¹ Anamä̧ kö̧ä̧nä̧hua̧rö̧ ucuocu pä'inä̧ju̧: "Chamiso'quinä̧ esehuäjusä CHU̧RU̧HUA̧RÖ̧. Rö̧ä̧nä̧ juruhuächi'äjusä CHU̧RUHUA̧RÖ̧. Chabo'iyotucu'inä̧ chucuocua'anä̧, esehuäjusä ppäcuäda'attö̧. ² Toa'a ka̧ra̧ surojö jui̧'a̧ GHU̧RU̧HUA̧TTÖ̧ abonä̧nö̧ hua̧mä̧, ka̧ra̧mä̧ toa'a ucu'anö̧ hua̧mä̧, inä̧huä'inä̧ juiya'a TTÖ̧Ä̧NÄ̧HUA̧ DIOS jö̧'a̧nö̧ jähuämä̧." ³ Ucurutä ucuo te'äu adihuacu pä'ömä jȩ'cuä̧, kö'cähuocö juäi'inä̧ cuättö rä'opa päömä̧ jȩ'cuä̧. Ja̧'hua̧nö ja̧'a̧nä TU̧RU̧HUA̧ TÖÄNA̧HUA̧MÄ yori'iso huo̧jua̧; j'a̧hua̧nö ja̧'a̧ttö̧ JA̧U̧MÄ jȩttö̧ttö̧ topu ro̧ȩpu̧. ⁴ Umättö juruhuättörömä 'te'ädö i̧cuä̧hua̧ po'obu 'cua̧rö̧nä̧ta̧, ja̧'hua̧nö ja̧'a̧nä'i̧nä̧ JA̧U̧MÄ jȩä̧cua̧ juiyupätörömä ttujuruhuönä. ⁵ Jahuätö ttucua ppä̧i̧rijo̧co̧u̧mä äditinä̧tö panppa̧ ja'ate'ö, ttucua ppä̧i̧ri̧ji̧näu̧mä juhua'a yabocumä ppäi jui'inä̧tö ja̧hua̧nö ja̧'a̧nä'i̧nä ki̧tti̧mu to'inäju̧mä ji̧mu̧tȩttö ta̧ju̧nö̧ huotörö ucuäbecuinä̧ju̧, ja̧hua̧nö ja̧'a̧nä recuätörö i̧tti̧cui̧nä̧ju̧ pinä̧ju̧mä juiyupä̧chinä̧ju̧. ⁶ TÖ̧Ä̧NÄ̧HUA̧mä̧ cuä'ö'inä icu ja̧'hua̧ta̧'a̧nö̧ a̧'cua̧rä̧cuä̧huä̧'inä iyö. Ja̧u̧mä̧ hua'are rejura̧'a̧ jui'ädö i̧huö̧'ca̧'inä 'cha'adö. ⁷ TÖ̧Ä̧NÄ̧HUA̧mä̧ usurä isotö juottönä'inä jȩpö̧ ja̧'hua̧ta̧'a̧nö̧ ruhuotä ttönä'inä jȩpö̧. Ja̧u̧mä̧ ttucuo'inä jȩpö̧ icu ja̧'hua̧nö̧ jȩpö̧ ja̧'a̧nä̧ ttucuomä rö̧'ä̧dö̧. ⁸ Ja̧u̧mä̧ usurä i̧sa̧rö̧ rȩjȩ i̧sa̧ppȩttö̧ äräbe'ö. Ja̧u̧mä̧ recuä rö̧jä̧cu̧rö̧ ä̧ya̧ri̧ isäsattö ruhuotucu ö̧'ä̧mdö̧nä̧ äräbe'ö ja̧'hua̧ta̧'a̧nö̧ ucuo de'äcänä ȩmö̧. Isopäi'önä rȩjȩ 'chu̧huä̧ro̧mȩ u̧ru̧hua̧ ja̧'a̧ ja̧'hua̧nö̧ ja̧'a̧ ju̧huȩnȩtä̧ huä̧mȩ pi̧jä̧mä̧ ku̧ni̧nö̧. ⁹ Ja̧u̧mä̧ tta̧huä̧rä̧cua̧ umöhuäyotö churutä tta̧'cua̧ huȩnä̧rä̧tö̧ cuettächome, ja̧'hua̧nö̧ ja̧'a̧nä̧ suronä jȩpä̧tö̧mä̧ kara'a hue'ö icuähuotö ttäcuotö yo̧a̧'a̧ 'corö jo̧mȩ ja̧'hua̧nö̧ ja̧'a̧ttö̧ ya̧tȩ'i̧nä̧ a̧mö̧nä̧ ujueunämä ö̧jo̧co̧mȩ. ¹⁰ Korotö ttu̧ru̧hua̧rö̧ kö'cocotömä, ppo̧u̧cu̧nä̧ jȩpö̧ icuähuotö ttäcuotö; ja̧u̧mä̧ ju'tojuttömä cu'upä cuäönä jȩä̧cua̧ jahuätörö mo̧ro̧jä̧ra̧'a̧ttö̧. Tu̧ru̧hua̧mä̧ ro̧ȩpä̧cua̧ pi̧jä̧ o'cajuiyönä pa̧ja̧cuä̧chö̧nä̧. Ja̧u̧mä̧ i̧yä̧cua̧ ujuru ru̧hua̧rö̧ ja̧'hua̧ta̧nö̧ ttujuru rö̧ä̧dä̧cua̧ pojopö u̧ju̧ni̧nä̧u̧rö̧. ¹¹ Ja̧u̧nu̧ jä̧ji o'ca'a Escalanamä Rama ötahuiyära'a oju isodecu i̧hui̧nö̧. Ja̧u̧ ji'qui̧cha̧humä Diosttö'inä̧ tto̧jä ttö̧'inä kä'co päteö adicuä isa̧ Elí öjo̧mettö TÖ̧A̧NA̧HUA̧RÖ̧ ppä̧'ä̧dä̧rinö̧. ¹² Jitämä, Elí i̧tti̧mö̧mä̧ u̧mä̧tö̧mä̧ jarodäcuähuä ttöja̧ jina̧'a̧. Jahuätömä TTÖ̧A̧NA̧HUA̧RÖ̧MÄ jerupinätö. ¹³ Diosttö'inä ttö̧ja̧ttö'inä kä'co päteö adicuä ttö̧ja̧mä ttihueye jina̧'a̧ pateö ttö̧ja̧ inä ttiäre iyähuä ttiyomenämä, Diosttö inä ttö̧ja̧ttö inä kä'co päteö adocuä ttöja̧ ttumu̧huäyotömä rȩbȩhui'änätö hue'chä̧cä̧ ttumu̧nä chu̧huä̧rä̧ mä̧cuä̧ deä jȩtta̧'a̧nä̧. ¹⁴ Ja̧umä̧ curäu huȩ'chä̧cä ȩna päi'nö uriyö riäyunä. O'cajuiyönä̧ huȩ'chö oquiyämä ca̧ca̧tinö, Diottö inä ttöja̧ttö inä̧ kä'co päteö adicuä ttöja̧mä ja̧hua̧nö ja̧u̧ jö̧ a̧nötä kacuipinätö. Ja̧hua̧nö ja̧'a̧ttö jahuätö Israel ttöja̧ Silo ötahuiyära'a 'chä̧tö̧mä̧ o'catoi'önätä jepi̧nä̧tö̧. ¹⁵ Ja̧hua̧nö̧ ja̧'a̧nä̧, ö̧a̧dȩ ku tticuäcua'a ä'canä̧mä̧, sacerdote u̧mu̧huäyotö ttichia'attö̧ i̧sa̧rö̧ cuä'ö iyörömä̧ pä'i'änä̧tö̧: "Idepä so'a iyätucui sacerdoterö; ja̧u̧mä̧ idepä dahuähua'a cuiyätucuarömä̧ pä'o'cö, ja̧hua̧nö̧ jö̧ juiyöttömä̧ idepä itti'ötä." ¹⁶ Ya̧tȩ ttö̧ja̧sa̧ ja̧u̧ru̧ jiäuttumä̧: "Ä̧cuo̧menä̧ ö̧a̧dȩ ku icuätucui, ja̧u̧nu̧ o'ca'a cuȩmä̧tu̧cua̧ja̧ cuȩmä̧tu̧cuo̧mejubu." Ja̧u̧nu̧ o'ca'a ja̧u̧mä̧ pä'ají: "Isocö̧, jitätä cuiyattö pä'ösä, ja̧hua̧nö̧ jö̧ juiyöttömä̧, chujurunä̧ cho̧dipä̧cua̧sä̧." ¹⁷ Pittö muäyotö suronä̧ jȩttö̧mä̧ jjiyó rö̧ä̧nä̧ ji̧na̧'a̧ TU̧RU̧HUA̧ ä'cajo̧mettö̧, jua'amä̧ TTU̧RU̧HUA̧RÖ̧ iyähuä ttöjö'coca'attö. ¹⁸ Ja̧hua̧nö̧ ja̧'a̧nä̧ Samuelmä̧, a̧u̧cuä̧i̧tä̧ U̧RU̧HUA̧ hue'ö jȩpinö̧ ö̧'ca̧tä̧huä̧ta̧'inä̧ sacerdote huottö ttö̧'ca̧tä̧huä̧ta̧ linottö̧ adicuä̧ta̧tä̧ 'ca̧tä̧hui̧nö̧. ¹⁹ Ja̧ju̧mä̧ ö̧'ca̧tähuäppi a̧u̧cuäppi pöttö chiyi'änä̧cu̧ ja̧hua̧nö̧tä̧ a̧'ȩ jö̧ ta̧'a̧nö̧ kirecuoci kichomenä̧ ki'chächi'änä̧cu̧ a̧'ȩ jö̧ ta̧'a̧nö isa̧rö̧ cuä'ö icu iyähuä pänä̧mä̧. ²⁰ Elí ppä'ädinö Elcanarö̧ ja̧'hua̧ta̧'a̧nö̧ chutä irecuarö'inä pä'inö: "Ja̧'hua̧nö̧ jö̧ttö̧mä̧ TU̧RU̧HUA̧ paju isajuttumä cui̧tti̧mö̧rö̧ recuätörö i̧yä̧cua̧jä̧, TU̧RU̧HUA̧RÖ̧ yajutä jäjepäjita'anötä̧" Ja̧u̧nu̧ o'comenä ppa̧'a̧chi̧nä̧ju̧ ttoju isodera̧'a̧. ²¹ TU̧RU̧HUA̧ pä'äjita'anö̧ jareächi'önä ppä'ädinö Anarö̧ ja̧'hua̧ta̧'a̧nö̧ pä'äjita'anö muchaju pä'i'inä̧ju̧. Jahuäjumä uhuäbecuinä̧ju̧ ki̧tti̧mö̧ u̧mä̧tö̧rö̧mä̧ huämetucuärö ja̧'hua̧ta̧'a̧nö̧ ta̧ju̧ nä̧tö̧rö̧. Ja̧'hua̧nö̧ ja̧'a̧nä̧ ji̧'qui̧cha̧hua̧ Samuelmä̧ TU̧RU̧HUA̧ tta̧huä̧ro̧mȩtä̧ buo juo'inö. ²² Jitámä, Elimä täcö bu̧o̧sa̧ ji̧na̧'a̧do. Ja̧'hua̧nö̧ ja̧'a̧ ä̧ju̧cui̧nö̧ o'cajuiyönä i̧tti̧mö̧ Israel ttö̧ja̧rö̧ jȩttä̧'chö̧, ja̧'hua̧ta̧'a̧nö̧ jahuätömä ä'ecuä'chinätö̧ nä̧tö̧cu̧ ju̧huȩnȩ isode i̧sa̧ i̧jȩti̧yu̧ttö̧ 'tö̧ä̧huode äpate ä'ca adicuä ttö̧ja̧cu̧. ²³ Ja̧u̧mä̧ pä'inö i̧tti̧mö̧rö̧: "¿Tta̧'a̧nö̧ pä'ö huȩnȩ jȩ'cuä̧'chä̧tu̧cua̧'a̧ttö̧?" Isopäi'önä o'catoi'önä