¹ Wende bara ye shaat yuwaa, men gbidina me ankpaa kan me an toom memme shinui in gal fokju ka we tuk Yeesho. ² Shinui in kpakko shii, in koon ka shii, kan in wa mini ti Gub Bilaatush. ³ Nang bara ye Yawuda mo pilaan ka shii, weyaa minaa kelmo muro ti Yeesho, shii in ya den in shirin ka kine bela nee-tat ti men gbidina me ankpaai kan me an-toomi, ⁴ kan shii in tewi ya, "Ne yuwaa shasshalau, longku ye ne pilaa ka dom yei daklo wem." Pene shinui in liginna ya, "Taaka mui wen birangi? Teere dogii sheeko." ⁵ Nang shii in wakyon kinei ti ta mina Yammai, kan in kooni in wa shou fwaala ti bongni. ⁶ Mongba me ankpaa in yokko kine beleei in tewi ya, "A nenno in li kinei ti ta po gal birma ta mina Yammam, kan yei kine dom." ⁷ Shinui in deppina, in pilin ku-dam ka kinei. Ye ti ye ku-damii yaa, "Ku-dam mo an digyo telang, longku po teerei in yooro po-nan bino. ⁸ Longku kaa te, we foottu booi ti ye ku-dami ka yaa, "Ku-dam Dom. ⁹ Nang in kemro wee an-pigra Irimiya tenna ya, "Ahinui in shar kine bela ye naa-tati, kine ye shin memme Ishereila ye kunnga ya mo anngon ti kuunii, ¹⁰ nang shinui in pilin ku-damno mon an digyo-telang, kaa ye Fo-mina shuklaano." ¹¹ Ti ta koddi teere Yeesho in sheri ti toomno gub, nang Bilaatush gub Rooma, in tel shii ya, "Kei gub Yawudaawa ya?" Yeesho in liginna ya, "Ke teka kaa te." ¹² Pene bara ye mongba me ankpaa kan me an-toom, in gbumin shaba ti kuunii, shii a lignon we birangum. ¹³ Nang Bilaatush in tel shii ya, "Kei ti yaaro wee ti ku kpaan ken ti kwim ya?" ¹⁴ Pene shii a ligino koo paaro dokum, longku kaa te, wei in li gub in ya maam kping. ¹⁵ An tei waari gub, maa koddi sha temre ta fora kira ka niyo dok ye ti ta mina muruk ye galoi shaka. ¹⁶ Ti ta koddi teere, shinui kan manni mo an bang kumoi ti ta mina muruk, shommonii Barabbash. ¹⁷ Longku kaa te bara ye shinui galaa shin ding, Bilaatush in tewon ti shinui y, "Wo nong ye ma leka nen foran man kira ka shii? Barabash ya koo Yeeho mo ti ye yaa Kiriti ya?" ¹⁸ Shii penaa shinui wannan ka Yeesho ti shii ka longku mwisshi. ¹⁹ Kaa ye shii diin ti ku juk shiirei, mannani in shurin shuran ti shiknii ya, "Wessho ya weenan dok ti shik niyo yei daklo we teerem. Longku ka yippa booi ne taa shilibi ti do-shuna ye ne yuwaan ti kuunii. ²⁰ Wende mongba me ankpaa kan me an-toom shinui in shuppo jimai mo shinui bengeju Barabbash ka we foran-kira, kan in tuk Yeesho. ²¹ Gubi in tel shinui ya, "Wo shire ti shakki palau me ye ne ta foran man kira ka shii ti mai?" Shinui in liginna ya, "Barabbash" ²² Bilaatush in tel shinui ya, "Wo wen ye ne ta yaani ka Yeesho ye ti ye yaa, "Kiriti?" Shinui in liginna ya, "Sheewo shii." ²³ Nang shii in tewi ya, "Longku wen, wo gbong wen ye shii daklaai?" Pene shinui in