¹ Yeeshon ammoni ku sheela Olif. ² Kan vupnoi in wanni ta mina-abo birang, memmei dind in wakuntu; in sheeni po diyo in shuppon shinui. ³ Me-an-ya-balla kan Parishawa in waru ka poomun ye yinna ti ku ya shomak. Nang in li tei ti shakki. ⁴ Nanag in tewon ti shii, "An-shubet, yikka poomun ye ti ku ya shomak. ⁵ Wende ti ta shoro, Muuja teka ya mo kpailo peen niyo te; ke ta tewani ti kuurei?" ⁶ Shinui teka we tei longku yiu shoi longku in we we kpakyo shii, Pene Yeesho in gbol kuuni ti buk in ya balla ka po kirani ti buk. ⁷ Kaa ye shinui shuwan toom ka tenglo shii, in illo shikni in tewon ti shinui, "Mo ti shakkima yei kan shasshalawum, mo tang kpaalo sheela an toom ti tei." ⁸ Birang in junoni, in ya balla ti buk ka po kirani. ⁹ Bara ye yaara ta shinui, in yiu illoju ka dok dok, liya guni mon gboi. Ka bi ding in wessho Yeesho shi dokni, kan poomuni ye sheeri ti shakkii. ¹⁰ Yeeshon illo shikni in tewon ti tei, "poomun, me an paaroji tong? A doo mo kpaalaji maa?" ¹¹ In dewina ta tei ya, "A doo niyom, ta Fo-mina." Yeeshon tewon, "Ne maa naa kpailojim, koo moji yu shasshalau birangum"] ¹² Birang Yeeshon yuun paaro ti shinui,ya, "Ne aaro kubuk; mo yikka biino a ta ya mere ti ta dilum pene ta we aaro kerang." ¹³ Parishawa in tewonti shii ya, "Ke ti ya paaro kuko ka shikko; paaro koi yen kullim." ¹⁴ Yeehon liginno, "Ma nei jimraa fokno, jimronoi yen kulli. Ne penaa piree ne pennaa kan piree ne ta warin, pene mai peno pirinnee ne pennan koo piree ne ta warani. ¹⁵ Shiiro shemai peen she lo-shik; Ne ti shiiro niyom. ¹⁶ Pene mana yuwa shiiro, shiiro nei yen kulli longku a ne doknom, ne sheeri kan Fowi mo shunnano. ¹⁷ Oo,ti ta shoroma balli ya jimro niyo palawi yen kulli. ¹⁸ Nei an jimro fokno ka shikno, an palau anjimro foknoi Fowi mo shunnano." ¹⁹ Nang shinui in tel shii,"Foko tei tong?" Yeeshon liginno, "Mai pennom koo fonnom; mo da ma daa penano, ma daa penaa Fono birang." ²⁰ Shii yuwa paaro te ti po gal kine koddi ye ta ya shubet ti ta mina-abo, nang a doo mo yikka shiim longku koddini tidang a yum. ²¹ Birang Yeesho in tewon ti shinui, "Ne ta koono; ma ta gassho biino man muri ti ta shasshalauma. Pirinnee ne warani, ma ta dum waranim." ²² Yahuudawa in tewi ya, "Shii ta tuk kuuni ya? kaa ye teka, 'Pirinnee ne ta warani ma ta dum waranim'?" ²³ Yeeshon tewon ti shinui, "Mai me ti kubuk; Ne shaanai ti kudang. Mai she kubuk; Nei niyo kubukum. ²⁴ Longkuno te, Ne ta teuma ma ta muttani ti ta shasshalauma. Mam maa kum NEI SHIM, ma ta muttani kan shasshalauma." ²⁵ Shinui in ya telyo, "Kei nong?" Yeeshon liginno, "Wee ne teka ma ka toom. ²⁶ Ne kan we gbe yene po tewani kan shiire ti kuma.Pene mo shunnanoi mo dob; wene ne yaanan ti foki, tene wee ne ti tewi ti kubuk." ²⁷ A peno ta shinui shii ta yaani paarono Fowi Yamma. ²⁸ Yeeshon tewi ya,"Mamaa shokra la niyon-ding, koddii ma ta penani NEI SHII, ne ti ya wei po kuuno. Kaa ye Fowi shuppanen, nen ti tewi tei. ²⁹ Mo shunnanoi kaji ka shaayi, a wesshono ne doknom, longku nee ye koo