¹ Sa tekivutale ko koya me vakatavulici ira a lewe vuqa era soqoni vata mai vei koya ena bogi ni matavura. A sa vodoka e dua a waqa ka jiko sobu ; a ra sa cewa a lewe vuqa ena bogi ni matavura me vakarorogo vei koya. ² A sa vakatavulici ira mai na vosa vakatautauvata ko koya. ³ Vakarorogo! A sa dua a dau kakaburaki sa kaburakini e so a sore ni kacu. ⁴ Ni kakaburaki tiko, e so era lutu e na baji ni wakolo ka ra lako mai a manumanu vuka ka kania. ⁵ E so tale a sore ni kacu sa lutu e na vanua veivatu ka lailai kina a qele. ⁶ Ia ni sa cabe cake mai a matanisiga, sa malai baleta ni sega na wakana; sa roqosa. ⁷ E so tale a sore ni kacu era lutu e na loma ni veiwavakavotona. A ra sa vakaruguta ka sega ni vua rawa. ⁸ E so tale a sore ni kacu sa lutu ki na qele vinaka, la tubu cake me vua vakalevu sara me tolu sagavulu, onosagavulu, la dua drau a vuana. ⁹ Sa qai kaya vei ira ko Jisu," O koya sa vakadaligana me rogoca, ka me rogoca sara!" ¹⁰ Ni sa jiko duadua ko Jisu, a ratou sa lako kina a lewe tinikarua ka tarogi koya me baleta a vosavakatautauvata. ¹¹ A sa kaya vei ira ko koya," Vei kemudou sa soli na vei ka vuni me baleta a matanitu ni Kalou." Ia vei ira a tani sa odra ga a vosa vakatautauvata. ¹² Ni ra rai era rai tu ga ka sega ni kila, de ra na qai veisau mai ka yaco me vosoti ira na Kalou. ¹³ A sa kaya vei ira ko koya,"Dou sa tara rawa a vosa vakatautauvata? E na rawa vakaivei mo dou kila a vosavakatautauvata tale e so? ¹⁴ Sa kaburaka a vosa na dauveikakaburaki. ¹⁵ Na dauteitei e kakaburakina a sore ni kacu e kakaburaka ba vosa iko lutu e so ena bogi ni wakolo, ia sa lako mai na tevoro ka kauta laivi mai vei koya na vosa e kaburakina. ¹⁶ o na vosa e kaburakini e na vanua veivatu; ko ira e ra rogoca na vosa ni Kalou ka ciqoma e na reki. ¹⁷ Me vaka ni sega ni vakawakana sara, e tubu cake ga vakalailai ia ni tubu ga mai na veikadredre kei na veivakacacani e na vuku ni vosa, e lutu ka bale. ¹⁸ A sore ni kacu e kaburakini ena kedra maliwa a wavakavotona, sai ira e ra rogoca na vosa, ¹⁹ ia na lomaocaoca e na vuku ni bula oqo kei nai yau e dau veivakaisini kei na dau gadreva na ka tani, sa curu ka vakaruguta a vosa, a sa sega kina ni vua. ²⁰ A sore ni kacu era lutu kina qele vinaka sai ira era rogoca a vosa ka ciqoma. A ra sa yaco me ra vua vakalevu, e tolusagavulu, onosagavulu, ka dua na drau, e so. ²¹ A sa kaya vei ira ko Jisu, "Ko cei e kauta mai nai cina kina loma ni vale ka mai biuta ena loma ni kato se na ruku ni mocemoce? Era biu ga e na i tutu ni cina me vakararamatakina a loma ni vale. ²² E sega bau a meca e vunitaki, me na sega ni na vakaraitaki mai e na matana levu. ²³ Kevaka e dua e vakadaligana, me rogoca sara!" ²⁴ A sa kaya vei ira ko koya," Mo vakatadudaliga kina veika ko rogoca. Ai vakarau ga ko vakarau takina e na vakarautaki tale vei iko, ka na levu tale a veika ena vakaikuri taki kina. ²⁵ Vei koya sa tu kina e so a meca ena soli vakalevu tale vei koya. Vei koya e sega bau kina a meca, a meca lailai ga sa tu kina e na kau laivi tale. ²⁶ A sa tukuna talega ko koya, "Na matanitu vakalomalagi sa tautauvata kei na tamata sa kaburakina a sore ni kacu ena were. ²⁷ Ni moce ka yadra tale mai ena mataka sa raica ni sa kadre ka tubu mai na veika e a kaburaki, ka sega madaga ni kila se yaco vaka i vei a meca i ei. ²⁸ Ni sa vua vakai koya ga a qele sa mada a buroro sa tarova a sola, sa qai muri mai a vuana e matua ena sola. ²⁹ Ia ni sa matua mai a vanua, sa qai tala yani nai sele takeklo ni sa cava na yabaki." ³⁰ A sa kaya tale ko koya, ketatou na vakatautauvatatakina kei na cava a matanitu vakalomalagi? Se cava na vosa vakatautauvata me da vakayagatakina me vakamacalatakina? ³¹ Sa vaka a sore ni mosita, o koya ni sa tei ena qele, sa lailai sobu vei ira kecega a sore ni kacu ena qele. ³² Ia ni sa tei ena qele, a sa tubu cake me dua a vunikacu levu cake vei ira taucoko a kacu lalai, a sa vakatabana vakaidina, a sa ro rawa na manumanu vuka ena kena malumalu. ³³ Sa levu a vosa vakatautauvata vaka i ei sa kaya vei ira ko koya me vaka ni ra sa rogoca. ³⁴ A sa vosa jikoga ki vei ira ena vosa vakatautauvata. Ia ni sa jiko duadua ko koya, sa vakamacalatakina na vei ka kece sara ki vei ira a ona tisaipeli. ³⁵ Ia ena siga mai ei ni sa kayavi mai a vanua sa kaya ko koya vei ira,"Meta lako yani ki tai kadua." ³⁶ Ia ni ra sa laivi ira na lewe vuqa, era sa kauti Jisu vaka ko ya ena waqa, ka sa sega tale a waqa l ailai ka so tale a waqa lailai era sa jiko vata kaya. ³⁷ A sa tubu e dua a cagi kaukauwa sara, a sa roba a ua lelevu ka sa voleka sara me sinai a waqa ena wai. ³⁸ Ia ko Jisu sa jiko ena mua i muri ni waqa ka moce va kali no. A ra sa vakayadrati koya ka kaya vua ,"Vakavuvuli ko sa wele beka ga ka sa voleka metatou mate?" ³⁹ A sa tucake ko koya ka vunauca a cagi ka kaya kina wasawasa,"Mo cegu! Ka maravu mai!" A sa ruru a cagi, a sa maravu levu mai. ⁴⁰ A sa kaya vei ira ko koya," A cava dou sa rere kina? Sa sega beka a omudou vakabauta?" ⁴¹ A ra sa rere vakalevu, a ra sa veikayayakina vakai ira, "O cei beka oqo ni sa talei rawarawa a cagi kei na wasawasa?"