¹ Bara ye Yeesho wiila-po sheero we te, shii in tewi ti me an yiu-shubetni ya, ² "Kaa ye ma penaa, dogi darang shaklo temre teelani palau in waru, kan ta min La Niyo ka we sheewani." ³ Nang mongba me ankpaai kan men gbidina memme in gallu ti toom mongba ankpaa ye shommonii Keepash. ⁴ Nang shinui in deppina ka jiri koko ye shinui po yiwin Yeesho ka we tuk shii ka jiri. ⁵ Longku shinui ti ku sheerani ya, "A koddi temrem, yoo shabbi illina ti shakki memme." ⁶ Wende koddi ye Yeesho ti Betaani ti ta minano Shimon mo an-pira lakat, ⁷ kaa ye shii teeka shikni ti shik gangla-sha weshiina, ka paamun in waru shiknii ka okro mor ye gijii yen tomon ye kparkadak, nang tei in deren ti kuunii. ⁸ Pene bara ye me an yiu-shubetnii weyaa kaa te, shinui a shu tomonim in tewi ya, "Tenei ya kalang ka we maa? ⁹ Ai daa pilaan-we ti ku kine gbe kan in daa minaa kinei ti me an kenni." ¹⁰ Pene Yeesho, penaa te, in tewon ti shinui ya, "Longku wen ma ti ku turmo paamun tei?Longku tei yuwaano ween kpang. ¹¹ Ma kama me an kenni ka shaayi kpaaliya ding, pene ma ta diyani kan ne kpaaliya dingum. ¹² Longku bara ye tei deraa mor te ti shikno, tei yuwaa ka longku nanono. ¹³ Ne ta teuma yen kulli, koo ti tong ye ta kaawon shinnyi yen tomon te ti ku-buk ding, wee paamun sheere yuwaa ta sheero piri ka we nyimmani kan te." ¹⁴ Nang dok ti shakki kpumu gee-palawi, mo shommonii Yawuda Ishkarooti, in war shik mongba me ankpaa ¹⁵ kan shii in tewi ya, "Ma ta minno wen ye ne maa minaa ma shii?" Nang shinui in maaron kine bela naa-tat ti shii. ¹⁶ We tangna ti ta koddi teere, shii in yiu gassho koko po minin shii ti shinui. ¹⁷ Wende ti ku darang an dok ta koddi sha jong we-ta-kele, me an yiu-shubet in waru shikno in tel shii ta shinui ya, "Ke leka minun wa limma po sha temre teelanii ti tong?" ¹⁸ Shii in lignon ya, "Ma war tarang gok-mina ti shik manni niyoi,man tewon ti shii maa, 'Fo-mina teka ya, koddino nemnaro. Ne ta waraa shaweshiina teelani kan me an yiu-shubetno ti ta minako.' " ¹⁹ Kaa te, me an yiu shubeti in wa ya kaa ye Yeesho tennan ti shinui, nang shinui in wa limman weshiina temre teelanii. ²⁰ Bara ye kiryippa yuwaa, Yeesho in deeni dii ka we shaani ka shaayi kan kpumu gee-palawi. ²¹ Kaa ye shinui ti ku shaani, sii in tewon ti shinui ya, "Ne te teuma yen kulli, na dok ti shakki ma ta pilin ka ne." ²² Shinui in turmoju, kan koo nong in yiu tel shii ya, "Kulli a nem maa, Fo-mina?" ²³ Yeesho in lignon ti shinui ya, "Mo kirano kan sheeni kpongan ti ta gurangi shii mo ta waraa pilin ka ne. ²⁴ La Niyo ta kooni, bara kaa ye ballaan ti kuunii. Pene rash-rashii sheeno mo ye ti piree ta waraa pilin kan La Niyo! Daa yuwaa kpang ti shikno muyei ye daa patto shiim." ²⁵ Yawuda, mo ta pilin ka shii in teli ya, "We tei Ne ya, An-shubet?" Yeesho in lignon ti shii ya, "Ke teka ka fokko." ²⁶ Ka ye shinui ti ku shaani, Yeesho in shokro we-ta-kele in liin kpang ti kwi, in beblo tai. Shii in mini ti me an yiu-shubet kan in tewon ti shinui ya, "Ma sharu, man sha. Tenei lo-shikno." ²⁷ Shii in shar la-temmei in pammina, nang in minin ti shinui kan in tewi ya, "Ma sho, ma ding. ²⁸ Longku