¹ Samuel ucuocuinö o'catoi'önä̧rö̧ Israel ttö̧ja̧rö̧. jitä Israelmä rä'opinö rohuäu 'chä̧nö̧ filisteoscu. Jahuätömä ä'ecuinä̧tö̧ Ebenezer pä'ö micuome, ja̧'hua̧ta̧'a̧nö̧ filisteosmä ä'ecuinä̧tö̧ Afec pä'ö micuome. ² Filisteosmä ca̧ca̧cui̧nä̧tö̧ tturohuähua pä'ö Israel ttö̧ja̧cu̧, ja̧'hua̧ta̧'a̧nö̧ curä kä̧mä̧do̧mȩnä̧. Filisteos rohuäu isojuo'epinätö̧ Israel ttö̧ja̧rö̧ ja̧'hua̧ta̧'a̧nö̧ cuä'ö icuinä̧tö̧ 400nö̧ ttö̧ja̧rö̧ tturohuähuomettö̧mä̧. ³ Pä'äjita'anö ttö̧ja̧ tti̧rȩbȩhuo̧mȩnä̧ ttä'ecuäjome, Israel tä̧mö̧ buecuächätömä pä'inä̧tö̧: ¿Tta̧'a̧nö̧ pä'ö tu̧ru̧hua̧mä̧ tujiyuhuönä jȩa̧'a̧ttö̧ jitä mo̧ro̧mä̧ filisteos ttä'ca jo̧mȩttö̧mä̧? Ti'cächätucua tu̧ru̧hua̧ Dios esecuinö ȩjo̧ca̧ pȩnȩ jubö yottö Silottö, pȩnȩtä̧ ka̧ pä'ö ujutucu, ja̧'hua̧nö̧ ja̧'a̧ ujuturu ppädäcua'anö taboiyotö ttumöttö̧." ⁴ Ja̧'hua̧nö̧ ja̧'a̧ ötahuiyä ttö̧ja̧mä̧ hue'inä̧tö̧ umätö̧rö̧ Silora̧'a̧ tti̧'cha̧ pä'ö; jua'attö jahuätömä i'cächinä̧tö̧ su̧ro̧da̧u̧ Ttu̧ru̧hua̧ Dios esecuinö ȩco̧ca̧. Quurubín huä̧mȩ ttö'ejoca. Elí i̧tti̧mö̧ ta̧ju̧cuäyotö; Ofni'inä ja̧'hua̧ta̧'a̧nö̧ Finees'inä juo̧ca̧ TÖ̧Ä̧NÄ̧HUA̧ esecuinö ȩco̧ca̧ ppeyänä. ⁵ TÖ̧Ä̧NÄ̧HUA̧ esecuinö ȩco̧ca̧ ä'ö kä̧cuä̧huo̧mȩ rȩbȩhui̧po̧mȩnä̧, Israel ttö̧ja̧ o'catoi'önä pä̧i̧cu̧nä̧ huopinä̧tö̧ ja̧'hua̧nö̧ huottomenä rȩjȩmä̧ ttö̧ä̧hui̧na̧'a̧. ⁶ Filisteos pä̧i̧cu̧nä̧ huotta'a ä̧ju̧cu̧mä̧ pä'inätö̧: "¿Däjejä̧ttö̧ hebreos ttö̧ja̧ ä'ähuarättö pä̧i̧cu̧nä̧ huotta'a rö̧mi̧pö̧mä̧?" Ja̧'hua̧nö̧ ja̧'a̧ jahuätömä huo̧jui̧'i̧nä̧tö̧ TÖ̧Ä̧NÄ̧HUA̧ esecuinö ȩco̧ca̧mä̧ ä'ö kä̧cuä̧huo̧mȩ ka̧'a̧ pä'ö. ⁷ Filisteosmä ye'i'ä'cotö; pä'inä̧tö̧: "Ttö̧ä̧nä̧hua̧mä̧ ä'ö kä̧cuä̧huo̧mȩ rȩbȩhuä̧ji̧." Jahuätömä pä'inä̧tö̧: "¡Ujutuhué!" ¡Ä'cojimä̧ pa̧'a̧nö̧ jö̧mä̧ yorö'iso 'cuäopoca'a jä̧'i̧ja̧'a̧! ⁸ "¡Ujutuhué!" ¿Ditä tto'epö ppädäcuotöta'attö̧ pitö ttö̧ä̧nä̧huo̧tö̧ juruhuätö ttujuruttömä? Pitötä ja̧'a̧ ttö̧ä̧nä̧huo̧tö̧ Egipto tta̧ja̧cu̧ rohuäu rȩjȩ jui̧yä̧jä̧ttö̧ rö̧ä̧nä̧ usurä ttȩmä̧u̧nä̧ jȩpi̧nö̧mä̧. ⁹ Cujurucu amöcuädätucui, umätö̧ jö̧nä̧ ucutu filisteosmä, ja̧'hua̧nö̧ jo̧ca̧'a̧ jö̧ttö̧mä̧ Hebreos ttö̧ja̧tä̧ ttö̧mö̧huäyotö jö̧nä̧ cu̧jä̧cuo̧tö̧jä̧, ucutucu jahuätö ttö̧ja̧cuä̧'i̧ja̧'a̧nö̧tä̧. Umä̧tö̧ jö̧nä̧ rohuähuätucui." ¹⁰ Filistea ttö̧ja̧ rohuähuinä̧tö̧, rohuäu iso juo'epinä̧tö̧ Israel ttö̧ja̧rö̧. Ya̧cu̧pu̧nä̧ ttojusodera̧'a̧cu̧ tö'ipächinä̧tö̧, juiyó recuätörö cuä'äu icuinä̧tö̧; Israelttömä̧ treinta mil su̧ro̧do̧u̧ jo̧menä̧ to'e'inä̧tö̧. ¹¹ DIOS esecuinö̧ ȩjo̧ca̧'inä̧ nä̧u̧cuä̧cuä̧hui̧na̧'a̧ ja̧hua̧ta̧'a̧nö̧ Elí i̧tti̧mö̧ ta̧ju̧ Ofni, Finees'inä̧ 'corujuo'ächinä̧tö̧. ¹² Ya̧te Benjamín ahuaruhua o'cotö i̧sa̧ ttörohuähuome pä̧tȩcuä̧nö̧ 'cuäo'ö jopö Silora̧'a̧ rä̧bȩhui̧nö̧ ji̧yȩtä̧ mo̧ro̧, rä̧bȩhui̧nö̧ ö̧'ca̧tä̧huä̧tiyu̧'inä̧ serähuächäja'atä rä̧bȩhui̧nö̧ ja̧hua̧ta̧'a̧nö̧ unä̧'inä̧ rȩba̧ ja̧'a̧tä̧. ¹³ Ja̧u̧ ichi'omenä̧, Elimä̧ mä̧nä̧ jäyä ideäcänä̧ to̧pä̧rö̧ pi̧nö̧ ju̧juȩnȩ pä̧nö̧ a̧'cua̧tta̧'ȩcuinö̧ DIOS esecuinö̧ ȩjo̧ca̧ amöcuädö. Ja̧u̧ ötahuiyänä̧ 'chä̧hui'ö̧ huȩnȩ jiähuomenä̧, ötahuiä ttö̧ja̧ o'catoi'önä̧ pä̧icu̧nä̧ huopinä̧tö̧. ¹⁴ Elímä huotta'a rä̧mi̧pa̧'a̧ ä̧ju̧cu̧mä̧ pä'inö: "¿Däjettö̧ ya̧'a̧nö̧ rä̧mi̧pö̧mä̧?" Ya̧tȩ jurunä 'chä̧hui̧'ö̧ topö i̧huä̧ji̧'ca̧ Elírö ji'ähuinö. ¹⁵ Ja̧'hua̧nö̧ ja̧'a̧ Eli uhuächina'attö̧mä̧ 98nö̧ a̧'ȩ jo̧mȩnä̧ ku̧nä̧ri̧nö̧; ö'äriyämä ä̧to̧cä̧chi̧nö̧ ja̧'hua̧nö̧ ja̧'a̧ttö̧ toö juiyönä juo'ächinö. ¹⁶ Ja̧u̧ ttö̧ja̧sa̧mä̧ Elírö pä'inö: "Ttömä curä jitä mo̧ro̧ tturohuähuomettö̧ tö'ipächäji'ca̧ rȩbȩhui̧pä̧ji̧sä̧." Ja̧'hua̧nö̧ päiyäcu ja̧u̧mä̧ päinäcu̧: "¿Chi̧tti̧, tocu jä̧ja̧'a̧cuä̧ttö̧?" ¹⁷ Ttö̧ja̧sa̧ huȩnȩ i'cächäji päjimä ädätömä pä'inö: Israel ttö̧ja̧mä̧ filisteas ttö̧ja̧ttö̧ dö'ecuächäjätö. Ja̧'hua̧ta̧'a̧nö̧ jahuätö ttö̧ja̧mä̧ rohuäu tti̧cuä̧jä̧u̧. Cui̧tti̧mö̧ ta̧ju̧cuäyotö Ofni'inö, Finees'inä to'e'ächäjätö ja̧'hua̧ta̧'a̧nö̧ TÖ̧Ä̧NÄ̧HUA̧ i̧ä̧ro̧ca̧'inä nä̧u̧cuä̧jä̧tö̧." ¹⁸ TÖ̧Ä̧NÄ̧HUA̧ i̧ä̧ro̧ca̧ ucuocuomenä Elímä ideäcättö aboja'acu 'po'ächö äpate ppeyänä ma'i̧nö̧. U̧ru̧pä̧'kȩ 'teähui'äcu 'coru pä'i'inö, juhua'amä täcö bu̧o̧sa̧ jo̧mȩttö̧ ja̧'hua̧ta̧'a̧nö̧ juiyo bä̧rȩpa̧ jo̧mȩttö̧. Ja̧u̧mä̧ Israel ttö̧ja̧ ttu̧ru̧hua̧ jö̧nä̧ ki̧nö̧ 40nö̧ a̧'ȩ jo̧mȩnä̧. ¹⁹ Ja̧'hua̧nö̧ ja̧'a̧ ö̧jo̧ri̧ju̧, Finees irecuamä muchaju juo'inö'coju o'caju juhuojometä̧ päia'a. TÖ̧Ä̧NÄ̧HUA̧ i̧ä̧ro̧ca̧'inä näucuä̧jä̧tö̧ ja̧'hua̧ta̧'a̧nö̧ ki̧mi̧ya̧'inä ja̧'hua̧nö̧ jö̧ta'anö kirecuo'inä 'coro juhuo'ächäjätö pättö huȩnȩ ä̧ju̧cu̧mä̧, kihue'quiyunä kä̧mä̧dö̧ o'caju juo'inä̧ju̧, juhua'amä o'caju juhuoja pä'ö barahuächia'attö. ²⁰ 'Coru juottächome ppä̧'ä̧dä̧rä̧jä̧tö̧ nä̧tö̧mä̧ pä'inätö̧: "Yecuecuä, uborö uhuäbecuäjäjujä̧." Ja̧'hua̧nö̧ pätta'anä ädätocoju pinä̧ju̧ ja̧'hua̧ta̧'a̧nö̧ ä̧ju̧cu̧'inä ä̧ju̧cuo̧co̧ju̧ pinäju̧. ²¹ Jahuajumä ja̧u̧ ji̧'qui̧cha̧hua̧rö̧mä̧ Icabod pä'ö o'inäju̧: "Usärömä Israel ttö̧ja̧ttö̧mä̧ 'quȩi̧pä̧chä̧ja̧'a̧" pä'ö, juhua'amä TÖ̧Ä̧NÄ̧HUA̧ i̧ä̧ro̧ca̧mä̧ ttö̧ä̧nä̧cuä̧jo̧mȩnä̧ ja̧'hua̧ta̧'a̧nö̧ ki̧mi̧ya̧'inä ja̧'hua̧nö̧ jö̧ta'anö kirecuo'inä 'corujuoächäjomenä. ²² Ja̧'hua̧nö̧ ja̧'a̧ttö̧ jahuäjumä pä'inä̧ju̧: "Usärömä Israel ttö̧ja̧ttö̧mä̧ 'quȩi̧pä̧chä̧ja̧'a̧" juhua'amä TÖ̧Ä̧NÄ̧HUA̧ i̧ä̧ro̧ca̧mä̧ ttö̧ä̧nä̧cuä̧jo̧mȩnä̧