¹ Akonojjae Adonisedec, petujjanenu ira ewetekaenu Jerusalenjawata, jumetane Josué pieja liweisi pewaitabijawatsi Hai yajawa dajjita pekobekowu peto bijienaejawatsi, pakueniabaja Jericó itsitsi yajawa ira peto ewetekainutsia yajawa jumetane Gabaón tomara pijiwi pieja liweisi pakueniabaja pejjania jume nato jumeitsibeje Israelwiriawita yojawa bajara pamonaeta peyajawa jinoso paejawa. ² Jerusalén tomara kujunawa bitso tsipaji Gabaón tomara ayei tomara jjaneto tsekae, be petujjanewi tomara tsekai. Hai tomara matatojjeneta dajjita piejiwi pebijiwi bitso jiwi peamoneyabiwi. ³ Bajara jjuota Adonisedec, Jerusalén ira ewetekaenu, najume itorobalia hoham ira ewetekaenu Hebrónjawata, Piream nejja Jarmut ira wewtekaenu Jafianejja Laquis ira peto ewetekaenu: ⁴ "Panekuijibare paneyawenonaejitsiemu. Nakaituotatsi Gabaón waja benejja tsipaji bajara pamonae Josué pejjania liweisi to kuekuejei yajawa Israel tomara to". ⁵ Kae kobe ira ewetenaewi Amorreowi; Jerusalén ira ewetekainu, Hebrón ira ewetekainu, Jarmut ira ewetekainu, Laquis ira ewetekainu, Jarmut ira ewetekainu ponarena bajara pomonae yajawa dajjita petonabewi bitsouto. Isita nakaituonatsi Gabaón nejjata bepentatsi. ⁶ Nejjata Gabaón tomara Josué nejjata najumeliweisi itorobalia yajawa penabewi bitsouto Gilgaljawabelia Jumeitsilia: "i Najjatsiyo ! Panieja pienejiwijji putsa pieje epato pajjuobanutame. Najjatsieyo pa ponaremena panebe ejjanaejitsipame. Paneyawenonare, Tsipaji dajjita Amerreowi ira ewetenaewi pejumatsutotatsia pejinonopaewi nakaetuona patane benejja". ⁷ Josué Gilgal jawabetsia juna, bajara ponu yajawa dajjita pebijiwi petona bewitsi barutsia, dajjita pebaru nabitsoutabiebiwi. ⁸ Petujjanenu jumeitsi Josuejawabelia: "Bajara pamonae kujunawijitsipame. Nekobeta karajutatsi. Itsajiwiyo atá, apoka amoneyabitsane". ⁹ Josué jematsia siwa pata, merewijebi peponaekuijunae Gilgalwerena. ¹⁰ Nejjata Petujjanenu Israel pekueyawiwekua jematajemajjuoba bajara jjuota Gabaón tomara kanakuijitsita amoneya bepenta dajjita tüpabobena, yajawa pübarajina Bet Horón namutuotsia, bepenta Azeca yajawa Maceda namutuotsia. ¹¹ Itsa rükpena bajara pamonae Israel wekua, Bet Horón tsuto wetsika, petujjanenu ibo jjaintonú itabojjo wetsika tjibajarabika bajara pamonae tsimara otjopatsi dajjita namutua Azeca jawalia nejjata bajara pamona tüpa. Ayeibitsouto, najjuoba ibopuru wekua, juya Israel pieja kopeinabota pebijiwi penamujjuweintsiwatonu apo tüpae ejjanae. ¹² Bajara jjua kuijinae Josué petujjanenu baru kueikueijei petujjanenu pamatakabi Israel pebijiwi rajuta pe amoneyabikuene Amorreowijawalia. Paliweisi Josué to kueikueijei Israel tomara mejja: "ikotia, kaekowuto rukare Gabaón nakuota yajawa juometo, Ajalón tusatotai". ¹³ Nejjata ikotia rukajunua, juameto aponatijjitarukae Tsipaji bajara panakuapiji namajjuweinta pekueyawi amoneyaba. ¿Jaser