¹ 1 तियाहाल आम्हाहांकी धीर थोवायोनांहा तांहा आम्हा अथेनै शहरामुज एखले पाचाडी रेहेले, ई आम्हांल हारो लाग्यों ² आन आम्हांय आपु पावुहू तीमथ्य ख्रिस्ता सुवार्तेम देवा सेवक ईयाल ईयाखातोर मोकल्यों का, तो तुम्हांल उबे केराआ आन तुम्हां विश्वास वांदे ईया खातोर होमजावें ³ तों एहेकी का, ईया संकटाल केडों बिये नाय, काहाका आपों ईयाखातोरुज निवडुले हाय ई तुम्हांय स्व:ता जॉआलों हाय ⁴ काहाका आम्हा तुम्हाआरी आथा ताहा आम्हांय तुम्हांल आखी थोवलों का, आपुल वोखो (दु:ख) भोगनु हाय आन तियाहोच वेलों हाय, ई तुम्हांल मालुम हाय. ⁵ ईयाखातोर मान धीर आवेनाय, तियाल माय तुम्हां विश्वासाबारेम फुसा आखीन मोकल्यों, केडाल मालुम, कदाचित परीक्षकाय तुम्हाल लालच (मोह) देअता आम्हां काम बाया जातों रेतांआ ⁶ आम्ही तीमथ्याय तुम्हांयाने आम्हांय आवीन तुम्हा (विश्वास) भोरुसा आन प्रेमा ईयाबारेम आन जेहेकी आम्हा तुम्हांल मिलाखातोर आनंदाम हाय तेहेकी तुम्हांभी आम्हाल मिलाखातोर आनंदाम रिअन आम्हां प्रेमा कायम ईत केअतेहे ईयाबारेम हाऱ्या गोठ्या आखाखातोर आम्हांल लि आले है; ⁷ तियाहाल पावुहू, आम्हालं आपों बांद्या अडचण्या आन संकटाम तुम्हा विश्वासावेंने तुम्हांखातोर समाधान मिल्यों. ⁸ काहाका जाहॉ तुम्हां प्रभुम (देवा भक्तीम) मजबुतीहीकी टिकते वेरीता आमी आम्हां जिवाम जिव आलों ऐहेकी रेहे. ⁹ काहाका आपों देवाहुबोर आम्हां तुम्हाकेअता, जो बादों खुशीवाखरी खुशी केअतेहे तियाखातोर आम्हां देवाल तुम्हाकेअता काय धन्यवाद दी शेकतेहे? ¹⁰ आम्हा रातदिही खुप प्रार्थना केअतेहे का, आम्हा तुम्हाल मुयामुय वेंक्षी आन तुम्हा विश्वासांम कोमी हाय ते पुरे केजी. ¹¹ देव आपों बाहको ओ स्व:ता आन आपों प्रभु येशु ओ, आम्हांल तुम्हांहोवे आवा केल्लोज आडफांटो नाय वेरा दे ¹² आन जेहेकी आम्हा प्रेम तुम्हाहावे हाय, तेहेकीज प्रभु तुम्हां प्रेम एकबिजावे आन बांदेहावे वादवीन खुप मोंडो क्या ¹³ ईयाखातोर का, आपों प्रभु येशु आपों बादा पवित्र जाहाआरी आवी तांहा तियाय तुम्हा मने देव आपो बाहको ईयाहुबोर पवित्रेम निर्दोष वेराखातोर उभे केरावी