¹ Dajjita ira pe ewetenawi imojjoyo Jordán kanakuitsijawata enaiwi, petsuto yajawa wayapjo pijiwi, imojjoyo pe enaiwi Mediterráneo itapajjiya, Libano jawabelia, hititawiria, Amorreowiria, Cananeowiria, Ferezeowiria, Heveowiria, Jebuseowiria, ² tsinakautuonatsi Josué Israelyajawa pebenejjatsi kaenu matakaponaejitsia jiwi bitsouto. ³ Gabaónjawata pe jinonopaewi itsa jumetane Josué pe amoneyebijawa Jericopijiwi yajawa Haiwiria, ⁴ Pejjania kuene najamatabu. Bajará pamonae nota perujo ese pekajayabidoruonu asnowita ruba. Yajawa peruju dorojji nota binokowujawa, pe esesebiejawa pewojojobiejawa jajawa pekatsanae esetojji najjataba. ⁵ Peruju sandalia natajjujjataba pe katsanaejawajji peruju esetojji najjataba bitso pe abejjejawa. Pieja pejjaijawata panbujjito tsewatsi yajawa to pulumbatsi. ⁶ Bajará pamonae Josué pieja boobur jawabelia kuijitarubena Gilgajawabelia pakuenia jumeitsi Israel pebiwi Jawalia: "Pajjanu tajüwerena panajetarubenajü itsa nakuawerena, nejjata kae liweisikuenia pejjania jume nato kueikueijitsietsi". ⁷ Israelwiria pebijiwi jumeitsi heveowita: " Kae irata metatsipae najua enaejitsipatsi. ¿Depakuenia kaeliweisi pejjania jumebaja pakato najume rajutsipatsi pajjamu jawalia?". ⁸ Josué jawalia nejjata jumeitsi: "Pajjanu pakato panieja pienewitsi". Josué yanijoba: "Dépa wiriemu? ¿Dewerena paponame?. ⁹ Bajará pamonae jumeitsi: " panieja pienewinu tajuaere paponaju itsa ira nakuawerena paka jamatabona ponatsi, Petujjanenu nieja Dioso patawunu jumetaejjae. Bajará ponu pejumeliweisi pajumetanejü pakuenia baja Egipto itsi. ¹⁰ Pakueniabaja Amorreojiwibeje ira ewetekainubeje itsi Jordán mene werena, Sehón petujjanenu irá ewetekainu Basán nakuota, Astarot nakuota pe ponaponaenu. ¹¹ Nejjata pataja perujunujji yajawa dajjita tomará pijiwi patajinonopae tomará nakuota panejumeitsi: Pane ponaewi nejja pejjaejawajji panamitsa koponare. Bajará pamonae pabarunakaetuotsiename nejjata pajumeitsimutsane: "Pakato panieja pienewitsi, kae jume nato kueikueijeitsunetsi". ¹² Mapataja panbujji, peatajübujji panotajü pamatakabi papitsapaju pata maruebujji pakaponajü berena baja patakaponaenejjaje. Akonojjae, taema, tsewa yajawa pulumbatsi. ¹³ Binora penawunubi buonuta pejenajawa kani itsa abajjü pawunubajü, taema, akonojjaebajja tabu wojojobia. Pataja ese pataja sandalia paneto tajjuwinetsi atsa belia baja pata ponaejawa tajurewerena jane". ¹⁴ Israelitawi itsajawajji wekua nota peto koponaejawatsi, beitsijane Petujjanenu atjubuyo pe ekainutsia apo jane liweisi yanijobi. ¹⁵ Josué baruyaya kuene nakobe rajuta bajara pamonae jawalia yajawa to majume liweisi kateiba pe jinonopaenejja Pemata kanubenaiwi tomará yajawa to najume liweisi rajuta. ¹⁶ Akueyabi matakabi kuijinae Israelitawi petonajume kateisi kuijinae baja bajará pamonaeta, naya liweisi jumetane kaejawatsiabaja pe jimonopaejawa imojjoyo. ¹⁷ Nejjata Israel tomará pijiwi akueyabi matakabi pieja tomarajjiya kuijiba. Pieja wunu tomarajji Gabaón, Cafira, Beerot yojawa Guiriat Jearim. ¹⁸ Israelwi apojayetsi bajará pawiria tsipajibaja pe itorobiwitsi bajará pamonae to najume liweisi rajuta petujjanenu, Israel Dioso jawabelia. Dajjita Israelitawi nawu pajjata tsipaji pematakanubenaewi apo kuene jitsipae. ¹⁹ Beitsi jane itsieta pematakanubenaewi pieja monaeta jumeitsi: " Pajjanu pana jume liweisi rajutajü petujjanenu atjubuyo pe ekainutsiato, Israel Dioso, bajara jjuota paneto akuenebi pata itsakuijiruobijawa. ²⁰ Majjua pamonae itsitsanetsi: pebisiakuene makasiwá najamatuba jjeinajitsipa tsipaji to najume liweisi rajutatsi bajara pamonae, apo betsanetsi jinonopaena. ²¹ Nejjata pematakanubenaewi jumeitsi pieja monaejawabelia: "Jemabaja jinonopae". Bajara jjuota Gabaonitawi iso to jeita yajawa mera peto puonaewitsi dajjita Israelpijiwi nejja, pakuenia jumeitsi pematakanubenaiwi pamonae yabara. ²² Josué junata pe jumeitsinejja: "¿Dejjuotsia panetsimujju nametsuntame itsa pane jumeitsimu: "Pajjanu tajuwerena pata enapanaewi, kaejawa pajinonopaeatamu? ²³ Akonojjae, nejjata, pebisiakuene pakatsijopaena itsajiwijji panieja wiria panetonakuenebiename, pamonae baja iso pewokobiwitsane yajawa mera pejotsiwitsane taja Dioso pieja booyabelia. ²⁴ Bajara pamonae Josué jume pita: "Beitsi to najume buotatsi nieja pienewita petujjanenu atjubuyo pe ekaenutsia nieja Dioso, Itoroba Moisés pieja pienenúta perajutsinejja dajjitapaira, pebenejja dajjita jiwi pa irata pejjinonopaewi, nejjata pajunawabobenajü pata tupaeyániwa jjamu nekobeta. Bajara jjuota pa itsino. ²⁵ Akonojjae, taema, pajinonopajü nieja liweisi bujjupaná. Pakuenia baja najamatabujjeiname pajjanu jawaberena, itsimure". ^{26 27} Nejjata Josué pakuenia to natsitane: Israelwi wekua notatsi bajara pamonae, bajara jjuota Israelitawi apo betsi. Nejjata pamatakabijebi Josue gabaonitawi iso peto ukubiwitsi yajawa mera peto puonaewitsi tomara nejja, yajawa petujjanenu pieja tajjunae kowunejja. Pamatakabijebi Petujjanenu peita jitsipae irata éna.