yallina bang ya, "Sheewo shii." ²⁴ Longku kaa te ye Bilaatush weyaa a ta dum ya weenan dokum, pene bara ye memmei leka shokro eleju kan bangi, shii in duwa doo in fuddon kirani ti toom jimai, kan in tewi ta shii ya, "A doo wee taakano ka der domno la-moo ye yei daklo we yem. Dogii sheema." ²⁵ Memmei ding in liginna ta shinui ya, "Shero mo shar-ku domni mo deero kuumu kan shibamu." ²⁶ Nang shii in forin kira ka Barabash ti shinui, pene shii in bir shikno Yeesho kan in minin shii ti shinui ka we sheewani. ²⁷ Nang me an bee-deetno gub in shar Yeesho in riin ta ku-dam mina po ya-gubi nang in ganglo-do gbumyan-ku me an bee-deeti ding. Shinui in foddo lanna ²⁸ shiknii kan shinui in shoppo in showin lanna yen gakal, peen she me an gub ti shiknii. ²⁹ shinui in wa lau shik arat kaa we-ku an gub shinui in showin ti kuunii. Shinui in juunaju juunii ti toomnii in nwinnyo-foknii in tewi ta shinui ya, "Min kaako, ta Gub Yawudaawa!" ³⁰ Shinui in fissho elet ti shiknii, shinui in shar la-biro in birin shii ti ta kwi ti kwi-ti kwi. ³¹ Bara ye shinui nwinnyaa foknii, shinui in for lanna gubi ye ti shiknii, in showin bi lanna sheenii ti shiki, nang shinui in koon ka shii ka we waraa sheewo shii. ³³ Kaa ye shinui penna, shinui in kpomi kan manni niyo Shiraayim ye shommonii Shimon, mo shinui liyaa ka bang in koona ka shaayi kan shinui longku shii in shar gbong biro loonii. ³³ Shinui in waru piree ti ye yaa, "Golgoota," ye ti shuklani yaa, "Piri Gunglung-ku." ³⁴ Shinui in minin doo inaabi lonngani ka ween den ti Yeesho ya mo sho. Pene bara ye shiii naka, nang shii in kuroni sheyani. ³⁵ Bara ye shinui fuwaa po sheewo shii, shinui in bwatto ta lannanii ti bi ving kaari, ³⁶ kan shinui in diina ta gee kuunii. ³⁷ Ti ta kuunii shinui in tannan yaan balla ye ti maarra ya, "Tenei Yeesho, gub Yawudaawa." ³⁸ Me an-jiri me palau me sheewaan ka shaayi kan shii, dok ti ku kira-temme kan dok ti ku kira-jiyau. ³⁹ Me ti yiu po teere maa ta kowani in ti kpaa shii, kan ti yigro shik kuuju ⁴⁰ kan in ti tewi ya, "Ke mo ta vubro mina Yamma kan ken dig bi ti shakki shaklo tat, kauro kuuko! Ke maa Laano Yamma, shaarin ti ku biro-sheewoi!" ⁴¹ Kaa teerei mongba me ankpaa, kan me an shubet ti ta shoro kan me an-toom shinui in nwinnyo foknii. Shinui in tewi ya, ⁴² "Shii maraaku peddi, pene a dum markuunim! Shii Gub Ishereila. Shero mo shii shaarin ti ku biro sheewoi, nang minin tang kumani kan shii. ⁴³ Shii kunnga kan Yamma, shero mo Yamma kauro shii wendei. Ma Yamma maa leka foran kira ka shii. Longku shii ti teka ya, 'Nei laano Yamma.' " ⁴⁴ Kaa tei birang, me an jiri me sheewaa shinui kan shii shin sheeju in yuun ding paaro ti shii. ⁴⁵ Wende wee yikka ti pelle ka sheri darang we war kettan darang, dil in