¹ Ka bi Darang Nessho Yawudaawa, kaa ye nennga waru ta darang dok she shaklo parilau, Maryamu Magadaaliya kan yen dok Maryamui shinui in warui gee ta duwai. ² Kpantidi, in shemo ya mirid buk, longku an-shuranno Yamma shaana ti ku-dang, waru in gbumlo shiilai won, in deennin ti kwi. ³ Shiknii in ti eena kaa aaro , kan lanna shikni yen pe shak-shak kaa ar-deele. ⁴ Shik me an-geren in tari ka longku shewo kan in yooju kaa me kumai. ⁵ Nang an-shurano Yamma in yuun paaro ti sherebi ya, "Ma wessho ya shewoi, longku ne penaa ma ta gassho biino Yeesho, ye sheewaa. ⁶ A doo shii ti po tem, pene illaani, bara kaa ye shii tekan. Ma waru man gee piree kannaan Fo-mina. ⁷ Ma koo peeb kan ma wa tewi ti me an yiu-shubetni maa, 'Shii illaani ti shakki me kuma. Gee, shii ta warani ti toom ma we warGaliili. Ti po teere ma ta we shikni.' Ma gee, ne teka ma." ⁸ Nang sherebi in wessho ku duwai peeb kan shewoi kan beere gbe, kan shinui in ya yoba in wa tewi ti me an yiu-shubet. ⁹ Kpantidi, Yeesho in waru shikjui in tewi ya, "Ne ti kaa ma! Sherebi in nemru in yippo shik shoonii in wau shii. ¹⁰ Nang Yeesho in tewon ti shinui ya, "Mo ma yu shewom. Ma koo man wa tewi ma molonno mo shinui koo war Galiili. Ti po teere shinui ta we shikno." ¹¹ Wende ye tida sherebi ti ku mereju, kpantidi, peddi me an-gereni in ri tarang gok-minai in tewi ti mongba me ankpaa wee ding yuunaro. ¹² Bara ye me ankpaai kponnga kan men gbidinai, shinui in deppo shik paaroi ka shaayi, shinui in min kine gbe ti me an-bee-deet ¹³ kan in tewon ti shinui ya, "Ma tewo ti memme maa, 'Me an yiu-shubetno Yeesho wanna ka yippa in wari jir kumanii koddi ye min ti do shaklo.' ¹⁴ Ma gun paaro te maa fooraaro shikno gub, min ta dimmo shii kulang ma ta we turmom." ¹⁵ Longkuuno te, me an-bee-deeti in yiu kinei in wa ya kaa ye pekinnan shinui. Shinnyi sheere te in wiilo ta kumo Yawudaawa kan in shooro toom ar we foottu booi. ¹⁶ Pene me an yiu-shubeti shin kpumu gee doki in war Galiili, ti ku sheela ye Yeesho temyaan ti shinui. ¹⁷ Koddi ye shinui weyaa shiknii, shinui in wau shii, pene peddi a deeno kumanim. ¹⁸ Yeesho in waru shikju in yuun paaro ti shinui kan in tewi ya, "Minnano kumen ku-dang kan ku-buk ding. ¹⁹ Longkuuno te ma koo man wa shiwan memme ku-buk ding me an yiu-shubet. Ma yuun Yulma ti shinui ti ta shommono Fowi kan she La kan she Shoom Yen Shaana. ²⁰ Ma shuppo shinui mo mur-ku ti wee ding ye ne pekraan man. Ma gee, Ne ka shaayi kan ma koo dimin, kan we war wiilan ku-buk."