¹ A ratou sa lako mai a Farisi kei na tokani I Setoki me ratou mai vakatovolei koya me vakaraitakina vei ratou e dua ai vakatakilakila mai lomalagi. ² Ia a sa sauma vei ratou ka kaya, " Ni sa dau dromu sobu a matanisiga, dou dau kaya, ena draki vinaka ni mataka, baleta ni damudamu a lomalagi. ³ Ni sa mataka mai, dou kaya, ena draki ca baleta ni damudamu a lomalagi ka loaloa a kena o. Dou matai sara ni vakamacalatakina ai vakatakilakila ni gauna. ⁴ Ai tabatamata ca ka dauyalewa ka dau vakasaqara ai vakatakilakila, ia ena sega ni soli vei kemudou ai vakatakilakila; ai vakatakilakila ga i Jona. A sa biuji ira ko Jisu ka lako yani. ⁵ Ni ratou sa yaco a tisaipeli ki tai kadua, e ratou tawa nanuma me ratou vakayagatakina a madrai. ⁶ A sa kaya vei ratou ko Jisu, " Dou qarauni kemudou vinaka mai na odra leveni a Farisi kei ira ai tokani i Setoki." ⁷ E ratou sa veivosaki vaka i ratou a tisaipeli ka kaya, " Kai e baleta beka ni ketatou sega ni vakayagatakina e dua a madrai." ⁸ Sa kila ko Jisu a meca eratou kaya ka sauma kivei ratou, " Sa lailai jina a omudou vakabauta, a cava dou sa veikayakina vakai kemudou ni dou kaya baleta beka ni ketatou sega ni vakayatakina e dua a madrai? ⁹ Dou a sega beka ni vakasamatakina se nanuma a lima ai puli madrai me kedra a le lima a udolu kei na vica a sova dou a kumuna kina a kena vo? ¹⁰ Se na vitu ai puli me kedra a va a udolu kei na vica a sova dou a kumuna kina a kena vo? ¹¹ cava beka dou se sega ni kila kina niu a sega ni vosa jiko vei kemudou vinaka mai na odra leveni a Farisi kei nai tokani i Setoki." ¹² A ratou sa qai kila rawa ni a sega ni vosatakina jiko vei ratou baleta a leveni ka jiko ena madrai, me ratou qarauni ratou ga mai na odra i vakavuvuli a Farisi kei ira ai tokani i Setoki. ¹³ Ia ni sa yaco ko Jisu ki na veivanua vaka Sisaria Filipai, sa tarogi ratou a ona tisaipeli ka kaya, " Ko cei era kaya ni ko koya a Luve ni Tamata?" ¹⁴ Eratou kaya, "Eso era kaya ko iko ko Joni a dauveipapitaisotaki, eso era kaya ko Ilaijia, kei na so tale, ko Jeremaia se dua vei ira a porofita. ¹⁵ A sa tarogi ratou, " Ia a cava dou kaya baleji au?" ¹⁶ A sa sauma ko Saimoni Pita ka kaya, " Ko iko a Karisito, a Luve ni Kalou bula." ¹⁷ " Sa kalougata ko iko, Saimoni Pa Jona, ka ni sega ni vakaraitakina vei iko a lewe kei na dra, ia a Tamaqu ga sa jiko mai lomalagi. ¹⁸ Ka'u sa kaya talega vei iko Pita, ena dela ni vatu kai au na tara kina a oqui soqosoqo lotu. A matamata mai Etesi ena sega ni kaukauwa kina. ¹⁹ Au na solia kivei iko ai dola ni matanitu mai lomalagi. A cava ga ko na vauca i vuravura, ena vauci vakakina mai lomalagi, a cava ga ko na sereka i vuravura, ena sereki talega mai lomalagi." ²⁰ Sa qai vakaroji ratou a ona tisaipeli me ratou kua ni kaya tale kina dua ni sai koya a Karisito. ²¹ Mai na gauna mai, sa kaya ko Jisu vei ratou a ona tisaipeli ni na lako ki Jeruisalemi, sotava a vei dredre eso ena ligadra a qase, a bete levu kei ira a vunivola, vakamatei, qai bula tale mai na mate enai katolu ni siga. ²² Sa qai kauji koya vakajikijiki ko Pita me vunauci koya ka kaya, " Me yawa sara vei kemunu a meca i qoya, Turaga, me kua ni yaco vei kemunu." ²³ A sa vuki ko Jisu ka kaya vei Pita, " Mo lako ki dakuqu Setani! ko sa via vakatarabetaki au, ni ko sa sega ni kauwaitakina a vei meca ni Kalou, a meca ga ni vakatamata." ²⁴ Sa vosa ko Jisu vei ratou a ona tisaipeli ka kaya, " Kevaka e dua sa via muri au, e dodonu me cakitakini koya mada i mada taura cake a ona kauveilatai, ka muri au. ²⁵ Ko koya e via maroroya a ona bula, ena vakayalia, ia ko koya ena vakayalia a ona bula ena vukuqu, ena taukena tale. ²⁶ Ni cava a kena yaga vua a tamata kevaka e rawaji vuravura taucoko ka vakayalia a ona bula? A cava ena rawa ni solia mei sau ni yalona? ²⁷ Ni na lako mai a Luve ni Tamata e nai ukuku wei Tamana kei ira a ona agilosi. Ena qai mai solia ai sau ni tamata yadua me vaka ga a vei meca e valata. ²⁸ Au sa kaya vakaijina vei kemudou, eso vei kemudou ka tucake jiko iei ena sega mada ni mate ka yacova ni kemudou raica a Luve ni Tamata ni sa lako mai kina ona matanitu.