¹ "Nang po ya-gub ku-dang ta yooro ka shiba-geje shin kpumu me sharaa okro deetju in waraa kpom ku an ya-diyaa yen fo. ² Me fuwat ti shakkijui me dili kan me fuwati shinui me darani. ³ Pene shiba-geje me dili in shar okro deetju, shinui a shar mor koo la-wiiu ti kirajum. ⁴ Pene shiba-geje me daranii in dubya mor ti ta okro deetju. ⁵ Wende bara ye an-diyaan foi a waru shwatum,nang shin ding shinui in yiu yaaro shaklo in yooju shaklo. ⁶ Pene ka nangshakki yippa, ka ele yallo ya, 'Gee an ya-diyaan foi wono! Ma pero man kpom foknii.' ⁷ Nang shiba-gejei in illina in limyo shik okro deetju. ⁸ Me dili in tewi ti me daranii ya, 'Ma naanmu peddi mor mai longku okro deet sheemu ti ku bittoro.' ⁹ "Pene me daranii in lignon ti shinui in tewi ya, 'Kaa ye a ta dum fooromu kama dingum, ma koo man war shik me ti pilin man pillin ti sheema.' ¹⁰ Kaa ye shinui kooka waraa pilani, an ya-diyaan foi in waru, nang me shikjui limmani in reeju ka shaayi po sha temre diyaai kan shii, nang in nummuru podangi. ¹¹ Ka bi dogi shiba-gejei sheeju in meeru in tewi ta shinui ya, 'Fo-mina, fo-mina, au mu podangi.' ¹² "Pene shii in liginna in tewi ya, 'Ne ta teuma yen kulli, nei penmam.' ¹³ Longkuuno te, ma yiu ya diyo geren, longku mai peno darangi yei koddiim." ¹⁴ "Longku ta yooro ka manni niyoi leka ya mere war manni buki. Shii in yeyyuru me shookni in minin birmani ding ti shinui. ¹⁵ Ti mo dok ti shakkijui shii in minin kine fuwat, ti mondok shii in minin palau, kan ti mondok birang shii in minin kine dok. Koo nong in yiu dob-dob bangni, nang niyo teere in kooni mere. ¹⁶ Mo yikka kine fuwati shii kpantidi in wanna in wa yuun shuran ka sheeni, in shemo waan dooi shin fuwat ti kwi. ¹⁷ Kaa te mo yikka kine palawi in wa waan palau ti kwi. ¹⁸ Pene shook mo yikka kine doki in wanna in wa oppo ta buk in latton kineno fo-minani. ¹⁹ Wende ka bi diyaa bak, fomina shurme te in meeru in wa yippo gun birmani ye ti kirajui. ²⁰ Shook mo yikka kine shin fuwati, in waru ka manni kinei shin fuwat birang. In tewi ta shii ya, 'Fo-mina, ke minaano kine shin fuwat. Gee ne weenan manni fuwat ti kwi.' ²¹ "Fo-minanii in tewon ti shii ya, 'Nyee ta shook yen kpang, mo an yiu-poshaari! Ke yikka po shaariko ti ku wee kattani. Ne ta liiko ti ku ween gbe. Waru ke ri ta beereno fo-minako.' ²² "Shook ye yikka kine shin palawi in waru in tewi ya, 'Fo-mina, ke minaano kine shin palau. Gee, Ne gasshinan manni kinei palau ti kwi. ²³ "Fo-minanii in tewon ti shii ya, 'Nyee, ta shook yen kpang kan an yiu poshaari! Ke yikka po shaariko ti ku we kattani. Ne ta liiko ti ku wee gbe. Waru ke ri ta beereno fo-minako.' ²⁴ "Nang shook mo yikka kine doki in waru in tewi ya, 'Fo-mina, ne penaa kei niyo ye po yuuko shilib. Ke ti