¹ Wende ka manni niyo parishaawai shommoni Nikidimu, an toom Yahudawa. ² La moo in waru jeleno Yeesho ka yippo in tewon ti shii ya, "An shubet, min penaa kei an shubet mo wanna ti shikno Yamma, longku a doo mo ta ya shuran maam ye ke ti yam maa doo Yamma ti shikno muyeem." ³ Yeeshon liginon ya, " Ne teka ko yen kulli, ma patto niyo birangkum, a ta kpadano Yammam." ⁴ Nikodimu in tewon ti shii ya, " Ta patto niyo biranghi ka yee ye fuwaa po koronii? A ta dum ri ta aano nonni in patto bim, ta yoraa?" ⁵ Yeeshon liginno," Ne teka ko yen kulli, ma patto mundok ka doo kan shoomum, a ta ri ta kpadano Yammam. ⁶ Wee ye pattaa ta lo-shikii lo-shik, ye pattaa ta shoomii shoom. ⁷ Wejo sharani ka jamo-jamoi ye ne teka ko, 'mo pattoko birangii.' ⁸ Pirit ti pittinei ti piree leka ta tei; ken ti yaaro elei, pene kei peno pirinee ye wannanum koo pirinee ye ta waranim. Ka te ti mo pattaa shii shoom." ⁹ Nikidimu in liginon ti shii, "Ta yoro kaa tei ka yaa?" ¹⁰ Yeeshon tewon, "Kei an shubet ti Israel maa, pene kei peno we te dingkum ya? ¹¹ Ne teka ko yen kulli, min ti tewii wenee ye min penaa, minin ti jiminnai wee min weya shikki. Ka tei mai kum kan jimromum. ¹² Manaa teka ma paaro we kubuk mai kumum, ma ta kumani ka yaa ye manaa teka mai paaro kudang? ¹³ A doo mo amma kudangkum bara mo shaana ti kudang - La niyo. ¹⁴ Kaa ye Muuja shokraa kuret ti ta shwee, kaa tei ta shokro la niyo ti kudang, ¹⁵ longku ding mo kunnga kan shii ta we kerang po-ding. ¹⁶ Longku Yamma leka kubuk, in minnu dok laani, ya ma mo kunnga kan shii a ta koon shwallum peneta we kerang po-ding. ¹⁷ Longku Yamma a shuru laani ti kubuk we shiiro kubukum, penei longku we marku kubuk. ¹⁸ Mo ding kunnga kan shii a shiiro shiim, pene ma moi kumukan shiim fuwaa po shiiro shii longku ne a kumu ka shommo laano Yammam. ¹⁹ Tenei paaro shirei:Aaro riina kubuk, memmen leweju dil tiku aaroi longku shuranjui shek. ²⁰ Mo ti ya shek ding a lewo aarom, a ti war pirinnee kan aarom, longku wo we shii ti yai peru pewe. ²¹ Pene, mo ti ya ween kpang ti war jele aaro longku memmen we shik wee ti yai ti taano Yamma ²² Ka biino te, Yeesho kan me an yiu shubetni in war kubuk Judea. Ti po terei in la shakilla kan shinui in ya yulma. ²³ Wende Yuwaana in ti ya yulma ti Aenon nimmi kan Salim longku ka doo gbe ti po tere. Memmen ti waru jelei inti yun yulma, ²⁴ longku tidang a ving Yuwaana ta mina murukum. ²⁵ Pene jiram in illina shakki peddi me an yiu shubet no Yuwaana kan manni la Yahudawai ti ku pewe waar shutto. ²⁶ In war shikno Yuwaana in tewon ya, "An shubet, la mo ma ka shaayi ti awa shiruk Jordan, mogo yuwan paaro ti kunii, gee, ti po ya yulma, memme ding ti warju jelei." ²⁷ Yuwaanan liginon,"La niyo a ta we wem maa minin ti shii ti kudangum. ²⁸ Ma po kuuma ma penaa ne teka, 'Nei Kiritiim,' pene,'shunnanoi ti toomnii.' ²⁹ La woorii weeno mo an diyoi. wende an jeerei mo sheeri in yaaro shii, twaalo po-sheerini longku eleno an diyoi. Tenei, pene, twaalan kebeno kenga. ³⁰ Shii ta yooni toom-toom nen ti yunno ka bi. ³¹ Mo shana ti ku dang ti ta kuno koonong. Mo ti kubuk wannai ti kubuk in ti yai paaro kubuk. Mo shana ti kudang ta ku we ding. ³² Shii ti tewi we ye wena in yaattu, pene a doo mo kunnga paaroniim. ³³ Mo yikka paaronii kunnga ya Yammai yen kulli. ³⁴ Longku mo Yamma shunnai ti yai paarono Yamma. Longku Yamma minan shoomi a kan belan po biroiim. ³⁵ Fowi leka laani in minin wei ding ti ta kirai. ³⁶ Mo kunnga kan lai kan kerang po-ding, pene moi kumu kan laiim a ta we shik kerangum, pene denno Yamma ta diyon ti kwi."