kan ken nyimmina molko kan paaro kan ke, ²⁴ wessho kunnguko ti po teerei ti toom po li-dungoi, kan ken kooko. Ka toom ken wa limma shakkiko kan molko, nang ken waru ken tang min kunnguko. ²⁵ Limma shakkiko kan mo an jeere paaroko ye tida maan kaji ti ku koko war ta mina shiire, koo an jeere paaroko ta minko ti ta kira mo an shiire, kan an shiire in minko ti ta kira mo an jooro-ku mina muruk, kan ta dum vingko ti ta mina muruk. ²⁶ Kulli ne ta teuko, ke ta dum peru ti po teerem ye ke maa anngo kattan kine ye shii ta yiwin biikom. ²⁷ "Ma yaaraa ya teka milam ye, 'Moko yu shomakum.' ²⁸ Pene ne ta teuma na koo nong mo geeka shik paamun ka dalak fuwaa po ya shomak kan te ti po shaarini. ²⁹ Ma adooko ku kira temme maa ti liiko shuwat, kuklo ken vingi won. Longku yuwaa kpang ye dok ti shakki ku-gul shikko in ri ta deet kan ye lo-shikko ding in vingii ti ta deet ku-dang. ³⁰ Ma kirako kira temme maa ti liiko shuwat, peero ken vingi won. Longku yuwaa kpang dok ti shakki ku-gul shikko in ri ta deet kan ye lo-shikko ding in vingi ti ta deet ku-dang. ³¹ Birang tenna ya, 'Maa mo kayaa biino mannani, shero mo shii minin takarda tuk diyaa.' ³² Pene ne ta teuma na maa mo tuka diyaano mannani, yei a ti ku paaro ye kan shomakum, shigan tei an shomak. Mo ding ye diga tei ka bi ye tuka diyaaro shii yuwaa shomak. ³³ "Birang, ma yaaraa ye tenna ti me ti ta koddi ye fiji, 'Moko yu pammi shabam, pene yu ³⁴ pammiko ti Fo-mina.' Pene ne teuma na, ma wessho ya pammii foki dok, koo kan ku-dang, longku tei po ya gubno Yamma; ³⁵ koo kan ku-buk, longku tei po tabyo shooni; koo Urshaliima, longku tei gok-mina gbong Gub. ³⁶ Koo ken ya pammi ti kuuko, longku ke ta dum shiwan shok kuuko dok yen pe koo yen dingum. ³⁷ Pene shero mo paaroko yooro 'Oo, oo,' koo 'Onngoo, onngoo.' Wee ding kookaro ti fokno te, tei ti piree kan shuuro. ³⁸ "Ma yaaraa ye teka ya, 'Ado ti po sho ado, kan wuro ti po sho wuro.' ³⁹ Pene ne ta teuma, mo ma kai bi mo shekum. Kan ye kaa teere, maa mo paalaako ti jaklumko ku kira temme, shiwan yen dok ti shii birang. ⁴⁰ Maa mo leka warin ken ta mina shiire ka longku in lawwo lannako, shero mo niyo teere mo shii shar lanna kawoko. ⁴¹ Maa mo teka ya mo maan kaji yu mere po meel dok, koo kan shii po meel palau. ⁴² Min ti koo nong ye telaako, kan moko shiwa ta bi ti mo ding leka yiu jan ti kirakom. ⁴³ "Ma yaaraa ye teka milam ya, 'Ke lewo mo an ganglangko kan ken kura mo an geiko.' ⁴⁴ Pene ne ta teuma na, lewo mo an geiko kan ken for-fok ti me ti ku minko shilibi, ⁴⁵ longku ma ta yooma shibano Foma ye ti ku-dang. Longku shii ti li darangni in ti peru ti ku me an shek kan men kpang, kan in ti reru doo ti ku me dob kan mei dobum. ⁴⁶ Longku mam maa lekai me leka ma, we bii wen ye ma ta weyanii? A kaa te ye me an yiu kine buk ti ya kaa te maa? ⁴⁷ Mam maa ti ya kaayi ti ma molon ma, wee ma yuwaa wen ye yeka she peddii? ⁴⁸ Longku kaa te, ma yooma dob, kaa ye Foma ti ku-dang shii dob.