¹ माआ पावुहू तुमाहामने खुबूज जाआ शिक्षक व्याहा नाहा काहाक आपुहूल खुबूज मोडी शिक्षा (दौंड) वेरी इं तुमाहाल मालुम हाय. ² काहाका खुब गोठीम आपु बांदाजाआ चुकताहा केडो जाहा गोगुलाम चुकतो नेय वेरीताहा तो पुरो माआहु हाय. तो आपु बादो डील काेबजाम थोवा खातोर हिमंत हाय. ³ व्या आपु कोडों मुयाम लगाम पोवताहा का, तियाय आपु उनाया जोजे. आने तियापे आपु तिया बादा शरीराल वोलवुतेहे. ⁴ उड्याबी व्या, ते ओतेहे मोडे रेतेहे आने जाहाका मोडा वाराहाकी गोचालाय जातेहे पेण तो चालवुणाऱ्या सुकाणदारा मोजी रेहे एक हाना जेहे जोजे तेहे तियाल वालवा आवेहे ⁵ तिया होच जीब एक हाने अवयव हाय आने मोड्या गोठ्या केहे व्या हानी आगे कोतोहो मोडो जोंगोल सिलगावेहे ⁶ आने जीब एक आग हाय, एक खराब निती कोओ हाय. जीब इं बांदा अवयवाहाकी ऐहेकी हाय का, ती बादा शरीराल खराब केहे, सृष्टी नियमाल आग लावेहे आने नरका की सिलगावली ऐहेडी हाय. ⁷ काहाका हरऐक जाती जनावारे ने चिडे आणे डेडिपे होरकुणारे ने दोरीयाम रेणारे प्राणी काेबजाम केले जातेहे, आने माआहीबी काेबजाम केराम आलेहे. ⁸ पेण केडोबी माआहु आपु जीब काेबजाम राखी नाहा शकते. तीयुल रेवातोनाह ने दोगोदेणारी हायने, ती जिवलेणारी जेहराहाकी पोराली हाय. ⁹ आपु तियुज वापोर किईन परमेश्वार बाहाका धन्यवाद केतेहे, आने देवा रुपाहोच उबजावला माआहा तिज हाराप देहे. ¹⁰ एकुज मुयाहाकी स्तुती आने हाराप बारे निगताहा माआ पावुहू ऐअ गोठ्या ऐहेकी वेरा नाय जोजे. ¹¹ चिरफामेने ऐकुज मुयामेने मिठो पाआय ने कोडवो पाआयनिघे का? ¹² मा पावुहू, अंजीरा चाडो जैतुना फोल दि का? नेता दाराक्षा वेल अंजिर दि का? तेहेकीज खारा पाआयामेने मिठो पाआय निगणारो नाय. खोटो आने खेरो इया ज्ञान ¹³ तुमाम ज्ञानी ने होमजुनारो केडो हाय? तियाय हाऱ्या वागुलापने ज्ञानीपणाम सौग्यताम आपु सोताहा हारी चाली रितीकी देखावा ¹⁴ पेन तुमा मोनाम कोडव्या मोनामेने इच्छा आने सोताहा फायदो ऐहेकी वेरीताहा सत्याविरुध्द अभिमान (सोताहालमोडो होतजुलो) देखावीन खोटो गोगाहा नाहा. ¹⁵ ज्ञानीपण उच्चेने आवतो नाही ते तोरतीपने, जीवधारीस सभावा ने पुथा हिने रेतेहे ¹⁶ काहका मोनामने इच्छा आने सोताहान मोडोपण हाय तिही रवागावागा ने ऐकएक खोटी गोठ रेहे. ¹⁷ पेण जो ज्ञानीपणे उंचेने आवेहे तो पेअला चोखो तियाहोच शांतीशील, सहनशील रेतेहे ते दोयाकी ने हाऱ्या फोलाहाकी पोराले रेतेहे, ते भेदभाव नय केणारे निर्दोष रेतेहे ¹⁸ आने शांती केणारा खातोर नितीमत्वरुपी फल देणारो बीयारो शांतीम पोराय जाते हे.