¹ Yeesho in perennin ti ta mina Yammai kan ti ku kooni. Me an yiu-shubetni in waru shiknii kulang shinui in shuklon shik digyan mina Yamma. ² Pene shii in lignon ti shinui ya,"Ma ti we shik ween shurme te ding ya? Kulli ne ta teuma, koo shiila dok a ta wesshani ti kuuno shatto a raamo bim." ³ Kaa ye shii diyaani ti ku Sheela Jaitun, me an yiu-shubet in waru shiknii ku-jalju in tewi ya, "Teumu, ween shurme te ta yooroi dimin? Pene teman-pi waranko kan she wiilan ku-buki?" ⁴ Yeesho in liginna kan in tewi ya, "Ma jooro kpang ye ado niyo ta shalma doo mam. ⁵ Longku gbe ta waru ti ta shommono. Shinui in ti tewi ya, 'Nei Kiriti.' kan shinui ta shal-do memme gbe. ⁶ Ma ta yaaro pi gei-ge kan shinnyi gei-gei. Mo poshaari ma shokrorom, longku yikka ti gbare-do in yooro kaa te, pene wiilani tidai yum. ⁷ Longku buk ta illo shabbi kan manni buki, kan po-ya-gub shabbi kan po ya-gub. Ta yuyyo kpiyam kan midiro-shik-buk ti piri gbe, ⁸ Pene ween shurme tei bara liyan gun pari pera waani. ⁹ Nang shinui ta liima taa-shilib kan ta tukma. Ta kurama ka ta ku-buk ding longku shommono. ¹⁰ Nang gbeju ta ya kulnya, kan min shaayi kan in kura shaayi. ¹¹ Me an-pigra shaba gbe ta illiru in shal-do memme gbe. ¹² Longku kurayiu bi shoro ta tokko shaariro, lewan peddi ta kuwaro. ¹³ Pene maa mo shasshaa we war wiilani ta kauro shii. ¹⁴ Shinnyi yen kpang ti ku po ya-gub te, ta shuppani ti koo tong ti ku-buk ka longku jimro ti me ti ku-buk te. Nang po wiilani in tang waru. ¹⁵ "Longkuuno te, mam maa weyaa shik gbong we-doon kan we kunne, ye Daaniyel an-pigra sheeraa piri, shengrii ti piree shaana" (shero mo an maari peno), ¹⁶ "Shero mo me ti Yawuudiya mo juwaju we ammo ku sheela, ¹⁷ shero mo shii ti ku daala-ku-mina shaarui shar manni wei ti ta minaim, ¹⁸ kan shi mo ti doong tewo ya shi ta shirui shar lanna-kawonim. ¹⁹ Pene dogii she me shinui kan uuju kan me ti ku min wiri ti dum ti ta darang teere! ²⁰ Ma for-fok yoo koddi yoba ma in yooro koddi viyo koo Darang Nessho Yawudaawa. ²¹ Longku ta yuyyo gbidina taa-shilib, kaa mei nau yuyyanim we tangna ti liyan gun ku-buk we foottu booi, onngoo, kan a ta yooro birangum. ²² Modaa kuma ye kuuga peddi darang shurmem, daa a doo lo-shik ye ta kauranim. Pene ka longku me shakkaa tenei ye kuugan peddi darang shurme. ²³ Nang ma mondok maa teka ma ya, 'Gee Kiriti wono!' koo, 'Gee Kiriti won!' mo ma kumum. ²⁴ Longku me an-shaba Kiriti kan me an-shaba an-pigra ta wanguttu in yuyyo gbidina we temo kan maam, longku shal-do, maa ta dum yooro koo me shakkaai. ²⁵ Ma gee, Ne teka ma ye tida koddii yum. ²⁶ Longkuuno te, ma shinui maa teka ma ya, 'Gee, shii ti ta shwee,' mo ma pero tita shweem. Koo, 'Gee, shii ti ta nangshakki gume,' mo ma kumum. ²⁷ Longku kaa ye maljo ti maljiru ti booli