tenei domno we deewanku ye deraa ka longku memme gbe ka longku fuddo shasshalauju. ²⁹ Pene ne ta teuma, Ne ta she doo shiili inaabi te birangum, we war darang teere koddi ye ne ta sheyani ka shaayi kan ma ti ta po ya-gubno Fono." ³⁰ Bara ye shinui yuwaa vonak, shinui in pereju in ammaju ku sheela Jaitun. ³¹ Nang Yeesho in tewon ti shinui ya, "Ma ta shugyani ka yippa ka longkuuno, longku ballii ya, 'Ne ta bir An-tii kan an-pali dinnyii ta pil taaju.' ³² Pene ka bi ye maa shokraano, Ne ta kowani ti toom ma we war Galiili." ³³ Pene Biiturush in lignon ti shii ya, "Koo dogi ta shugyani won ka longkuuko, Ne ta dum shuwani wonum." ³⁴ Yeesho in lignon ti shii ya, Ne ta teuko yen kulli ka yippa tenei, ye gok in tang waraa gbol-kwii, ke ta ya jiramno sho tat ka kei pennom." ³⁵ Biiturush in lignon ti shii ya, "Koo ne daa ta murono ka shaayi kan kei, ne ta dum ya jiramkom." Dogi me an yiu-shubeti shin ding in tewi kaa te. ³⁶ Nang Yeesho in wanna ka shaayi kan shinui ti piree ya Getshammani kan in tewon ti me an yiu-shubeti ya, "Ma dee ma wono man dang kuuno nen wa for-fok." ³⁷ Shii in ye Biiturush kan shibano Jabadi shin palau ka shaayi kan shi kan in yiu gbanoro kan turmo. ³⁸ Nang shii in tewon ti shinui ya, "Ta aano gbanaaro kping, ar kaa ne ta murono. Ma dee ma ti po lee man ya geren ka shaayi kan ne." ³⁹ Nang shii in giyani la-wiiu, in tuwo dooni ti buk, in for-fok. Shii in ti tewi ya, "Fono, maa ta dum yooro, shero mo la-temme mo taa-shilibi te wakoro ti piree ne. Pene a lewan sheenom, pene mo kaa ye ke lekan." ⁴⁰ Shii in waru jele me an yiu-shubeti, in we shinui shaklo shaddaa, nang shii in tewi ti Biiturush ya, "Wo wen, ma ta dum ya geren ka shaayi kan ne po koddi dokum ya? ⁴¹ Ma yu geren kan for-fok kulang ma ta shuwani ti ta nawom. Shoomi kulli leka, pene lo-shiki bukani. ⁴² Nang Yeesho in wessho shinui koddi an palawi. Shii tewi ya, "Fono, ma tene maa ta kooro wonum ye yikka ti gbara-do nen she, sheeko lewani mo yooro." ⁴³ Birang shii in meeru in wa we shinui ti ku ya shaklo, longku shaklo yeka doojui. ⁴⁴ Yeesho in wessho shinui birang, shii in kooni an tati, in ti sheero bi paaro ye boi. ⁴⁵ Nang Yeesho in waru shik me an yiu-shubet kan in tewon ti shinui ya, "Ar wende ma ti ku ya shaklo kan nesshani ya? Ma gee, koddii yuwaa ye fuwaa po min La Niyo ti ta kira me an shasshalau. ⁴⁶ Ma illo, kama koo. Ma gee, mo ta pilin ka ne yuuna nimmi." ⁴⁷ Koddi ye tida ti ku ya paaroi, Yawuda, dok ti shakki kpumu gee-palawi, in foottu. Gbong jima ka shaayi kan shii kan mongba me ankpaa kan men gbidina memme. Shinui shaddii kan biro-biro. ⁴⁸ Wende shwiji mo ta waraa pilin ka Yeesho fuwaa po jirin-kwi, in tewi ya, "Mo ne ta waraa taamo shii teerei shwijii. Man tollo shii." ⁴⁹ Kpantidi shii in waru shikno Yeesho in tewi ya, "Ne kaakoko ta an-shubet!" kan shii in taamo Yeesho. ⁵⁰ Yeesho in tewon ti shii ya, "Abo, yu wee ke wanna yaani." Nang shinui in waru, in shou kiraju in yiwin Yeesho, nang shinui in tollo shii. ⁵¹ Kpantidi, dok ti shakki me ka shaayi kan Yeesho in shou kirani, in kpaattu agarumni, in shemo kaan kumo shook mongba ankpaai, in