pieja kuyalato bajjutota apo yakinarutsi? Ikota tuotuojutatsia apo natijjitarukae itabojjo jawatatsi; apo kaniwiyo tsatabi, kae matakabi kuenia. ¹⁴ Bepitsi matakabiajibi akonojjae bajayatamikuijinae, pakuenia petujjanenu jumeyeyatane jiwitonu. tsipaji petujjanenu jumeyeyatane jiwitonu. tsipaji petujjanenu Israel yajawatsi pebaru nabenejja. ¹⁵ Josué yajawa dajjita Israel baru nubenaponatsi, nawiebanajetarubena pieja booburtojjiya Gilgal jawabelia. ¹⁶ Akonojjae, kae kobe ira ewetanubenaewi rukupeka penamatayabinejja Maceda mutjujawalia. ¹⁷ Josué pejumeitsikuijinaetsi: "Nanamatajjuna bajara pomonae ! i Kae kobe ira ewetsiwi namatayaba Maceda mutjuta!". ¹⁸ Josué jumeitsi: "Ayei iboto patorobare mutjuwupata pane akatsinejja bajara jota wajabitsou (soldados) paewetsi ejjanaename, pe taenubenaenejja. ¹⁹ Pajjamu panubenaejitsipame. Panekueyawi papuba rajinare pepunuwetsina paponare jematejema panebenejja. Pütsa pieja tomarajawabelia pajone ejjaname, tsipaji petujjanenu panieja Dioso bajara pamona panekobeta pakarajuta". ²⁰ Josué yajawa Israel pejji bajara pamonae werebieba ayeikueneta, kaejiwiyo ata apo nukatabi dajjita beyejebatsi; Kaejiwiyobeje saya panepa perukupenaewi peasoubeje tomarajjiya kuijiba. ²¹ Bajara jjua kuijinae dajjita pebaru nabitsoutsiwi; Josue jawabelia nawieba pejjaniakueneta pieja boojjiya Macedajawabelia. Itsa jiwiyo apo bara kueikueijei itsa kuijiru liweisi jume Israel tomara wekua. ²² Nejjata Josué jumeitsi: "Pawu pare paneto kaponaremena bajara pa ira ewetanubenaewi kae kobe pebijiwi". ²³ Bajara pamonae jumayeyatane pakuenia ponu itorobatsi. Nejjata kaponarenatsi kae kobe ira ewetanubenaewi mutju werena jukatsi; Jerusalén ira ewetsinu Hebrón ira ewetsinu, Jarnut ira ewetsinu Laquis ira ewetsinu yajawa Eglón ira ewetsinu. ²⁴ Itsa kaponarenatsi bajara paira ewetanubenaewi Josué petaenejja, bajara ponu junata kae pebi kanakuijitsia Israelpijiwi, pieja Comandantewi pemata kaponaewi Soldadowi pebaru nabewi guerrata Jumeitsi: "Pewusitota panatajju nubare". Pamonae ponare petajjuta wusi kateibareka. ²⁵ Nejjata jumeitsi: "Putsa jema pakujunawijitsipame yejawa panajunawiekame. Panajamatabu soutsiename aitatsakaya. Mapa kuenia petujjanenu itsitsane wajakueyawi pajjamu panebaru nabewi". ²⁶ Bajara jjua kuijinae Josué najetabalia beyajjuoba ira ewetanubenaewi: kae kobe naejawa naeta rubikatsi kainu kanakuijitsia bajara pamonae rubena kaniwiyo jawália. ²⁷ Itsa kaniwiyo tsarukaponae, Josué najume itoroba, pa isikare najewa wekua mutju jawalia pa jjuobare bajara pamonae penamatayabijawabelia. Mutju wupata ayei ibotonu bobena. ²⁸ Mapakuenia, Josué waitaba Maceda bajara pamatakabi, pieja wakapawatota dajjita beyejeba, yajawa ira ewetekaenu beyajjuobatsi. Dajjita beyejeba kaejiwiyo apo nukatabi pieja dajubijji yajawa bia. Itsa jiwiyo apo asou. Pakuenia Maceda Tujjanenu