¹ Ka biino te Yeeshon yuyyo memmere ti Galili, longku a lewo ri Judiyam longku Yahuudawa leka gassho po tuk shii. ² Koddi temre Tam we Yahuudawa nemna. ³ Ma molonii in tewon ti shii, "Wessho po te ken warko Judiya, longku me an yiushubetko in we shik shuran ye ki ta ya. ⁴ A doo mo ti ya we ka lattom shii ma leka in penni. Ma ka yuwa we te , shuk kuuko ti memme kubuk." ⁵ Koo ma molonni a kum kan shiim. ⁶ Nang Yeeshon tewon ti shinui, " Dang koddinoi yum, pene dimini koddima. ⁷ Kubukki ta kuramam, pene kurano longku ye ne teka na shuranroi shek. ⁸ Ma koo ammo po temrei; Ne ta ammani dangum tidang koddinei yum." ⁹ Ka bi ye teka we te ti shinui, in deeni ti Galili. ¹⁰ Bara ye ma molonii kooka ammo po temrei, shii in koo ammani, a shuk kuunim paddai shikni. ¹¹ Yahuudawan ti gassho bi ti po temrei ya, "Wo tong ta shii?" ¹² Ka pappaaro gbe ti kuunii ti shakki jimoi. Peddi ya, "shii niyon kpang." Digin ti tewi, "Ongngoo, shii dokka memme." ¹³ Pene a doo mo pennan pewe ka paaroim longku shi Yahuudawa. ¹⁴ Pene bara ye temrei wara nangshakkii, Yeeshon war ta mina-abo in yiu ya shubet. ¹⁵ Nang Yahuudawa in ya maam, in ti tewi,"La moo penaa we gbei ka yee? in yiu shubet ta shiim mi." ¹⁶ Yeeshon liginon ti shinui, "Shubetnoi wenom, penei weno mo shunnano. ¹⁷ Ma mo shaka ya we Yamma leka, shii ta pen paaro shubet te, koo pennai ti jeleno Yamma, koo ne yuwai paaro kuuno. ¹⁸ Mo yuuwai paaro kuuni ti gasshinai ya gbeni, pene mo ti gasshinai gbe ti mo shuraani, moonshurmei mon kpang, a don we shaba ti taaniim. ¹⁹ Muujai min ma shiirei maa? pene a doo mo yikka bi shiireim. longku wen ye ma leka tuknoi?" jimo memmei in liginno dik, ²⁰ "Ka sheebuk ti shikko.Leka tukkoi nong?" ²¹ Yeeshon liginon ti shinui, "Ne yuwa shuran dok, man ya maam longkwi. ²² Muuja minama kar kuwo (a ya wei penna ti kirano Muujam, penei ti kira me fwiji), nang darang nessho man kar kuwo niyo. ²³ Mundok ma kara kuwoni darang nessho longku mai lewo bel shiireno Muujam, penei ka yaa ma daklaa ta aama kan nei ka yeno tassha pira darang nesshoi? ²⁴ Ma wejo li kelmo longku we ma ti we shikkii, nang ma shiiro yen kpang." ²⁵ Peddi me wanna ti Urshalima in tewi ya, "Tenei la mo leka tukani ta shinui maa? ²⁶ Gee, in ti diilo paaro, shinui a yuun koo paaro ti shiim. Menom me an toomi a peno ya tenei Kiritim,kullee? ²⁷ Pene kama penaa pirinnee la moo pennan. Pene Kiritii ma wanna, a doo mo ta pen pirinnee ye wannanum." ²⁸ Nang Yeeshon shokro elleni ti mina-aboi, in ti shubet ya, "Ma ding ma penano kan pirinnee ye ne pennan. Ne waru ka po kuunom, pene mo shunnanoi mon kpang, mai peno shiim. ²⁹ Ne penaa shii longku ne pennani ti jelei shunnano ta shii." ³⁰ Leka yiu shii ta shinui pene a doo ma liyan kira ti kuuniim longku tidang koddinii yum. ³¹ Nang memme gbe ti ta jimoi in kumi kan shii, in ta shinui, "Kiriti ma foonna, tadum ya we ye la moo yuwai ya?" ³² Parishawa in ti yaaro shibo pappaaro te ti kuuno Yeesho, nang an toom me an-pigro kan Parishawa in shur me an geren ku mina-abo mo yiru shii. ³³ Yeesho nang in tewi, "Bambirno ti jelema we war koddi lawiu,nen tang meno jele mo shunnano. ³⁴ Ma ta gassho biino ma ta weenom; piree na warani, ma ta dum waranim." ³⁵ Nang Yahuudawa in ya paaro ti shaayi, "La moo te ta warni tong ya kamai ta wenim mi? Ta wanni jele me kpailii ti shakki Greek in ti yuun shubet ya? ³⁶ Wo paaro wen kaa tei ye teka ta shii, 'ma ta gassho biino ma ta wenom; piree na warani, ma ta dum waranim'?" ³⁷ Nang darang witto po temrei ding, Yeeshon illina in shokro eleni,in tewi ya,"Mo kan isshi fok, mo waru shikno mo sho. ³⁸ Mo kunnga kan ne, ka ye balili teka, shiruk doo ye kan kerang ta perin ti ta vungkulii." ³⁹ Pene in teu weyye ti ku Shoom, ye me kunnga ka shi ta weyani; A minnu Shoomi tidangum longku tidang Yeeshoi wa shokrom. ⁴⁰ Peddi memme, bara ye yaara paaro te, ya,"Yen kulli tenei an-pigroi." digi ya, " Tenei Kiritii." ⁴¹ pene peddi ya, "Kiriti ta peru ti Galili ya? ⁴² A balloro ma ya Kiriti ta perui ti ta minano Dauda ti Baitalami, gog mina ye Dauda deen maa?" ⁴³ Nang ta memmen bwattoro longkunii. ⁴⁴ Peddi na yikka shii, pene a doo mo shoka kirani ka wo yiu shiim. ⁴⁵ Nang me an geren me in meru shik mo gbo An-pigroi kan Parishawa, me tekan ti shinui,"Longku wen ma warin ka shiim mi?" ⁴⁶ Me an gereni liginno, "A doo mo penaa paaro ka tem." ⁴⁷ Parishawa dewon ti shinui, "Ma maa dokkama dooma da? ⁴⁸ Ka mo an toom mo kunnga kan shii da, koo Parishawa? ⁴⁹ nang memme te mei peno shiirem, kan shaaman ti kuuju." ⁵⁰ Nikidimu (mo ti shakki Parishawa, mo naka war jeleni ka toom) tewon ti shinui, ⁵¹ "Shiiremu kama ti li kelmo ti ku niyo dang kei yaaro shiim ya?" ⁵² In liginno ta shinui ya, "Ke maa ke pennai ti Galili ya? Tenglo ken geena a don An-pigro ta peru ti Galilim." ⁵³ [Nang koo nong in wanni minani.