¹ Ka biino te ka temre Yahuudawa, Yeeshon ammo Urshalima. ² Wende ti Urshalima ti po dang dinnyi ka paali doo, ye ti yei ka Bethasda ti fo Aramaic, kan limyon tam fuuwat ti foki. ³ Me shikjui bangkum ti galin ti foki, Anfugum, kuulo, kuttin ti po terei ^{4 5} Ka manni niyoi yei bangkum po sheeno naa-tat kan pididou. ⁶ Bara ye Yeesho weyaa shiknii kuttiin ti po terei, birang penaa diyo bakk, in tewon ti shii, "Ke leka illoko ya?" ⁷ Mo an baushikki in liginno, "An shubet, nei kan niyonom mo ta showinnen ta dooim koddi ne ye ma lugro shik dooi. Mana illa, mondok in beeno." ⁸ Yeeshon tewon ti shii, "Illo shikko, shar we po shakloko, ken kona." ⁹ Kpantidi shwiji mon illoni, in shar we po shakloni in koni. Nang darang terei koddi nessho Yahuudawa. ¹⁰ Nang Yahuudawa in tewon ti mo lo-shiknii yuwa bangkii,"Booyii darang nessho a yu kpang ken shar iraukom." ¹¹ In dewina ta shii, "Mo niyon ka nei tekano 'shar irauko ken koko.'" ¹² Shinuii in tel shii, "Wo nong mo tekako ya, 'sharu ken konai'?" ¹³ Pene niyo ye weyaa bangshiknii a peno niyoim longku Yeesho fuwaa po kooni ka jeeri, longku ka memme gbe ti po tere. ¹⁴ Ka bi, Yeeshon wa we shii ti ta mina Yamma in tewon ti shii, "Gee, shikko yuwa bang! mogo yu shasshalau birangkum, longku wee yeka te weeko." ¹⁵ Swhiji mon kooni in wa tewi ti Yahuudawa mo neeyon ka shii Yeesho. ¹⁶ Longku ka te, Yahuudawa in yiu kpiiro Yeesho longku shii ti yuyyo we tei darang nesho Yahuudawa. ¹⁷ Yeeshon tewon ti shinui, "Fonno ti ku ya shuranni we war wende, ne po kuuno, maa, nen ti ya shuran." ¹⁸ Longkuuno te, Yahuudawa in gassho koko kping ka we tuk shii a bara ti ku au sho ti ku paaro darang nesshom, birang in ye Yamma ya fonni, in shiwon kuuni dob kan Yamma. ¹⁹ Yeeshon liginon ti shinui, "Yen kulli, lai a ta dum ya we po kuunim, bara we ye weyaa foni ti ya, we ye fowi ti ya, lai in ti yai terei. ²⁰ Longku fowi leka laani in ti shukin we ding ye shii ti ya, ta dum shukin we yen gbo ye yeka te longku man ya maam. ²¹ Longku kaa ye bara fowi Yamma ti shokro me muroju in minin kerang, lai ma ti min kerang ti ko nong ye leka ta shii. ²² Birang Fowi a ti shiiro niyom, mina paaro shiirei ti laani ²³ longku koo nong in min gbe ti lai ka ye ti minin gbe ti fowii. Moi ti min gbe ti laiim a ti minin ti fowii ye shunna shiim. ²⁴ Ne teka ma yen kulli, mo ti yaaro paarono in kumi kan mo shunnano kan kerang po-ding a ta ving shiim, pene teleni ti ku muroo in weni kerang. ²⁵ Ne teka ma yen kulli, koddi ta waru, wannaro wende, ye kuma niyo ta yaaro eleno laano Yamma, me yaara ding ta diyoni ²⁶ Kaa ye fowii kan kerang ti taani, kaa te shii kunga piri ti laani mo yooni kan kerang ti taani, ²⁷ an fowii minan ti lai kumenni mo yu shiire longkui shii la niyon-ding. ²⁸ Ma wessho ya maam ka tei, koddi ta waru ye me ti ta duwoju ta yaaro elenii ²⁹ in pepittu: me yuwa ween kpang ta illoju ti ta kerang, nang me yuwaa shek ta ya illit we war po shiire. ³⁰ Ka shikno a doo we ne ta dum yaanim. Kaa yene yaara, nen shiirro, shiironoi yen kpang longku ne ta gasshani leu kumennom penei kumenno mo shunnano. ³¹ Ma nei dikka kuuno ka shikno, dikkan kuunoi a yen kullim. ³² Ka manni niyoi ye ta dikkono kuuno, ne penaa dikko kuuno ye ta yaani yen kulli. ³³ Ma shuraa ti shikno Yuwaana, in dikkurui ku paaron kpang. ³⁴ Dikko ku ye ne ti wei a ti kira niyon-dingum. Ne teka we telongku na man we marku. ³⁵ Yuwaanai wulon deet ye ti aari in ti eena, man kumi ma ta ya bere ti ta aaranni koddi la-wiu. ³⁶ kan dikko ku kan gboi ye yeka sheeno Yuwaana, longku shuranno Fowi ye mnano ya no wilo, shuran yene ti po yaanii, dikka kuuno ya Fowi shunnano. ³⁷ An fowi ye shunnanoi dikkano kuuno. Mai nau yaaro eleniim koo we shikniim. ³⁸ A doo paaroni ti ta aamam, longku mai mun kumenma kan mo shunnaiim. ³⁹ Man ti sheu ta paaro Yamma maa ya kaare yaani ka tere ma ta we kerang po-ding, pene paaro dingti dikkinai kuuno, ⁴⁰ birang mai lewo waru jeleno man we kerangum. ⁴¹ Ne ti yiu beere dikko ti kira niyom, ⁴² longku ne penaa ma kan leu Yamma ti taamam. ⁴³ Ne wanna ti shoomono fonno, mai yiunom. mundok ma wanna ka shomoni po kuuni, ma ta yiu shii. ⁴⁴ Ma ta kumani ka yaa, ma me tiyiu dikko ku ti kira shaayi pene ma ti gassho ye ti waru ti kirano Yamma? ⁴⁵ Ma wejo nyimmani ne ta ya paaroma ti toom an Fowee. Mo ti ya paaromai Muuja, mo ma liyaan sheerima. ⁴⁶ Ma maa kunga kan Muuja, ma ta kumani kan ne, longku shii yuwa ballai ti kuuno. ⁴⁷ Ma mai kum kan ballanim, ma ta kum paaronoi ka yaa?"