bijiepeitatsi, bajara pakuenia Jericó tajjanenu yajawa bijipeitatsi: ²⁹ Josué yajawa dajjita Israel Maceda namutualia pana Libnajawa. belia. Bajara ponu yajawa najetaruka Libnajawabelia pebaru nabenejja. ³⁰ Petujjanenu bajara pawiria Israel tomara rajuta pebijiepeitsinejja; bajara pa ira tujjanenu (Rey) yajawa. Josué dajjita wiria bepenta pieja wakapawatota itsa jiwiyo apo asoü. Bajara pa ira tujanenu bijiepeitatsi pakuenia Jericó tujjanenu bijiepeitsiejjanatsi: ³¹ Bajara pakuijinae Josué yajawa dajjita Israel nubenapona Libna namutua Laquisjawabelia, Panakuota barunukajopa pekueyawi pebaru nabenejja. ³² Petujjanenu Israel pekobeta rajuta Laquis tomara. Josué itsa matakabi jawalia pekueyawi teika. Bajara patomarata pejinonopaewi, pakuenia Libna bijiepeita. ³³ Jjua kuijinae Horam, Gezer Tujjanenu, Laquis yawenona panarena. Josué bajara ponu tsekona yajawa pieja ejército bitsouto dajjita bepenta kaejiwiyo apo nukatabi. ³⁴ Bajara jjua kuijinae Josué yajawa dajjita Israel Laquis wekua pona Eglón jawabelia. pepatsinejjalia. Bajara jota nubenajopa pebaru nabenejja pekueyawi, ³⁵ nejjata pekueyawi waitaba bajara pamatakabi. Bajara pamonae pjebaraba pieja wakapawatonuta yajawa dajjita jiwiyobeje werebiebatsi, pakuenia Josué bijiepeita Laquis. ³⁶ Bajara pakuijinae Josué yajawa dajjita Israel wekua pitsapa Eglón peponaenejjalia Hebrón. Nawaja bitsouta pekueyawi pe benejja. ³⁷ Dajjita teikatsi yajawa pjenatsi pieja wakapa watonuta, ira tujjanenu yajawatsi dajjita tomarajjipemujjuburu enaponaewitsia. Dajjita wiria werebieba bajara jota penubenaewi, itsa kuene apo nukatabi, pakuenia Josué bijiepeita Eglón. Dajjita kuene bajara ponu bijiepeita itsa nüyo apo nukatabi bajara patomarata. ³⁸ Bajara pakuijinae Josué nawietanajetaruka, Israel petonabewi ejército yajawatsi, Debirjawaberena najetarubena pebaru nabenejja bajara pamonae. ³⁹ Bajara ponu waitaba pekueyawi yajawairra ewetanukaenu petujjanenu, yajawa tomarajji kaejewa pemujjuburu pe enaiwitsia. Pieja wakapa watonuta pjena yajawa bijiepeita dajjita kuene peyajawa ekajawa bepenta bajara panakuota. Josué itsa nüyo apo yawujunu nakae ejjanae, bajara pakuijiruta Libna biepeitatsi yajawatsi ira ewetanukaenu. ⁴⁰ Bajara pakuijiruta Josué dajjita ira nota, unu tiribotsuto, Néguev, wayapjo yajawa petsuto. Dajjita ira ewetanubenaewi petujjanewi, apo asou tsanubenae. Dajjita bepenta, pakuenia Petujjanenu atjubuyo pe ekainutsia, Israel Diosonu pakuenia najume itoroba. ⁴¹ Josué pjena pieja wakapa watota Cades Barnea kuijinae Gaza tomara puruta. yajawa dajjita tomara nakua Gosén jawajjiya Gabaón napuwereta. ⁴² Josué teikajeba dajjita ira tujjanewi yajawa ira notapona kai kuenia baja tsipaji petujjanenu, Israel pieja Dioso, Israel baru nabia. ⁴³ Bajara pakuijinae Josué, dajjita Israel yajawatsi, barunawieta pieja booburtojjiya Gilgaljawata.