¹ Kaa ye Yeesho ti po kooni, in we shik manni niyoi patta shii anfugum. ² Me an yiu shubetni in ya telyo, "An-shubet, yuwa shasshalawi nong, lamoi ya koo ma fowonnii, ye patta shii anfugumi?" ³ Yeeshon liginno, "A shim, koo mafowonnim, yuwai longku shuranno Yamma in yoro ti piree kan shii. ⁴ Min ta yaani shuranno mo shunnano tidang bambiri darang.Yippo ta waru yei doo mo ta dum ya shuranum. ⁵ Kaa ye tida ne ti kubuk, nei aaro kubuk." ⁶ Bara ye Shii teka ka we te, in fiya elet ti buk, in mutto buk ka elet, in shakin ti adoi. ⁷ In tewon ti shii, "koo, wa fuddo ti ta shakya Shiloyam" (ka ye ti tewi yaa "shuraa"). Nang lamoi in kooni, wa fuddina, in meru in ti we ta piri. ⁸ Me an ganglangni kan me milam ti we shii ti po bengo in ti tewi ya, "Tenei la mo ti diino in ti ya bengoi maa?" ⁹ Peddi ya, "wo shii." digi ya, "Ongngoo, pennai shaayi." nang shii in liginno, "Na nei po kuuno." ¹⁰ Shinui in tewon ti shii, "Pene adogo apparoi ka yaa?" ¹¹ In liginnon, "Niyo ye ti ka Yeesho mutta dokboh in shakno ti adono in tewno, 'war Shiloyam ken wa fuddon.' Nang nen wa fudduru, nen yiu we ta piri." ¹² In dewina ta shinui, "wo tong ta shii?" in liginon ta shii, "Nei penom." ¹³ Shinui in waru ka mo milami an-ugumi ti Parishawa. ¹⁴ Penei koddi nessho ye Yeesho buraa dokmoi in awin adoi. ¹⁵ Nang Parishawa in tel shii ka yee shii yikka we ta pirii. shii in liginno, "Liyano dokboh ti adono, nen fuddina, nen yiu we ta piri." ¹⁶ Peddi Parishawai in tewi ya, "Lamoo ye a warui ti jeleno Yammam, longku Shii a ti shor darang nesshom." Peddin tewi ya, "Ka yee niyo an shasshalau ta dum ya we maam ka tei?" Nang taajui in bwattoro palau. ¹⁷ Shinui in tel Anfugumi birang, "Kaa weni ti ku niyoi, ye aagako adogai?" Anfugumi in liginon, "Shii an-pigro." ¹⁸ Pene shin Yahuudawa a kum ya shii anfugum ye adoi apparom nang in yeeru ma fowonno mo appaa adoi. ¹⁹ In tel ma fowi ta shinui, "Tenei laama maa ya patta shii fugumi ya? pene ti we ta piri wendei ka yaa?" ²⁰ Nang ma fowi in liginnon ti shinui, "Min penaa tenei laamu pattaa shii anfugum. ²¹ ka ye yikka we ta piri, minaa penom, kan mo appaa adoi, minaa penom. Ma telo shii, foraa niyo. Ta sheero ma ka shikni." ²² Ma Fowoni teka we te, longku ta shi Yahuudawa. Longku Yahuudawa kunga ya ding mo teka ya shii Kiriti, ta for shii ti ta mina-abo. ²³ Longkuno te, ma fowoni ya,"Shii foraa niyo, ma telo shii." ²⁴ Nang Parishawa in tel shii an palawi, "Min gbe ti Yamma. Min penaa lamoo yei an shasshalau." ²⁵ nang shwiji mo in dewina, "Nei peno koo shii an shasshalawum. We dok yeno penaa: Nei anfugum, wende nen ti we ta piri." ²⁶ Nang shinui in tewon ti shii, "Yuwa kei wen ta shii? appako adogoi ka yaa?" ²⁷ In liginon, "Ne fuwa po tewma, mai yaaronom! longku wen ma leka nen tewma birangi? Ma leka shiwoma me an yiu shubetni birang ya? ²⁸ Shinui in ukkon ding paaro ya, "An yiu shubetni ke, mini an yiu shubetno Muuja, ²⁹ min penaa Yamma yuuna paaro ti Muuja, pene minaa peno piree laamoo wannanum." ³⁰ Swhiji mo in liginno, "Tenei we maam boi, maa mai peno pirinnee shii wannanum, pene in awno adono. ³¹ Ma penaa Yammai ti yaaro an ya shasshalawum, pene mo yikka biini kpang in ya we ye shii leka ti yaaro shurme. ³² Ti liyan gun kubuk a doo mo naka yaaro pi awan ado an fugumum. ³³ Lamoo ma warui ti shikno Yammam, a ta dum ya koo wem." In liginno ta shinui ya, ³⁴ "Pattakoi ti ta shasshalau, ken ti lew yumu shubet ya?" Nang in kairu biinii ti ta minai. ³⁵ Yeeshon yaaro guni ya kaina shii ti ta mina-abo. In we shiknii in tewon ya, "Ke kunnga kan la niyo ya?" ³⁶ In dewina ya, "Shii nong, Fo-mina, longku nen kumi kan shii?" ³⁷ Yeeshon tewon ti shii, "Ke weya shiknii, shii mo ti ku yuuko paaro wendei." ³⁸ Shwiji mo ya, "Fo-mina, ne kunnga," nang shii in wau Yeesho. ³⁹ Yeesho ya, "Longku shoro yene rina kubuk longku me ti we shik we in yoju fugum." ⁴⁰ Peddi Parishawa me ka shaayi in yaaro paaronii nang in ya tel shii, "Min maa mini an fugum ya?" ⁴¹ Yeeshon liginon ti shinui, "Moda ma da fumoni, ma da kan shasshalawum, pene wende ma teka, 'Min ti we,' nang shasshalauman deero ka guni."