¹ Ti ta shaklo shurme Yuwaana an ya Yulma in waru in ti kpaalo pi paaro ti dan-doon Yawuudiya in ti sheerra ya, ² "Ma for fok, longku gub ku-dang yuuna nimmi." ³ Longku tenei mo an-pigro Isheya yuwaan paaro ti kwi ya, "Eleno mondok ti ku ya yee ti dan-doon ya, 'Ma limma do kokono Fo-mina, man shupro shik kokoni dob.' " ⁴ Wende Yuwaana shoppii kan lanna shok penwe kan beel leeda dawii ti kumani. Gwaangnii golom kan shagni doon. ⁵ Nang Urshaliima kan Yawuudiya, kan kpakan po buk me kpomlii ti jele Shiiruk Urdun shinui in wanna ka shaayi kan shii. ⁶ Shinui in ti sheero pi shasshalauju, nang shii in yuun Yulma ti shinui ti ta shiiruk Urdun. ⁷ Pene bara ye shii weyaa memme Parishiyaawa kan Shadikiyaawa gbe ti ku waru shiknii ka we ya Yulma, nang shii in tewon ti shinui ya, "Ma me shiba shammam, pekraa mai nong ya mo ma yoppo den ye ta warui? ⁸ Ma sheelo shiili ye ta shuklo foran fokma. ⁹ Mo ma nyimmo maa , 'Min kan fono ta Ibiraayim.' Longku ne ta teuma Yamma kan kumen shokro shibo ti Ibiraayim koo ti shakki shiila me. ¹⁰ Fuwaa po liin gbaamei ti shoorin biroi. Longku kaa te, biro yei sheelo shiili yen kpangum ta peerani ti buk in vingi ti ta deet. ¹¹ Ne ta yuuma Yulma ka doo ka longku foran fok. Pene mo ta waru ti biino yekano gba, birang ne ta dum shar taa ta shoonim. Shii ta yuuma Yulma ka shoom Yen Shaana kan deet. ¹² Shii yiwii ka we dekro weeni ti ta kirani ta shwaaron po dusshoni kan in ganglo do shauni ti ta kang gal we-kira. Pene shii ta kur jongrangi ka deet yei ti bittinam." ¹³ Nang Yeesho in waru ti Galiili ta shiiruk Urdun longku Yuwaana in yuuni yulma. ¹⁴ Pene Yuwaana in yiu yaani kaa shii ta beelo foki ti shii ya, "Nennaa ken yuuno yulma, pene ke wanna shikno ya?" ¹⁵ Yeesho in lignon ti shii ya, "Kum piri wende, longku yuwaa kpang ka ken kemro dob-dob." Nang Yuwaana in kumin piri ti shii. ¹⁶ Ka bi ye fuwaa po yuun yulma ti shii, Yeesho in peru peeb ti ta dooi, nang geeru, ku-dang in awon ten ti shii. Shii in we shik Shoomno Yamma ti ku shaaru kaa ammaluk kan in dunguro ti kuunii. ¹⁷ Kpantidi, ele in shaaru ti ku-dang in ti tewi ya, "Tenei laano. Ye ne ti sha tomonnii kping."