ttö̧ja̧ ttä̧ju̧cua̧'a̧ttö̧ ucutu suronä jȩ'cuä̧tu̧cu̧mä̧. ²⁴ Ja̧'hua̧nö̧mä̧cö̧ chi̧tti̧mö̧; ja̧'hua̧nö̧mä̧ adihuoca'a chä̧ju̧cuä̧ji̧mä̧. Ucutumä TU̧RU̧HUA̧rö̧ tta̧'cua̧ huȩnä̧rä̧tö̧ jarotti'iyatö pä'ö jȩpä̧tö̧jä̧. ²⁵ Ya̧tȩ ttö̧ja̧sa̧ ka̧ra̧ ttö̧ja̧sa̧rö̧ to'ija̧'a̧cu̧ jȩö̧ttö̧mä̧, TÖ̧Ä̧NÄ̧HUA̧tä̧ ro̧ȩpä̧cua̧, ja̧'hua̧nö̧ ja̧'a̧nä̧ ya̧tȩ ttö̧ja̧sa̧ TÖ̧Ä̧NÄ̧HUA̧ päocö ji̧nö̧ jȩö̧ttö̧mä̧ ¿Dijä̧ttö̧ ja̧u̧ ötö'cö ucuocuä̧cua̧mä̧? Ja̧'hua̧nö̧ pä'änä jahuätömä ttä'o ucuocumä ä̧ju̧cuo̧co̧tö̧ pinätö̧ TÖ̧Ä̧NÄ̧HUA̧mä hua'ö tticuäcuotö pä'ö u̧ju̧ni̧na'attö̧. ²⁶ Möä̧ya̧ Samuelmä böo juo'inö ja̧'hua̧nö̧ TÖ̧Ä̧NÄ̧HUA̧'inä ja̧'hua̧ta̧'a̧nö̧ ttö̧ja̧'inä ttesehuomenä. ²⁷ Ja̧'hua̧nö̧ ja̧'a̧ ya̧tȩ TÖ̧Ä̧NÄ̧HUA̧ ucuocu ä̧ju̧cu̧ jiäcuähuä ttö̧ja̧sa̧mä̧ Elí ö̧jo̧mȩ ichi'ö pä'inö: "TÖ̧Ä̧NÄ̧HUA̧mä pä'ö ¿Ucu cu̧tä̧mö̧mi̧nä̧ ttahuaruhuärö Egipto rȩjȩttö̧ Faraón i̧tti̧mö̧cu̧ hueomettö̧ ttömä i̧jȩpo̧cä̧ pinösä̧? ²⁸ Ttömä Israel ttö̧ja̧ ttahuaruhuä 'cotöttö pojopö ȩmi̧nö̧sä̧, chumöhuäyotö TÖ̧Ä̧NÄ̧HUA̧ttö̧'inä ttö̧ja̧ttö̧'inä kä'co päte'ö adicuä ttö̧ja̧ jö̧nä̧ ku icu iyähuome 'chä̧nö̧ ja̧'hua̧ta̧'a̧nö̧ incienso ttujuhua pä'ö, ttö chä'ca jo̧mȩttö̧ TÖ̧Ä̧NÄ̧HUA̧ttö̧'inä ttö̧ja̧ttö̧'inä kä'co päte'ö adicuä ttö̧ja̧ 'ca̧tä̧cuä̧huä̧ta̧ ttö̧'ca̧tä̧hua̧ pä'ö. Israel ttö̧ja̧ ttiäre iyähuä ocuränä ku icuähuä ji̧nö̧ cu̧tä̧mö̧mi̧nä̧ ttahuaruhuärö iyinösä̧. ²⁹ Ja̧'hua̧nö̧ ja̧'a̧, ¿Tta̧'a̧nö̧ pä'ö ku icu iyähuä'inä, ttöäre iyähuä'inä ttö chö̧jo̧mȩcu̧ tti'cächönä jädepömä ucuo juiyönä jȩ'cuä̧tu̧cua̧'a̧ttö̧? ¿Tta̧'a̧nö̧ pä'ö ttöttö'inä abonänö cui̧tti̧mö̧rö̧ ttucuo cuiya'attö̧, chumöhuäyotö Israel ttö̧ja̧ ttöäre iyähuä adihuäjueittö cuä̧nö̧ cubärehuächätucua'attö̧? ³⁰ Isopäi'önä TÖ̧Ä̧NÄ̧HUA̧ Israel ttö̧ja̧ TÖ̧Ä̧NÄ̧HUA̧mä̧ pä'ö: Cuahuaruhuärö'inä cuahuaruhuä ttahuaruhuä minärö̧'i̧nä̧ 'cuäopönä̧tä̧ ucuotö tti̧'chä̧cuo̧tö̧ pä'inösä. Ja̧'hua̧nö̧ ja̧'a̧nä̧ jitämä TÖ̧Ä̧NÄ̧HUA̧mä̧ pä'ö: Pi̧yȩmä̧ jȩpo̧cö̧sä̧, isopäi'önä ttörö ucuotörömä, chucuotä̧cua̧sä̧, ja̧'hua̧nö̧ ja̧'a̧nä̧ jitö ttörö ucuotocotörömä ucuotäcuähuocotö ttäcuotö. ³¹ Topihuä, mo̧ro̧mä̧ täcö rȩbȩhua̧'a̧, Ucu cujuru'i̧nä̧ ja̧'hua̧ta̧'a̧nö̧ cuä'o ahuaruhuä ttujuru'inä 'chodipomenämä, cuahuaruhuättö böecuächö ttö̧ju̧mä̧ juiyäcua'anö̧. ³² Ttö chö̧jo̧mȩmä̧ a̧'u̧ ttuhuähuä ka̧'a̧tä̧ toäcuähuäcua'a. Israel ttö̧ja̧rö̧ adiu iyähui'a'anä, cuahuaruhuättö böecuächö ttö̧ju̧mä̧ juiyäcua'anö̧. ³³ Ucututtömä̧ ya̧tȩ'inä ttö chöäre i̧sa̧rö̧ ku icuähuomettö̧mä̧ rä'epömä icuocösä, Ttömä ttä̧to̧cä̧chö̧nä̧'i̧nä̧ jȩchä̧cua̧sä̧ ja̧'hua̧ta̧'a̧nö̧ ttö̧jö̧nä̧mä̧ baraunätä̧ jȩchä̧cua̧sä̧. O'catoi'önä ucu cuahuaruhuättö uhuäpächätömä hua'aö tticuäcuotö. ³⁴ Pi̧yȩmä̧ i̧jȩcuä̧tä̧ jä̧cua̧'a̧ ucurumä, cui̧tti̧mu̧ ta̧ju̧ru̧ i̧chä̧cuȩtä̧, Ofnirö'i̧nä ja̧'hua̧ta̧'a̧nö Fineesrö'inä̧: ta̧ju̧ cue'ö 'corujuottächäcuotö ji̧nä̧ yo̧mȩtȩ mo̧ro̧. ³⁵ Ttö cädepä̧cua̧sä̧ ttö cha̧'cua̧nä̧ chamiso'quittö huedö jueönä̧ jȩä̧cua̧rö. Ojusode'inä̧ 'kiyönä̧ chaditiyä̧cua̧; ja̧'hua̧nö̧ ja̧'a̧nä̧'i̧nä ttö chä'canä i̧chä̧'cua̧ ucuo ru̧hua̧ ö̧jä̧cua̧ 'cuä'opunä̧. ³⁶ O'catoi'önä a̧'cua̧rö̧ kö̧mä̧ ojusodettö i̧chä̧cua̧. Ja̧'hua̧ta̧'a̧nö̧ ja̧rȩyu̧nu̧ päi'ä̧cua̧ ja̧u̧tä̧ ä'ca jo̧mȩ jä̧'ȩpä̧rö̧ a̧'u̧cu̧nä̧ pärätä ja̧'hua̧ta̧'a̧nö̧ panppä̧ a̧'u̧cu̧nä̧ ja̧'hua̧nö̧ ja̧'a̧ttö̧ pä̧cua̧: "Ppä'ädittö micuä juiyönä iyittö taditöttö sacerdotes ja̧'hua̧nö̧ aditötä chucuäcua'anö a̧'u̧cu̧nä̧ pan."