¹ Nang Shoom in shar Yeesho in warin dan-doon ka we nawani ta shuuro. ² Bara ye shii yikka fokni po darang naa-peereu kan yippa naa-peereu, shii in yaaro kpiyam. ³ Nang an nawo in waru in tewon ti shii ya, "Ke maa laano Yamma, pekro shiila me in shiwaju we-ta-kele." ⁴ Pene Yeesho in lignon ti shii ya, "Ballii ya, 'Niyo a ta kpiranii ka we-ta-kele waanim, pene ti bi koo peen pa-paaro me ti peru ti ta fokno Yamma.' " ⁵ Nang shuuro in shar shii in warin tarang gok-mina ye shaana in ammon shii piree kan joorii ti ku mina Yamma, ⁶ in tewon ti shii ya, "Ke maa laano Yamma, nyaattu shikko, longku ballii ya, 'Shi ta pekro me an-shuranni shinui in jooroko kuuko,' kan, 'Shinui ti shokroko ti ku-dang ti ta kiraju, kulang ke ta tura po-shooko ka shiilam.' " ⁷ Yeesho in tewon ti shii ya, "Birang ballii ya, 'Koo la-wiiu, ke ta nau Fo-mina Yamma kom.' " ⁸ Birang, shuuro in shar shii in ammon ku joori gungum in shukyon shik po yuyyo ya-gub ku peewe-piri kan shokranju ding. ⁹ Shuuro in tewon ti shii ya, "Ween shurme te ding ne ta minko, ma ke maa juuna ti toomno ken wauno." ¹⁰ Nang Yeesho in tewon ti shii ya, "Kooko won ti po te, ta Shuuro! Longku ballaa ya, 'Ke ta wawanii Fo-mina Yammako, kan ke ta yuun shuran ti shii waani.' " ¹¹ Nang shuuro in wessho shii, kpantidi, me an-shuran ku-dang in waru in yuun shuran ti shii. ¹² Wende bara ye Yeesho yaaraa ya yikka Yuwaana, in pereni ti Galiili. ¹³ Shii in wessho Naajeret in wanna in wa deeni ti Kapanahum, ye ti jele shiiruk Galiili ti ta kpakan fok buk ma Jeblon kan Naptali. ¹⁴ Tene yuwaa in kemro wee sheeraa ta an-pigro Isheya ya, ¹⁵ "Buk Jeblon kan Naptali, we war shik paali, ka we kooka Urdun, tenei Galiili mei Yawudaaam! ¹⁶ Shinui memme me dii ti ta dil shinui weyaa shik gbong aaro, kan ti me dii ti ta kpakan fok lukni muro, ti kuujui ye aaro pennan." ¹⁷ We yinna ti ta kiddi teere Yeesho in liiru gun ya kaawi in ti tewi ya, "Ma for-fok, longku po ya gub ku-dang wanna nimmi." ¹⁸ Kaa ye shii to Ku ya mere ti jele shiiruk Galiili, nang in we shik an moli Palau, ma Shimon mo ti ye shii yaa Biiturush kan Andaraawush molli, to Ku ving ja ti ta paali, longku shinui shwiji me an yippo shirim. ¹⁹ Nang Yeesho in tewon ti shinui ya, "Ma waru, ma yiru biino, nang ne ta shiwan man me an yippo memme." ²⁰ Kpantidi shinui in wessho jaju in yiwaju biinii. ²¹ Kaa ye Yeesho ti ku kowani ti po teere shii in we shik ma molon shin palau, Yaakubu laano Jabadi kan Yuwaana molli. Shinui ti ta gongi kan Jabadi foju in ti limma bi jaju. Shii in ye shinui, ²² nang shinui kpantidi in wessho gongi kan foju in yiwaju biinii. ²³ Yeesho in merko koo tong ti Galiili, in ti ya shubet ti ta mina for-fokju, in ti kaawo shinnyi po ya gub, kan in ti tassho shik koo peen pira kan agin ti hik memme. Shinnyinii in wangro ²⁴ piri ding ti ta Dimashka, kan memme in ti wangittu ka me shikjui bangum kan peen pirai peen-peeni, kan me shanngau sharaa kuujui, kan me shikju muraano kan me kuulaaju. Yeesho in tassho shinui. ²⁵ Gbong jima in yiu biinii ti Galiili, Dikaapolish, Urshaliima kan Yawuudiya kan we war kpakan po shiiruk Urdun.