nummo ta piri. ⁴⁶ Dob-dob koddi kettan darang, Yeesho in yallina ka ele yen bang ya, Eloi, Eloi, lamaa shabaktaani!? Tenei wee ta shuklani ya, "Yammano, Yammano, longku wen ye ke fulaan bi ka nei?" ⁴⁷ Koddi ye peddi me shengrii ti po teere yaaraa kaa te, shinui in tewi ya, "Shii ti ku ye Ilya." ⁴⁸ Kpantidi dok ti shakkijui in juwa yoba in wa shar fong, in showi ti ta doo yen shwang, in showi ti ku shugo, kan in showin ti shii mo sho. ⁴⁹ Dogijui in tewi ya, "Wessho shii shi dokni. Shero kama gee kergum Ilya maa ta warui mar shii." ⁵⁰ Nang Yeesho in yallina ka ele yen bang birang, nang shii in tol shuna shoomni ye wiilani. ⁵¹ Dob-dob koddi teere, lanna kawo ta mina Yamma in jaaro taaro palau we yinna ti tuu-kwi we shaaru tuu-guni. Ku-bukin midiro shikro kan gbidina gaddi in badilaju. ⁵² Duwa-duwa in appaju kan kuma memme gbe me muttaaju mereju dob in shokro shinui kan dwei. ⁵³ Shinui in pepittu ti ta duwaju ka bi ilitni, in riyyo tarang gok-mina, kan in kengro do memme gbe. ⁵⁴ Wende bara ye mongba an bee-deet kan me ka shaayi kan shii me ti ku geniro kuuno Yeesho weyaa shik midan shik buki kan wee yuyyaaju, shinui in ya shewo kan in tewi ya, "Kulli, la-moo yei Laano Yamma." ⁵⁵ Shereb gbe me yinna biino Yeesho ti Galiili kan shinui in ti yuun shuran ti shii shengreju kan talii in ti gee wee ti ku yooro. ⁵⁶ Ti shakkijui ka Maryamu Magadaaliya, Maryamu nonno Yakuubu kan Yuwaana kan non shibano Jabadi. ⁵⁷ Bara ye kiryippa yuwaaro, nang manni mo an-birmai niyo Armatiya, ye shommonii Yuwaana, ye shi sheeni an yiu-shubetno Yeesho in waru. ⁵⁸ Shii in war shikno Bilaatush in beng shii ka kumano Yeesho. Nang Bilaatush in min kumen ya mo minin ti shii. ⁵⁹ Yuwaana in shar kumai, in dau shiki ti ta lanna yen yelek-yelek, ⁶⁰ kan in kanno kumai ti ta duwani ye shii yemmaa yen fo ti shik gaddi. Nang shii in gbumillu gbong shiila in nummon fok duwai in kooni. ⁶¹ Maryamu Magadaliiya kan yen dok Maryamui ka shin ti po teerei, deeju shiwan dooju ti shik duwai. ⁶² Pirbang, yei darang ka bi limmai, mongba me ankpaa kan Parishaawa in gallu ti jeleno Bilaatush. ⁶³ Shinui in tewi ya, "An-shubet, min nyimmaa ye koddi ye mo an-dokko ye kan dwei, shii tenna ya, 'Ka bi shaklo ta Ne ta illlono birang.' ⁶⁴ Longkuuno te min kumen mo geniro ku duwai kping po shaklo tat. maa kaa tem, me an yiu-shubetni ta dum warani in wa jir shii, ka bi in wa tewi ti memme ya, 'Shii illaani ti ta duwa,' ke ti waa, dokko ye ka bi ta yek ye ka toomi perak gbe." ⁶⁵ Bilaatush in tewon ti shinui ya, "Ma shar me an-geren. Koo man wa genirra kpang kaa ye ma lekan." ⁶⁶ Kaa te, shinui in wanna in geniro ku duwai kpang kan neewan showan kirano gub ti ku shiilai kan shinui in li me an-bee-deet mo yu geren po teere.