¹ Ka bi we te, Yeesho in teeleni aa-shiiruk Galili, ye ti ye ka shiiruk Tibeeriya. ² Jimo memme gbe in yiu biinii longku shinui weya shik we maam ye yuwa ti ku me an bau-shik. ³ Yeesho in ammoni ku sheela in deeni dii kan me an yiu shubetni. ⁴ (Koddii temre teelani, we Yahuudawa foonnaro.) ⁵ Bara ye Yeesho deera dooni in we shik jimo gbe ta waru shikni, in tewi ti Pilibush, "Kama ta pillu we-ta-kelei tong ye memme tei po shaanii?" ⁶ (Pene Yeesho yuwa telyoi we nau Pilibush, shii po kuuni penaa we po yaani.) ⁷ Pilibush in liginon ti shii, "We-ta-kele po shig-palau a ta foro koonong in we koo la wiwum." ⁸ mundok an yiu shubetnii, Andarawus, mollo Shimon Biiturush, in tewi ti Yessho, ⁹ " Ka la wono kan we-ta-kele fuuwat kan shirim palau, pene ta ya wen ti galan memme tei?" ¹⁰ Yeeshon dewina, "ma li memmei mo deeju dii." Ka shwee gbe ti po tere. nang memmei in deeju dii, pelle shin shig-shig sho naa-fuuwat ta gbeju. ¹¹ Nang Yeesho in shokro appan we-ta-kelei ka bi ye pammaa ti Yamma, in bwatton ti me deejeeyejui dii. In ya ka terei ti shirimi, ka ye leka ding ti shinui. ¹² Bara ye memmei kemreeju, Shii in tewi ti me an yiu shubetni,"Ma gal do digi buk-buk we ye diyo, longku a doo ye ta daklorom." ¹³ Nang in ganglo doi in kemro jungrong kpumu-gei-palau ta buk-buk we-ta-kele fuuwat ye memme shuwai. ¹⁴ Nang, bara ye memme weya we ye yuwa te ta shii, in tewi ta shinui, " Yen kulli tenei An-pigro mo ta waru kubuki." ¹⁵ Bara ye Yeesho penaa leka lini gub ti kuuni ka bang, in meeni ku sheelai shi dokni. ¹⁶ Bara ye kiryippo yuwaa, me an yiu shubetni in shaaju ta shiiruk. ¹⁷ In reeju ta gong-doo, ta teeleju we war kapanaawum. Koddii ta piri yippaaro, tidang Yeeshoi waru footu shikjuim. ¹⁸ Pirit yen bang in ti koona, shiiruki in ti middo shikro kping. ¹⁹ Bara ye shinui keyaa dooi po stadia naa-palau-kan-fuuwat we war naa-tat, in we Yeesho ta yuuru mere ti ku doo in ti nemru shik gongi, shewon yiu shinui. ²⁰ Nang in tewon ti shinui, "Na ne! ma wejo ya shewoi." ²¹ Pene shinui in waraa kum shi ka we riru ta gongi, Nang kan wende-wendei gongi in kuman fororo pirinnee ta waraanii. ²² Pirbong, jimo me sheerin ti po awo shiiruki in jemilla digi bara gong-doo dok, Yeesho a ri tai kan me an yiu shubetnim bara jalju. ²³ Nang, ka peddi gong-dooi ye foonna ti Tiberiya nimmi kan piree ye shinui shuwan we shiina we-ta-kele ka bi ye Fo-mina pammaa ti Yammai. ²⁴ Bara ye jimoi jemlaa ya Yeesho kan me an yiu shubetni a doo shin po terem, shinui in reeju ta gong-doo in warju Kaparnaawum gassho biino Yeesho. ²⁵ Bara ye weya shii ti awa-shiruk, in tewon ti shii,"An-shubet, ke wanna po tei dimin?" ²⁶ Yeeshon liginno, ya, "Ne teka ma yen kulli, ma ta gassho biino, a longku ma weyaa we maamum, pene longku ma shuwaa appan we-ta-kele man kemroma. ²⁷ Ma wessho ya shuran longku wesshina ya ta dakloroi, pene ma yui longku wesshina ye ta diyoni po-ding ye la-niyo ta minma, longku Yamma an Fowi liyan jimroni ti kwi." ²⁸ Nang shinui in tel shii, "Min ta yaani wen, longku minin ya shuranno Yammai?" ²⁹ Yeeshon liginon ti shinui, "Tenei shuranno Yamma: Ya ma kumu kan moji shunna." ³⁰ Nang shinui in liginnon ti shii,"Ke ta yaani maam wen, longku minin kumi kankei? ke tayaani wen? ³¹ Ma fowonmu shuwa Manna ti ta swee, ka ye ballii, 'Minaan We-ta-kele ti shinui ti kudang mo shu.'" ³² Yeesho in tewon ti shinui, "Ne teka ma yen kulli, a Muuja ye minama we-ta-kele ti kudangum, penei fono ye minaa ma we-ta-kele yen kulli ti kudang. ³³ Longku we-ta-keleno Yamma shaanai ti kudang in min kerang ti kubuk." In liginnon ti shii ta shinui, ³⁴ "An-shubet, yiu minmu we-ta-kele te ko dimin." ³⁵ Nang Yeeshon tewon ti shinui, "Nei we-ta-kele kerang; mo wanna shikno a ta yaaro kpiyamum, mo kunga kan ne a ta ya isshi fokum. ³⁶ Pene ne teka ma kulli ma weya shikno, pene mai kumum. ³⁷ Mo fono minano ding ta waru shikno, nang mo wanna ding ne kai bim. ³⁸ Longku ne shaanai ti kudang, a longku nen ya we po kuunom, pene longku ye nen ya weno mo shunnano. ³⁹ Tenei we mo shunnaano leka, ya mono wejo ving koo niyo dok ti shakki moji minanoi, pene mono shokro shinui koddi illit kubuk. ⁴⁰ Tenei lewanno fono, ya konong mo weya shik lai in kumi kan shii ta we kerang po-ding birang ne ta shokro shii darang illit kubuk." ⁴¹ Nang Yahuudawan yiu kpanglo den kan shii longku teka ta shii, "Nei we-ta-kele ye shaana ti kudang." ⁴² Shinui in tewi, "Tene Yeesho laano Yushubu, mo min penaa fowi kan nonim ya? pene ta tewani wendei ka yaa, 'Ne shaanai ti kudangi'?" ⁴³ Yeeshon liginon in tewon ti shinui, "Ma wessho kpanglo den kan shaayi. ⁴⁴ A doo mo ta waru jelenom bara mo Fono ye shunnano yeena shii, nang ne ta shokro shii ti koddi illit kubuk. ⁴⁵ Ballii ti ta me An-pigro, 'Konong ta shuppo shii Yamma.' Konong mo yaara in pen we ti kirano Fonno ta waru jeleno. ⁴⁶ A paaro ya ka mo weya shik Fowiim, bara mo penna ti jeleno Yamma - mo weya shik Fowii. ⁴⁷ Ne teka ma yen kulli, mo kunga kan kerang po-ding. ⁴⁸ Nei we-ta-kele kerang. ⁴⁹ Ma fowonma shuwai Manna ti ta shwee, in muttoju. ⁵⁰ Tenei we-ta-kele ye shaana ti kudang, longku mundok ma shuwaa a ta muranim. ⁵¹ Nei we-ta-kele ye kan doi ye shaana ti kudang. Ma mo shuwaa peddi we-ta-kele ye, ta diyoni po-ding. We-ta-kele yene ta min mai lo-shikno ka we kerang kubuk." ⁵² Nang Yahuudawa in daklo ta aaju ka shaayi in yiu tebrani, "La mo ta tang min mu kama lo-shikni kaman shai ka yaa?" ⁵³ Nang Yeeshon tewon ti shinui, "Ne teka ma yen kulli, ma mai addo lo-shik la niyom man she dom niim, ma ta we kerang ti taamam. ⁵⁴ Mo addaa lo-shikno in she domno kan kerang po-ding, nang ne ta shokro shii darang illit. ⁵⁵ Longku lo-shiknoi wesshinan kulli, domnoi we shiiyani yen kulli. ⁵⁶ Mo addaa lo-shikno in she domno dii ta aano, ne ti taani. ⁵⁷ Kaa ye Fowi mo kan doi shunnano, ka yene dii longkuno an Fowi, nang mo addaano, shii ta diyoni longkuuno. ⁵⁸ Tenei we-ta-kele ye shaana ti kudang, a kaa ye ma fowon shuwa in muttoju. Mo shuwa we-ta-kele te ta diyoni po-ding." ⁵⁹ Pene Yeesho teka we te ti mina-abo koddinee ye ta yuun shubet ti Kaparnaawum. ⁶⁰ Nang gbe me an yiu shubetni me yaara we te in tewi ya, "Tenei shubet yen shilip; ta yiwani nong?" ⁶¹ Yeesho, longku penaa ta shii me an yiu shubetni ta mukko paaro ye, tewon ti shinui, "We te daklaa ma ta aama da? ⁶² Pene ma ta yaani ka yaa ma maa weyaa la niyo ta ammoni piree kan shii milami? ⁶³ Ti li kerangi shoom; lo-shikgii wenan dogum. Paaro ye ne yuwamai shoom, tei birangi kerang. ⁶⁴ Pene ka peddi ma mei kumum." Longku Yeesho penaa ti liyan guni mei ta kumanim kan me ta pilin ka shi. ⁶⁵ Shii in tewi, "Wo longku we tei yene teka na a don mo ta waru jelenom bara mo minan ta An-Fowi." ⁶⁶ Longkuno te, me an yiu shubetni gbe in kopyoju in kuroju yiu biinii. ⁶⁷ Nang Yeeshon tewon ti me kpumu-ge-palauwi, "Ma leka kooma shema da?" ⁶⁸ Shimon Biturush in dewina, "Fo-mina, min ta warani jeleno nong? ke kan paaro kerang po-ding, ⁶⁹ nang min kunga minin peni kai an shaanno Yamma." ⁷⁰ Yeeshon tewon ti shinui, "Shakka mai ne maa, ma kpumu-gei-palau, dok ti shakkimai shuuro?" ⁷¹ Nang ti yai paarono Yawuda laano Shimon Iskariyoti, wo shii, ti shakki kpumu-gei-palau, ye ta pilani ka Yeesho.