ganglo-do wee kei tobbom kan ken ti kassho wee kei kaawom. ²⁵ Ne yuuna shewo, longku kaa te, nen wanna nen nan kineko ti ta buk. Gee weeko wono.' ²⁶ "Pene fo-minanii in lignon ti shii in tewi ya, 'Ke mo an shek kan daklan shook, ke penaa ne ti ganglo-do wee nei tobbom kan kassho wee nei kaawom. ²⁷ Longkuuno te, ke daa liina kineno ti ta mina kine ye ne maa meeru nen wa waan doo ti kwi. ²⁸ Longku kaa te, ma lauwon kinei ti kirai man mini ti shook mo kan kine kpumui. ²⁹ Longku ti mo kan te gbe, ta minin manni gbe. Pene ti piree kan moi ti gassho wem, modaa ye shii kan te la-weewii, ta lauwon ti kirai. ³⁰ Nang man ving piire shook teere ti won ti ta dil. Ti po teere ta ya kwii kan ar ku wuro.' " ³¹ "Koddi ye La Niyo ta waru ti ta shokranni kan me an shuran ku-dang ka shaayi kan shi, nang shii ta deeni ti ku shokran juk po ya-gubni. ³² Ku-buk ding ta gallin ti toomnii, nang shii ta bwaaro ta memme kaa ye an-tii bwaaron ta dinnyi kan wii. ³³ Shii ta gal dinnyii ti ku kira temmeni pene shii ta gal wii ti ku kira jiyauni ³⁴ Nang Gub ta tewani ti me ti ku kira temmeni ya, 'Ma waru, ma me Fono liyaa ma kpang ti kuuma, man tappo-ku po ya-gub ye limma ma ti liyan gun ku-buk. ³⁵ Longku ne ti ku yaaro kpiyam, man minno gwaang; Nen ti yaaro isshi-fok, man minno we-sheyani; Nei bino kan man riin ka ne ta mina ma; ³⁶ Nei gun vire kan man dauno lanna; Shiknoi bangum kan man jooro kuuno; Ne ti ta mina muruk kan man wanna man yuuno kaa.' ³⁷ "Nang me dob ta lignani ta shinui ya, 'Fo-mina, wo dimin ye min weyaa ke kan kpiyam kan minun kangkoi? Koo ke ti ku yaaro isshi-fok kan minun minko we sheyanii? ³⁸ Wo dimin ye min weyaa kei bino minun riin ka ke ta minamui? Koo gunko vire minun dauko lannai? ³⁹ Wo dimin ye shikkoi bangum koo ke ti ta mina muruk minun waru shikkoi? ⁴⁰ Nang Gub ta lignani in tewon ti shinui ya, 'Ne ta teuma yen kulli, wee ma yuuna ti dok shakki nyitti ma molonno me, ma yuunai ti ne.' ⁴¹ Nang shii ta tewon ti me ti ku kira jiyaunii ya, 'Ma koo ma won ti piree kan ne, ma me shaamaa, ti ta deet shwal ye limmaa ka longku shuuro kan me an-shuranni. ⁴² Longku ne kan kpiyam, pene mai minno gwaangum; Ne kan isshi-fok, pene mai minno we sheyanim; ⁴³ Nei bino, pene mai riin ka nem, gun vire, pene mai dauno lannam, bangum kan ti ta mina muruk, pene mai jooro kuunom.' ⁴⁴ "Nang shinui ta lignani ya, 'Fo-mina, wo dimin min weyaa shikkok kan kpiyam, koo isshi-fok, koo bino, koo gun vire, koo bangum, koo ti ta mina muruk, kan minui waraa kaa bang shikkomi?' ⁴⁵ Nang shii ta lignani in tewon ti shinui ya, 'Ne ta teuma yen kulli, wee mai yuuru ti dok shakki me nyitti tem, mai yuurunom.' ⁴⁶ Shurme te ta waranii ta kelmo po-ding, pene me dob waranii ta kerang po-ding."