kan in aara we war ta vuro, kaa te ye La Niyo ta warin. ²⁸ Piree kan kuma we-ta-gun, ti po teerei ye shelle ti galin. ²⁹ "Pene kpantid ka bi taa-shilib darang shurme te, darang ta yooro dil, tere a ta shallanim, arshal ta shugiyyu ti ku dingling ku-dang, kan kumen-kumen ku-dang ta yikro shiki. ³⁰ Nang temo La Niyo ta peru ti dingling ku-dang, kan po-peen ding me ti ku-buk ding ta bau kenni. Shinui ta we shik La Niyo ti ku waru ti ta shungu dingling ku-ga kan kumen kan gbong shokran. ³¹ Shii ta shur me an shuranni ka bang ele adununu, kan shinui in gallu-do me shaKkaa ti bwattan ku-buk peereu. we yikka ti kpakan-fok dingling ku-dangno lee we war yen dok. ³² "Ma shubet ti biro dugni. Ma fungai maa yikka paaro kuuro alawi in yiu moottu, ma peno koddi sha buk nemna. ³³ Kaa te, mam maa weyaa shik ween shurme te ding, ma ta penani shii yuuna nimmi, ti dob-dob podangi. ³⁴ Kulli ne ta teuma, ku-kira te a ta wiilajum, nang bara ween shurme te ding yuunaro. ³⁵ Ku-dang kan ku-buk ta wiilaju, pene paarono a ta wiilanim. ³⁶ Pene ti ku ye kan paaro darang kan koddim, teere adoo mo penaam, koo me an shuran ku-dang, koo Lai, pene bara Fowii. ³⁷ Kaa ye ti ta koddino Nubu, ta yoo kaa te ta meyan La Niyo. ³⁸ Longku ti ta koddi teere ye gbong paali doo in tang waru, memme ti ku shaani kan shyani, yuyyo diyaa kan mibno diyaa, we war koddi ye Nubu riyaan ta gongi doo yen gba. ³⁹ Kan ye shinui a peno wee ta waraa yoorom we war koddi gbong paali doo wannan in pal shinui ding won. Teerei ye ta yoon ten ti ta koddi meyan La Niyo. ⁴⁰ Nang shwiji palau ti doong, ta shar dok in wessho dok. ⁴¹ Shereb palau ti ku issho-we ti ku vin, ta shar ye dok in wessho ye dok. ⁴² "Longkuuno te, ma yu geren bang, longku mai peno darang ye Fo-mina ma ta warinum. ⁴³ Pene ma peno te, moda an-ku mina daa penaa koddi yippa ye an-jiri ta warin, shii daa diyaa ta ya geren kan daa wessho in vubro minanim. ⁴⁴ Longkuuno te, ma sheema yikka ma ti gbare-do man limma shik ma, longku La Niyo ta waru ti ta koddi ye mai nyimmom. ⁴⁵ "Longku wo shook nong kan bang lishaari ye fo-minani maa liyaa ka we gee dogi shookni ta minani ye shii minin weshiina ti ta dob-dob koddiroi? ⁴⁶ Kapgi ta yooro ti ku shook teere ye fo-minai maa shinna in wa we shii ti ku yaani kaa te. ⁴⁷ Ne ta teu ma yen kulli, fo-minai ta li shii ti ku we-kirani ding. ⁴⁸ Pene pelle shook teerei an-shek in ti tewi ti kuuni ya, 'Fo-minano ta diiru bak,' ⁴⁹ nang shii in yiu bibro shik dogi me-shaani shooki kan in ti sha kan she kan me an-sheyyo-we. ⁵⁰ Nang fo-mina shook shurme ta shiru ti ta darang ye shii a nyimmo shiwannim kan ti ta koddi ye shii a penom. ⁵¹ Fo-minanii ta petto taani nyit-nyit kan in minin po diya ti shii ti piree kan me an-wawo-ado, piree ta yuun kwi kan ar wuro.