¹ Jabin liweisi pe jumetaikuijinae, ira ewetekainu Hazor tomara nakua jawata, to najume rulia Jobab nejja, Madón ira ewetekainu nejja, Simon nejja ira tujjanenu yajawa Acsaf ira ewetekainu ü petujjanewi najumetaejitsia. ² Yajawa to najume rulia ira ewetenaewi petujjanewi pemuto wetsina pe enaewi pejumatsutojjita, Jordan mene tusatota Cineret wetsika juameto namutuotsika pe enaewi yajawa to najume itoroba, wayapjo pijiwi, unu tiribo Dor mujjuburuwelia pe nukaetsuto. ³ Yajawa to najume itorobalia Cananeowi peyakopie kaenawilia yajawa petabu werena pe enaewi, Amorreowi; Hititawi, Ferezeowi, Jabuseowi, unu tiribo nakua jawata yajawa heveowi Monte Hermón kaejawata pe enaewi Mizpa irata. ⁴ Dajjita nawajabitsouta pieja ejércitowi baru pitsapa, ayei bitsouto nakaetuona penabitsoutsinejja soldadowi ayeibitsouto penamata ujutsi apo kapanepae be tajetamajju Manuamene mujjuburua jüpa. Bajara pakuenia mamatajüpa pieja carro yajawa pieja caballo bitsouto. ⁵ Dajjita pemata kanubenaewi ira petujjanewi penajumetae horata nanamata üjjjüba, nubenajopa Merom merajawata Israel pebaru nabenejja. ⁶ Petujjanenu Josué jawabelia jumeitsi, "Bajara pamonae kujunawijitsipame, merewia pahorata Israel rajutsienajü petupaewi dajjita pebijiwi. Pieja Caballowi patajuitsiename". ⁷ Josué yajawa dajjita petonabewi matajemajjuoba. Amijibia sivapata Merom menejawata, pekueyawi bepenta. ⁸ Pentujjanenu Israel pekobeta pekueyawi rajuta, pieja wakapawotonuta ukubaba pe rukupenaewi pubarajinatsi Sidón jawabelia, Misrefot Maim, yajawa Mizpa tusatojji pemujjuburujjiya tomara. Ukubabepentatsi itsa jiwiyo apo asou. ⁹ Josué jume yeyatane, pakuenia petujjanenu jumeitsi. Caballowi tajjunepe koukuba yajawa carro tajuita. ¹⁰ Josué bajara pajuametota nawieta nejjata waitaba Hazor. Pieja wakapata ukutajjuoba bajara pa ira ewetekainu (Tsipaji Hazor matakapona itsa ira ewetanubenaewi ira tujjanewi.) ¹¹ Pieja wakapata ukubabepenta itsa jiwiyo apo yawujunu nukatabi bajara panakuota, itapeta pebenejja, itsa jiwiyo apo osou. Bajara pakuijiruta Hazor tajuitatsi. ¹² Josué waitaba dajjita jiwi patomara jawata pejinonopaewi ira ewetanubenawi pieja tomarajji. Bajara pakuijiruta ira ewetanubenaewi petujjanewi waitabatsi dajjitayo yajawa pieja waka pa ukubabatsi. Dajjita werebiebatsi pieja wakapata , pakuenia Moises petujjanenu pieja pienenu itoroba. ¹³ Israel apo tajuitsi péjana tomarajji petsutotatsia pe enaewi, Hazor bijiepeitatsi. Josué bajara patomara tajuiteta. ¹⁴ Israel petonabewitsi ejércitowi kaetuota bajara pamonaenejja pekobekowu kanalito peyaunüo nubenaekanalitojji penapentsiyeniwa peamoneyabi tomarajawa yajawa nota pieja baka. Dajjita jiwiyo penubenaewi bajara patomarajjiya pieja wakapata beyejeba dajjita tüpa. Itsa jiwiyo apo osou ejjanaetsi. ¹⁵ Pakuenia baja petujjanenu itoroba pieja pienenu Moisés, pajara jjuota, Moisés itoroba Josué, nejjata, Josué pakuenia itsi. Bajara jjuotsia Ponu jjanewaita dajjita pe itorobijawatsi itsa jumeyo apo to jumeliweisi panapaitsi, dajjita penajume itorobijawa petujjanenu Moisés jawalia. ¹⁶ Josué dajjita ira pitanajetaruka, unu tiribo nakua, dajjita Néguev, dajjita Gosén ira, pe bokae irareka, wayapjo tusato Jordán menejawata, Israel pieja unu tiribo nakua, yajawa wayapjo nakua. ¹⁷ Monte Halac kuijinae Edom imojjoyota, be berekayo pemutuo wetsina Baal Gad pijinia, wayapjo tusato Libano imojjoyota, Monte Hermón bujjupjoto jawata, bajara ponu waitaba dajjita ira ewetanubenaewi yajawa bepenta. ¹⁸ Josué baru nabia ira tujjanewi bajayajebi. ¹⁹ Itsa tomarayo jjanewaitsia Israel pieja ejército apo to kuekueiji pebeyaninatsi kaewiria baja heveowi Gabaón tomara jawata pejinonopaewi. Israel peto nabewitsi waitaba dajjita pakueyorwi bajara pa tomarapijiwi penabejawata. ²⁰ Tsipaji petujjanenu jamatabu taja ejjana peponaenejjarena pebaru nabenejja Israel, peponu pe bepentsinejja dajjitayo, apo pe tsitajubinejja pebijiobikuene, pakuenia Moisés najume itorobatsi. ²¹ Nejjata bajara pa juametota Josué nawietanukapona yajawa anaceowi pe benejja. Pakuenia itsi Hebrón unutiribota, debirjawata, Anab yajawa dajjita Judá unu tiribo nakuota, bajara pakuenia dajjita Israel pieja unutiribo nakua. Josué dajjita beyejeba yajawa pieja tomaranu. ²² Anaceowi apo nubenatabi Israel pieja irata dajjita beyejebatsi pa tomaraji naitajjuto jematetatsi Gaza tomara, Gat yajawa Asdod apo betsi. ²³ Bajara pakuenia Josué dajjita ira pitanajetaruka, pakuenia petujjanenu Moisés najume itoroba. Josué rajuta Israelnejja bajara pa ira tsipaji to najume puentatsi pe notsinejja, kae wiria kanakuijitsia penotaponaenejja. Nejjata bajara pa irata apo nabe pejjania kueneta jinonopa.