¹ Pepopeyanakua-ewetsinü Nabucodonosor ejjana ayaijaneto jivitonü jumapekataenükuenia oronanitota jjaina veintisiete (27) pametrobeje piapiajawa athübuabetsia, pijinia akueyabi pametro setenta (70) pacentimetro apia epatajürütsialia. Ponü matakota duratusato jawata Babilonia nakuata pebokaetusato. ² Nejjata Nabucodonosor najumeliwaisi-itoroba pena kaetuatsia-ejjanaenejja pewetsinakuajawa provincia jaba, nakuajaba tomara ata, najjua pemujjujiobalia biwitsi, palata peto ewetabiabiwitsi penanekonitsiwi, peliwaisijjanebabiabiwi ata dajjita matatsunü wajabisaü penamatakaitorobiwi, pe patsinejja bajarapajumape kataenü ponü matakota. ³ Nejjata pewetsinakuajawa provinciavi jaba nakujaba tomara ata, najjua pemujjujiobabiabiwitsi, palata peto awetabiabiwitsi, penanekonitsiwi, peliwaisijjaneba biabiwi, ata dajjita matatsunü wajabitsaü penamata kaitorobiwi provincia javata na kaetuata penataenejja Nabucodonosor bajarapajumapekataenü ponü matakota Pamona nubena pitabarata. ⁴ Nejjata nakua ira evetsinü pija peliwaisipekapo naünü ayei wawai jai "pa jumekowünutame, tomara, nakua, panekuaikuai ata. ⁵ Paepota pa jjamu jumetaima pejume pe obijaba jibojabanü, citawiria jirawiria, arpajabanü, pipawiria ata. dajjita pe najumesijava, pajjainare panematabakabüta irataeya jumapekataenü oronanitota nakua ira evetsinü to itsitsi. ⁶ Pajivi pematabakabüta apotonukae tsane yaiyataeya, kaekuenia jjuabiatsane pitatsajawiisotojjaneto jawabelia, "pajjainae panematabakabüta irataeya oronanitoto. ⁷ Detsa pakujinae dajita tomara jumetane pena jumetsijawa piobijawanü, jibojabanü, citarajabanü, lirajabanü arpajawanü pipa wunujawa ata dajjita pejumetsijawa, dajjita pa tomara, nakua itsawiriajumenü ata jopaneya pematabakabüta pitabarata bajara pajumapekataenü oronanitota Nabucodonosor ira peevetsinü pe ejjanaejawa. ⁸ Nejjata bajara paeputa, itsamonae Caldeo monae kaponarena penekonita judiowi jaba betsina. ⁹ Pamonae jumeitsitsi ira pe evetsinü Nabucodonosor jababelia: lira peevetsinü niasaütsapunaponaejawa! ¹⁰ Jjamü, ira pe evetsinü, itsimü pajumetaeyabia bajü dajjita pajiviyo jumetane pejume pe obi jawa, jibo jabanü, citarajabanü, lira jabanü arpajabanü pipajawanü, dajjita pejümetsijaba. ¹¹ Pajiviyo apanukaetsane pematabakabüta yaiyataeya nejjata bajarapajivi jjuabia ejjanaenajü pitatsajabiosotojjaneto jabelia. ¹² Itsiata itsamonae judiowi jjamü vünüjoname pematatsunüa nakua provincia Babilonia ata; pevünü raja Sadrac, Mesac, Abed Nego ata. Mapa jivi, ira evetsinü, apo pekayaiyataekuenia. Pamonae apotonubenabiabi nija dioso, apo pematabakabüta oronanitota jjamü ne ejjanaenü. ¹³ Bajarapakuenia Nabucodonosor, bitso anaepana, itoroba petokaponaenejjatsirena Sadrac, Mesac, Abed Nego ata. Nejjata to kaporenatsi peitabarata ira pe evesinü jaba belia. ¹⁴ Nabucodonosor jumeitsitsi: "¿paitsumü, Sadrac, Mesac, Abed Nego ata, apo patatonubenabiabimü taja dioso apo panematabakabüta peitabarata jivitonü jumapekataenü oronanitota jjamü ejjaname. ¹⁵ Akonojjae, pajjamü pakakuene ujütsianatsi pananu benaename panematabakabüta petabarata jjanü itsinü, kujinae pajjamü jumetaima pejume pe obi jaba, jibojabanü, citaraviria, liraviria, arpajabanü pipa viria ata dajjita penajumetsijaba, dajjita pejjania kuene tsane. Betsi itsa apo pajjamü ponanubenaename, kae kuenia papekapenetsinejja pitatsajawi-isotojja netojawabelia. ¿ Jipatsa nija dioso pakakapanepae