¹ Wende Yeesho penaa Parishaawa yaara shi ti we me an yiu biini gbe shin ti ya yulma ye yeka sheno Yuwaana ² (Yeesho ti ya yulmai ka shiknim, ti yai me an yiu shubetni), ³ shii in wejo judea in meeni Galili birang. ⁴ Pene yikka shii ti gbare-do in yiwoni Samaria. ⁵ Nang in waru manni gog minai ti Samaria, ye ti yei ka Sychar, nimmi kan doong ye Yaakubu mina ti laani ta Yusubu. ⁶ Gido doono Yaakubu ti po tere. Yeesho baloni ti ku mere nang in deenin ti po gido dooi. Koddi ka pelle sheri darang. ⁷ Poomun Samariya in waraa kpe dob, Yeeshon yuun paaro ya, "Minno doo ne sho." ⁸ Longku me an shubetni worojui pil we shiina. ⁹ Nang poomun Samariyai in tewon ti shii, "Ta yoroi ka yaa kei, niyo Yahuudu, ken tello, ne yenei poomun Samariya, ne mingko we she?" A doo we taaka Yahudawa kan Samariyawam. ¹⁰ Yeeshon liginon ti tei ya, "Moda shi ta penaa kunngu no Yamma, kan mo teka ji, 'Minno doo she,' shi da tela shii, da minaji doo ye kan doi." ¹¹ Poomuni in liginno ya, "An shubet, ke kan we duwa dooim gido doi joori. Pene ke ta weru doo ye kan doi ti tong? ¹² Kei yeko fomu ta Yaakubum, mo minamu gido doim shii po kuni in she doi, kan shiboni kan we ta gunni?" ¹³ Yeeshon liginon ti tei, "Mo ding sheeyaa doo te ta yaaro isshi fok birang, ¹⁴ pene mo ta she doo yene ta minin a ta yaaro isshi fokum. nang, doo yene ta minin ti shii ta shiworo po-vol doo ti ta aanii, in ti shiittu we war kerang po-ding." ¹⁵ Poomunii in tewon ti shii, "An shubet, minno doo te longku ne ta yaaro isshi fokum ne ta waru po tei kpe doo birangkum." ¹⁶ Yeeshon liginnon ti tei, "Koo, yeeru mannaji, man meru po te." ¹⁷ Poomuni in dewina in tewon ti shii, "Nei kan mannanom." Yeeshon dewina,"Paaroji kpang yeji teka, 'nei kan mannanom,' ¹⁸ longku ye swiji kuji fuuwat, mo ma ka shaayi a mannajim. Wee shi tekai yen kulli." ¹⁹ Poomuni in tewon ti shii, "An shubet, ne geeka kei an pigro. ²⁰ Ma fowonmu ti wau Yamma ti ku sheela te, birang man ti tewi ma ya Urshalimai pirinne memme po yuun wawoi." ²¹ Yeeshon tewon ti tei, "Poomun, kumu kan ne, koddii ta waru ye ma ta wau Yamma a ti ku sheelaim koo Urshalimam. ²² Ma ti wauwi wene ye ma penom. Min ti wawi wene min penaa, longku markwi wannai ti shik Yahudaawa. ²³ Nang, koddi ta wary, foonnaro wendei, me an wauwo yen kulli ta wau Yammai ti ta Shoom kan yen kulli, Yamma ti lewi peenjui in yoju an wau ni. ²⁴ Yammai Shoom, me an wau shii mo yu ti ta shoom yen kulli." ²⁵ Poomuni in tewon ti shii, "Ne penaa an marku ta waru (mo ti ye Kiriti). Ma foonna, ta teumu wei ding." ²⁶ Yeeshon tewon ti tei, "Nei shii, mo ti yuuji paaro wendei." ²⁷ Nang ta koddi terei me an yiu shubetnii in meeruju. Wende in ti shangla ti po-sheeriju longku wen yeen ti ya