shemo fur kumonii. ⁵² Nang Yeesho in tewon ti shii ya, "Maan ka agarumko ta baramto, longku me ding ti shar agarum ta koon-shwal ka longku agarum. ⁵³ Ma nyimmina maa ne ta dum ye fono, kan shii ta dum shuruno gun me an shuran ku-dang me shinui yeka bang shig-dok sho kpumu gee-palau maa? ⁵⁴ Pene ka yee ye yuyyan balilai ta kemranii?" ⁵⁵ Ti ta koddi teerei Yeesho in tewon ti jimai ya, "Duma ma peppina ka agarum kan biro-biro ka we tollono kaa nei an-jiri? Kpaaliya din ne ti ya shubet ti ta mina Yamma, kan mai yiu nom. ⁵⁶ Pene tene yuwaa ding ka longku yuyyan balila me an-pigra yuyyaa in kemirra." Nang me an yiu-shubet shii shinui in jubyoju. ⁵⁷ Me tollaa Yeeshoi shinui in warin shii shikno Keepash mongba ankpaa, ti piree me an shoro shiire kan men gbidina galii ka shaayi. ⁵⁸ Pene Biiturush in yiu biinii la-tali we war ku-dam ta mina mongba ankpaai. Shii in wa ri in wa deeni dii kan me an geren, in ti gee dangan-pi ye ta wiilon. ⁵⁹ Wende mongba me ankpaa kan me an galoi shinui ti ku gassho jimro shaba ti kuuno Yeesho ka longku shinui in tuk shii. ⁶⁰ Shinui a wa koo dokum, kaa ye gbeju pepinna toom ka jmro shaba. Pene ka bi palau in peru toom ⁶¹ kan in tewi ya, "La mooye teka ya, 'Ne ta dum vubro minano Yamma nen dig bi birang ti ta shaklo tat.' " ⁶² Nang mongba me ankpaa in illo shik in tewon ti shii ya, "Ke kan wee po lignanim ya? We tei wenee ye shinui ti ku jimranii ti kuukoi?" ⁶³ Pene Yeesho in yooni boboj. Mongba me ankpaa in tewon ti shii ya, "Ne pekraako ti piree Yamma mo kan dwei." teumu, ye ke maa Kiriti, Laano Yamma." ⁶⁴ Yeesho in lignon ti shii ya, "Ke teka ka shikko. Pene Ne ta teuma, we yikka wende we war toom ma ta we shik La Niyo dii ti ku kira-temme ya-gbu kan ta waru ti ta shunngu ku-dang." ⁶⁵ Nang mongba me ankpaai in jaaro lannani in tewi ya, "Shii yuwaa paaro shwaal! Longku wen kama bambiri ti ku gassho manni jimroi? Ma gee, wende ma yaaraa shwaali. ⁶⁶ Ma nyimmaai wen?" Shinui in liginna in tewi ya, "Shii nennaa muro." ⁶⁷ Nang shinui in fisshon elet ti adoonii kan in yuun tuwa ti shii, kan shinui in it padilo shii ka ta dannam kiraju, ⁶⁸ kan shinui in tewi ya, "Yuumu pigra, ke Kiriti. Wo nogee ye paalaakoi?" ⁶⁹ Wende Biiturush dii peewe ti ta ku-dam mina shiirei, kan manni shook la-gejei in waru shiknii kan in tewi ta tei ya, "Ke sheeko ke ka shaayi Yeesho niyo Galiili." ⁷⁰ Pene shii in ya jirami ti toomjui shin ding, in ti tewi ya, "Nei peno wee ma ti ku sheeron paaro ti kwim." ⁷¹ Bara ye shii peraa gbong po-dangi, manni shook la-gejei in we shiknii kan in tewi ti me ti po teerei ya, "Niyo sheere, shi sheeni ka shaayi kan Yeesho Niyo Naajeret." ⁷² Shii birang in ya jiram kan pammi ya, "Nei peno niyom!" ⁷³ Ka bi la-wiiu kaa ye me shengrii wanna kan in tewi ti Biiturursh ya, "Kulli ke sheeko kei dok ti shakkiju, longku dangan-pi ye ke ti yuun paaroko shuklaako." ⁷⁴ Nang shii in yiu ya shaami kan pamyo-we ya, "Nei peno niyom," kan kpantidi gok in ya kwii. ⁷⁵ Biiturush in nyimmina ka paaro ye Yeesho ye tekan ya, "Gok maa ta ya kwii, ke ta ya jiramno sho tat." Nang shii in pereni peewe in wa ya kwii wirit-wirit.