na taja kabeta jawata?". ¹⁶ Sadra, Mesac, Abed Nego ata jume pita ira pe evetsinü jaba belia: "Nabucodonosor, pajjanü apa jjanainü jjua yabana pakajumekanawiatsijitsiata, jjua yabara pekowü. ¹⁷ Aaja jaina jjüa yabara pakajumekanawiatsiji tsiatsi, beitsi pataja Dioso, pajjanü pa yaiyataeyanua, kuenekaüjüpatsi pataneka panepaejawa bajarapa-isoto jjaneto pitatsajawicutiawekua. Ponü nayawenonaina ira pa evetsinü pija pekobeta wekua. ¹⁸ Beitsi itsa ajibi, kayaputaeya ejjanaejawatsane jjamü javata, ira peevetsinü, apo pajjanü yaiyataeya tsi pajjamü nija dioso, apo wajjaitsi nabujjütsutatsi peitabarata pejjanaejumapekataenüjawabelia oronanitota jjamü ponakuenabame. ¹⁹ Nejjata Nabucodonosor ayei bitsi anaepana; pija yamu jujaniabiaya itsa itabonata jjaina pejumata kuene Sadrac, Mesac, Abed Nego jab belia. Ponü itoroba pita jurutsinejja, ayaikuenia piatajü ejjanaenejja siete (7) jjuabeje bitsa piatajü tsabiabi jabamipia atajijaba. ²⁰ Nejjata itoroba yajabüjünü peebijivi bitso piasaüwi pija wajabitsaüwiwekua pe küwa nejja Sadrac, Mesac, Abed Nego bana pepetsinejjatsilia bajara pa isotokotia jjaneto jababelia. ²¹ Pamonae kübejebatsi pe najjatabi javata pija pena matakionaejava, pejümapana penamataakatsi pana, itsa java penajjatsijava. Batsi jane peneriatsi bajara pa isotokotiajjanetojavalia. ²² Pepoyeyanakua-evetsinü pitorobijjae asaüya rovia pona, isotojjaneto bitso atajü, pa isotokotia beyajuabatsi pa jivi koponalia Sadrac, Mesac, Abed Nego ata. ²³ Akueyabi ma pa peebijivi, Sadrac, Mesac, Abed Nego ata, jopalia pe unü isotokotiajjanetojavabelia pe kübatsi abajjü. ²⁴ Nejjata Nabucodonosor pepopeyanakua evetsinü bariya nonotapuna bepijiayo. Ponü yanijoba pija pemujjujio banü: ¿Apopenetsiliatsi vajjaitsi akueyabi pa pebijivi penaküvitsi isoto javabelia? Pamonae jumekanaviata ira pepoevetsinü java belia: "Jania jaya jai pepopeya nakua evetsinü javabelia." ²⁵ Ponü jumeitsi "beitsi janü taninji penayanatsi papebi apa pakübinejevatsi, nubenapona isoto peünüalia, apa bajunübitsi atatsi. Bitso penivejayjaba boünüta be pejjunato dioso jaba." ²⁶ Nejjata Nabucodonosor iimojjoyota baupalia isoto jjaneto jabalia navajai tsajuabi: "Sadrac, Mesac, Abed Nego, petonakuenebinü Dioso pepo ayaijamatabükuenenü dajjitawekua papijajiwimü, ipapitsamure! ijota najjatsia" Nejjata Sadrac, Mesac, Abed Nego ata pavekua pitsapa bajara pa isoto jabaverena. ²⁷ Penamatakaitorobivi provincia, tomarajji, itsajava penamatakaitorobivi, pemujjujiobivi ira peevetsinü belia penakaituatsi tane mapajivitonü. Isorokotia apa perabuto apa abeje; pija matakionaejava apa abeje, apa tujjüvio pe isotokotia bajara pamonaeta. ²⁸ Nabucodonosor jumeitsi: Sadrac, Mesac, Abed Negobana pija Dioso raja ayaiyamatabukuene bitso, patsa itoroba pija najumelivaisi itoroba rajuta pija jumelivaisinü pija penakuenebinü pamonae yaitayakuenia ponü kujjinae apo ejjanae toja itorobajü, rajutsieya pija peperabüto pitabarata copiaya pematabükabüta itsa dioso javabelia.Betsi pija Dioso ajibi. ²⁹ Nejjata, janü itsijü kae jiveisi dejjita pa tomara, nakua pe jume ata pebisiakuenia barakuaikuaijai tsane pija Dioso javabelia Sadrac, Mesac, Abed Nego ata Nejjata pajivi natupatitibibiana, pija buo ata tobijianaenatsi be basura najuma eta beitsi jane apa ajibi itsa dioso peyawenonaetsi. ³⁰ Nejjata pe evetsinü nakua yavenona Sadrac, Mesac, Abed Nego ata provincia Babilonia jababelia.