paaro kan poomun yei, pene a don mo teka, "Ke lekai wenaam?" koo "Longku wen ka ta ya paaro kan tei?" ²⁸ Nang tei in wessho la diye dooi, in me tarang mina, in tewi ti memme, ²⁹ "Ma waru, ma gee niyo mo tekano wee na yuwa ding ti ta diyono. Tene menomi Kiriti, kullee?" ³⁰ In wejuru tarang mini in waru jelenii. ³¹ Ta koddii, me an yiu shubetnii in beng shii, ya, "An shubet, shu weshiina." ³² Nang in liginnon ti shinui, "Ne kan we shaani ye mai peno gunim." ³³ Birang me an yiu shubetnii in tewi ti shaayi, A don mo wannan ka weshiinam, wo nong?" ³⁴ Yeeshon liginon ti shinui, "Gwangnoi nen yai wee mo shunnano leka nen wiilo shurannii. ³⁵ Mai tewo ma ya, 'Digi tere peereu koddi kassho weshiina in ya maa'? Ne ta teuma, ma shokro do man gee kudam, niyoro foraa kasshani! ³⁶ Mo an kassho ti yiu weji shuranni in gal do weshiina we war kerang po-ding, longku mo an tobbani kan mo an kasshani in beere ka shaayi. ³⁷ Kaa ye ti tewi, 'mondok tobbaa, mannin kasshina,' yen kulli. ³⁸ Ne shuraama ka we kassho wee mai shurum, ma riyaa ta balaju." ³⁹ An gbe Shamaariyawa me ti po tere in kumi kan shii longku paaro poomun ye ti tewi, "Shii tekano wee ne yuwa ding ta diyono." ⁴⁰ Nang koddi ye Shamaariyawai wanna jelenii, ya pemo diyo ti jeleju, in diino ta shii po shaklo paalau. ⁴¹ Nang memme gbe in kumi kan shii longku paaroni ye tebraa. ⁴² In tewon ti poomuni, "Birang minii kumu longku paarojim, min yaara ka kumomu, minin peni kulli tene mo an marku kubuk ding." ⁴³ Ka bi shaklo paalawi, nang shii in illina in warni Galili. ⁴⁴ Longku Yeesho po kuuni sheera ya an pigro a ti we kumen ti gokminanim. ⁴⁵ Kaa ye shii foraa Galili, me ti Galilin yiu shii kpang. Shinui weena shik wee ye shii yuuna ding ta Urshalima koddi pewejui, shinui ma waraa po pewei. ⁴⁶ Birang shii in war Kaana ye ti Galili, pirinnee ye shigon doo yoro men. Kan manni mo gbo ta mina gub ye laani bangkum ti Kaparnaaum. ⁴⁷ Bara ye yaara ya Yeesho foonna Galili wanna ti Yahuudiya, shii in war jeleno Yeesho in beng shi mo wa tasho pira laani, ye yuwa nimmi muroni. ⁴⁸ Nang Yeeshon tewon ti shii,"Ma maa wa shik we temom, ma ti kumim." ⁴⁹ Mo an toom mo tewon ti shii ya, "An shubet, kooru wei yoo laano muroni." ⁵⁰ Yeeshon liginon, "koo. laako illoni." Lamoo in kumi ka paaro ye Yeesho tekani, in kooni. ⁵¹ Kaa ye shii ti ku gbolluni, shooknii in we shii, in tewon ya laani illoni. ⁵² Nang in tel shinui koddinee ye illanii. In tewon ti shii, "kpolo ti ta koddi an parlau ye pirai peranden ti shik lai." ⁵³ Nang fo lai in nyimmina wo ti ta koddi terei ye Yeeshon tekani, "Laako illoni." Nang shii po kuni kan ta minani ding in kumi. ⁵⁴ Tenei an palau maam ye Yeesho yuwa koddi ye penneni ti Yahuudiya we war Galili.