¹ पावुहू,सेवट आमा तुमाहाल विनंती किईहु ने प्रभु येशुमे हिकवुतो का केल्याबी वागुलामे देवाल खुश केरा जोजे, इ तुमाही आमाहापेने उनाय लेदो, हो ने तुमा तिया होच चालता हा, तीयामे तुमा , खुबखुब वादतो रा जोजे. ² काहाका प्रभु येशू वोतीकी केल्या केल्या आज्ञा आमाही तुमाहाल देधा ते तुमाहा मालुम हाय. ³ काहाका देवा इच्छा इ हाय का, तुमा पवित्र करण वेरा जोजे, म्हणजे तुमा जारकर्माहीने दुर रा जोजे ⁴ आने तुमाहामेने एकएकाल होमजा जोजे का जियाय तियाय आपु हिलाल पवित्रतेहेकी ने मानपाना मोनाहाकी आपु होपाय केहेकी जा जोजे. ⁵ देवाल नेय ओखणारे बिहीरा होचे वासना लोभाकी केरा नेय जोजे ⁶ एघाये गोठ्या उनखालीन आपु पावुहू गैरफायदो ल्याहामा काहाका प्रभु इया बाद्दी गोठीबोदलाम शिक्षा केणारो हाय, इ आमाही तुमाहाल आगलाज आखलो हाय ने हारकी आखतो आथो. ⁷ काहाका देवाय आपुहून खराब गोठी खातोरनाहा ता पवित्रता केता हादलो हाय ⁸ तियाहाल जो केडो नाकार केहे तो माआहा नाहा ताहा तुमाहाल आपुल पवित्र आत्मा देणारा देवा इ नाकार केतेहे. ⁹ पावुहू प्रेमा बाबत आमा तुमाहाला लिखा जोजे इया तुमाहाल गोरज नाहा काहाका एक बिहीरापे प्रिती केरा जोजे, ऐहेकी तुमाहाल देवायज हिकवुलो हाय. ¹⁰ आने बांद्दो मासेदोनिमने बांद्दो पावुहूपे तुमा ता केतेहे रिहा तेबी पावुहू आमा तुमाहाल हिकवुताहा का तो वाद वादुज केराजोजे ¹¹ आमाहाय तुमाहाल आज्ञा केएयाहोच शांतीकी ऱ्याहा आपु आपु कांमाधंदो केरूलो आने आथाहाकी काम केरूलो इया आवड तुमाहाल रा जोजे. ¹² बारेने लोकाहाआरी शांतीहीकी खुलो केहेडाज गोरोज पोडा नाय जोजे. ¹³ पेन पावुहू मा इच्छा नाहा का जे मोअय गियेहे तियाबोद्दल तुमा आजोणे रा जोजे, काहाका जीयाहान आशा नाहा एहेडा बिहीराहोचे तुमा दु:ख केरूलो नाहा. ¹⁴ काहाका येशू मोय गियो ने फाचो उठ्यो एहेकी जाहा आपु विश्वास थोवत हा ताहा येशूमे जे मोतेहे तियाहालबी देव तियाआरी लावी ¹⁵ काहाका प्रभु वचनामेने आमा तुमाहाल इं आखुला, आपु जे जिवते हाय ने प्रभु आवुला लुगे फासला रिहु, ते आपु मोय गेहेला आगला जाणारे नाहा. ¹⁶ काहाका आज्ञा केणारा मोडो आवाज, पेअला देवदेता आवाज आने देवा तुतारी आवाज आवी ताहा प्रभु सोताहा होरगामेने उती आने ख्रिस्ताम मोआले पेअला उठी. ¹⁷ हाती आपु जे जीवते हाय ने फासला रिहु ते प्रभुल भेटा केअता वादलाम उसंलाय जाहु, आने सादानेकादा प्रभु आरी रिहु. ¹⁸ तियाहाल तुमा इया वचनाकी एक बिहीरा होमजावा.