¹ Mö̧ä̧ya̧ Samuel aditinö TU̧RU̧HUA̧cu̧ Elí to̧ä̧ra̧'a̧nä̧, TU̧RU̧HUA̧ i̧huȩnȩ ja̧u̧nu̧ mo̧ro̧ rö̧ä̧i̧nä̧mä̧ juiyuhuächina'a. Täcö 'cuäopönämä i̧jȩcuä̧cho̧ca̧'a̧ ji̧na̧'a̧. ² Ja̧u̧nu̧ pä̧nä̧ Elímä, ä̧to̧cö̧ kä̧mä̧di̧nä̧cu̧, ja̧'hua̧ta̧'a̧nö̧ täcö adiu toö juiyönä ji̧nä̧cu̧, ja̧'hua̧nö̧ jä̧cu̧ ö̧'ä̧ppä̧nä̧tä̧ pinö. ³ TU̧RU̧HUA̧ ö̧ra̧pa̧ra̧mä̧ na̧hui̧ca̧'a̧ ji̧na̧'a̧, ja̧'hua̧nö̧ ja̧'a̧nä̧ Samuel ä'i'a pä'ö ä̧'ä̧ppä̧nä̧ pinö U̧RU̧HUA̧ ö̧jodenä TU̧RU̧HUA̧ i̧ä̧ro̧ca̧ huähuä huȩnȩ ko̧mȩ. ⁴ TU̧RU̧HUA̧ huoäcu Samuelmä: "Pȩnȩtä̧ kö̧sä̧" pä'ö ädätinö. ⁵ Samuelmä Elí ö̧jo̧mȩcu̧ pä̧i̧cu̧nä̧ jopö 'chä̧hui̧'ö̧, "Pȩnȩtä̧ kö̧sä̧" huo'cuäjäcumä päinä̧cu̧. Elímä pä'inö ttömä huopocö päjisä, pä'äjita'anö cuä̧'ä̧ppä̧nä̧ pä̧ji̧." ⁶ TU̧RU̧HUA̧ pä'äjita'anö huopinö: "Samuel" pä'äjita'anö 'chä̧hui̧'i̧nö̧ Samuelmä Elí ö̧jo̧mȩcu̧ ja̧'hua̧nö̧ 'chä̧hui̧'ö̧mä̧ "Pȩnȩtä̧ kö̧sä̧" huo'cuäjäcumä päinä̧cu̧. Elímä päinä̧cu̧ "Ttömä huopocö päjisä chi̧tti̧, ppa̧'a̧chä̧chö̧ cuä̧'ä̧ppä̧nä̧ pä̧hui̧. ⁷ Ja̧unu̧ pänä Samuelmä ji̧nä̧ huo̧jä̧chi̧'o̧cö̧ pinö TÖÄNA̧HUA̧RÖMÄ, ja̧hua̧nö ja̧'a̧nä'i̧nä huȩnȩmä jiähuococu pinö TÖ̧Ä̧NÄ̧HUA̧. Huäbodäcuänä päi'önä huoinä̧cu̧ Samuelmä. ⁸ TÖ̧Ä̧NÄ̧HUA̧. Samuel pa'äjita'anö ä̧rä̧mi̧'ö 'chä̧nö pä'inö Elírö: "Huo'cuäcumä pȩnȩta̧ kö̧sä̧." Ja̧hua̧nö̧ jä̧cu̧ Elí huo̧juä̧chi̧'i̧nö pide muä̧yä̧mä TÖ̧Ä̧NÄHUA̧TÄ̧ huoäcu pä'ö. ⁹ Ja̧u̧nu̧ o'ca'a Elí pä'inö Samuelrö: " täí ä'äji; pä'äjita'anö huoöttömä pa̧'a̧nö päcuaröjä̧ ucuocuí TÖ̧Ä̧NÄ̧HUA̧, ucu cumuhuä̧yä̧mä ä̧ju̧cuä̧rö̧." Ja̧'hua̧nö̧ 'ja̧'a̧ttö Samuel ä'öta 'chinö pä'äjita'anö. ¹⁰ TTU̧RU̧HUA̧ ichi'ö i̧jȩcui̧nö̧; ko̧ro̧nö̧ huoä'ijöta'anö̧ huopinö̧: "Samuel, Samuel." Ja̧u̧nu̧ o'ca'a Samuel pä'inö̧: "Ucuocuí, cu̧mu̧huä̧ya̧mä̧ ä̧ju̧cuä̧rö̧." ¹¹ TTU̧RU̧HUA̧ pä'inö̧ Samuelrö: "Topi, Israelnä̧ ji̧yȩte jȩchä̧cua̧sä̧ ttömä, ja̧u̧mä̧ o'catoi'önä̧ ä̧ju̧cu̧ ye'ecui'ö tti̧tä̧huä̧cuo̧ttö̧. ¹² Ji̧yȩnö̧ mo̧ro̧ TTÖmä̧ Eli ojusjdettö to'í ja̧'a̧cu̧ yȩchä̧cuä̧sä̧ pädinö̧mä̧ ja̧hua̧nö̧tä̧ jä̧cua̧'a̧, ä̧cuo̧menä̧ kä̧mä̧do̧mettö̧ beipomȩ́ jubu. ¹³ TTÖ ja̧u̧ru̧mä̧ pä'äjisä TTÖ ja̧'a̧ röjí pä̧dä̧cua̧mä̧ cuojusodettö suronä̧ jȩtti̧nö̧ ucumä̧ huo̧jua̧jä̧, ja̧u̧ i̧tti̧mutä̧ ji̧na̧'a̧ tta̧munä̧ surojuo'ecuinä̧tö̧mä̧ ja̧hua̧nö̧ jȩtta̧'a̧nä̧ ja̧'a̧tä̧ topinö̧. ¹⁴ Ja̧hua̧nö̧ jȩtti̧nomenä̧ ttö röjinä̧ jȩchä̧cua̧sä̧ pädinömä̧ jä̧cua̧'a̧ Elí ojusodettömä̧, ojusodettö surojönä̧ jȩtti̧nö̧mä̧ u̧nichi'äcuähuoca'a jä̧cua̧'a̧ isa̧rö̧ cuä'ö icu iyähuä ja̧hua̧ta̧'a̧nö̧ ttiäre iyähuä'inä̧. ¹⁵ Samuelmä ä'inö koro mo̧ro̧, mo̧ro̧ juoome jubö; ja̧u̧nu̧ o'ca'a TÖ̧Ä̧NÄ̧HUA̧ ojusode äpate ba'epinö. Ja̧'hua̧nö̧ ja̧'a̧ Samuelmä i̧jȩcua̧'a̧ toäji Elírö jiähua pä'ömä ye'ecuinö. ¹⁶ Ja̧u̧nu̧ o'ca'a Elímä Samuel huopo'äji'ca̧ pä'inö: "Chi̧tti̧, Samuel." "Päcu penetä̧ kö̧sä̧ pä'ö ädätinö Samuelmä." ¹⁷ Ja̧u̧mä̧ pä'inö: "¿Däje huȩnȩtä̧ ucuocuäjättö̧ ucurumä?" Cuä̧ju̧cuä̧ji̧mä̧ cudaji'ättö. TÖ̧Ä̧NÄ̧HUA̧tä̧ jä̧cua̧'a̧ ttörö jȩa̧ päinöta'anö jȩä̧cu̧ ja̧'hua̧ta̧'a̧nö̧ juhua'a yabonänö'inä, ji̧yȩtȩ ttö chötö'cö ucuru jiähuäji jicuähuoca'a jö̧ttö̧mä̧. ¹⁸ Samuelmä o'cajuiyönä ji̧yȩtȩ'inä ödajoca'a ji'ähuinö̧. Elímä pä'inö: Ja̧u̧ ja̧'a̧ TÖ̧Ä̧NÄ̧HUA̧mä̧. Churutä adihuomenä jȩa̧jä̧." ¹⁹ Samuelmä böo juo'inö ja̧'hua̧ta̧'a̧nö̧ TÖ̧Ä̧NÄ̧HUA̧mä̧ ja̧u̧tä̧cu̧ ki̧nö̧ i̧huȩnȩnä̧ päinömä ji̧yȩtȩ'i̧nä̧ cä'ädi'oca'a 'cuä̧o̧pä̧cuȩ jiähuinömä jȩpi̧nö̧. ²⁰ O'catoi'önä Israel ttö̧ja̧mä̧ Danttö kä̧mä̧dö̧ Beerseba jubö huo̧jui̧nä̧tö̧ Samuelrömä TÖ̧Ä̧NÄ̧HUA̧ umöhuä̧ya̧ 'cuä̧o̧pä̧cuȩ jiäcuähuä i̧sa̧ jö̧nä̧ 'cä̧'ȩpö̧ u̧ju̧ni̧nä̧cu̧ ja̧'a̧ pä'ö. ²¹ TÖ̧Ä̧NÄ̧HUA̧mä̧ Silottö pä'äjita'anö Silottö i̧jȩcui̧nö̧, isopäi'önä Samuelrö ucuocu i̧jȩcui̧nö̧ta'anö.