dimin ne ti ya leka ta shii." ³⁰ Kaa ye shii ti ku sheero we te, memme gbe in kumi kan shii. ³¹ Yeeshon tewi ti Yahuudawa me kunga kan shi,"Ma maa sheera ma ti ku paarono, mai me an yiu shubetno yen kulli; ³² ma ta pen ween-kulli, ween-kulli in lima man yoma pokuuma." ³³ In liginno ta shinui, "Mini an sheeno Ibiraayim mini yu shook niyon waanim; ke ta tang tewani, 'ma ta yoma po kuumai ka yaa'?" ³⁴ Yeeshon dewina, "Yen kulli, ne teka ma, mo yuwa shasshalau ding shii shook shasshalau. ³⁵ Shook a ti diino po-ding ti ta minam; lai ti diino po-ding. ³⁶ Pene, Lai ma foranken kira, yen kulli ke ta yooko po kuuko. ³⁷ Ne penaa mai po peenno Ibiraaayim; ma ta gassho tukno longku paaronoi sha ta aamam. ³⁸ Ne ti tewi we ne wenaa ti jeleno Fonno, man ti yai wene ma ti yaanna ti fokno foma." ³⁹ In liginno ta shinui, "Fomii Ibiraayim." Yeeshon tewon ti shinui, "mo daa mai shibono Ibiraayim, ma ta ya shuranno Ibiraayim. ⁴⁰ Pene, wende ma leka tukno, niyo ye teka ma paaron kulli yene yaanna ti fokno Yamma. Ibiraayimi yu wetem. ⁴¹ Ma yuwai shuranno foma." shinui in liginno, "A pattomu ti ta shomakum; fomu dok: Yamma." ⁴² Yeeshon dewina, "Mo da Yamma daa Foma, ma daa lekano, longku ne wannai ti jeleno Yamma gee no wono; nei warui longkunom, pene shii shunnano. Longku wen mai kum kan paaronom mi? ⁴³ longku mai yaaro paaroim. ⁴⁴ Mai sheeno Foma, shuuro, ma leka ya wene ye teka ma ta Foma. Shii an tukyo-tukyo ti liyan guni a ti sheeri ti po wen kullim longku a doo wen kpang ti taaniim. Ma appaa shaba, ti tewi wene ti ta aani longku shii an shaba kan fo me an shaba. ⁴⁵ Pene, longku ye no teka paaron kulli, mai kumu kan nem. ⁴⁶ Weyano kan shasshalauwi nong ti taamai? mana teka paaron kulli, ma ta kumanim mi ka yaa? ⁴⁷ moi sheeno Yamma ti yaaro paaro Yamma; ma ti yaannam longkui mai sheeno Yammam." ⁴⁸ Yahuudawa in liginnon ti shii, "Mina tewo kulli minu ya kai niyo Shammariya mo kan shuuro ti kuuni maa?" ⁴⁹ Yeeshon liginno, "Nei kan shuurom, ne ti mini gbe ti Fonno, ma ti minno gbem. ⁵⁰ Ne ti gassho gbe ti kuunom; ka mo ti gasshina in ti ya shoroi. ⁵¹ Yen kulli, ne teka ma, mo yikka paarono, a ta we murom." ⁵² Yahuudawa in tewon ti shii, "Wende min penaa ke kan shuuro. Ibiraayim kan me an-pigro muttoju; ken ti tewi, 'mo yaara paarono, a ta nau murom.' ⁵³ Ke kpiro Ibiraayim ye murai ya? me an-pigro muttaa. Ke shigon kuukei wen?" ⁵⁴ Yeeshon dewina, "mana shokra kuuno, shokran kuunoi waani; ti shokronoi Fonno, ta ye ma teka ma ya Fommai. ⁵⁵ Mai peno shiim, pene ne penaa shii.mana teka na, 'nei peno shiim,' ne ta yono ka ma, an shaba. Pene, ne penaa shii nen ti yiu paaroni. ⁵⁶ Foma ta Ibiraayim yuwa bere ye weya darangno; weya ta shii in ya bere." ⁵⁷ Yahuudawa in tewon ti Shii, "Kei foro sheno naa-fuwat dakum, kako weya shikno Ibiraayim wee?" ⁵⁸ Yeeshon tewon ti shinui, " Yen kulli, ne teka ma, in tang patto Ibiraayim, NE ka ne." ⁵⁹ Nang shinui in yiu wokro sheela ka we kpailo Shii, Nang Yeeshon latto shikni in perennin ta mina-aboi.