1
Sa qai lako mai vei Jisu ko ira a vunivola kei ira a Farisi mai Jeruisalemi ka kaya,"
2
Ka cava ka talidredre kina a omu jisaipeli kina odra vakavuvuli a qase? Ni ra sa kana ka ta vuluvulu."
3
Ka sa vosa ko koya ka kaya vei ira," Ka cava dou sa talaidredre talega kina vunau ni Kalou ena omudou i vakavuvuli?"
4
Ni sa vakarota a Kalou ka kaya," Vakarokoroko vei rau a tamamu kei a jinamu: ia ko koya sa vosa vakacacatakini tamana se jinana me sa vakamatei.
5
Ia dou kaya o koya yadua ka kaya vei tamana se jinana sa vakatabui me ona a Kalou ni oqu ka, ka yaga vei iko:
6
Me sa qai ta vakarokoroko vei tamana se jinana. Ia dou sa vakawaletakina ai vunau ni Kalou e omudou i vakavuvuli.
7
Ka dau veivakaisini ko i kemudou ka tukuni kemudou vakavinaka i mada ko Aisea ka kaya,"
8
Ko ira a tamata i ei era sa vakarokorokotakini au ena tebenigusudra, ia na yalodra ka yawa tani vei au."
9
A sa ta yaga a odra masuji au, ni ra sa vakatavuvulicitakina a vunau ni tamata mei vakavuvuli.
10
A sa kacivi ira a lewe vuqa ka kaya vei ira," Dou rogoca ka vakasamatakina:
11
A ka sa curu kina gusuna sa tawa vakadukadukalitakina a tamata, ia na ka ga sa lako mai na gusuna, sai koya ga sai vakadukadukalitakina a tamata.
12
Sa qai lako mai ko ira a ona jisaipeli ka kaya vua," Oni sa kila beka era sa lomaca a Farisi, ni ra sa rogoca a vosa ka i ?"
13
A sa vosa ko koya ka kaya," A kau vakaduaga, ka sega ni tea ko Tamaqu vakalomalagi ena cavu laivi. Dou laivi ira ga: era sa mataboko, a ra sa tuberi ira a mataboko.
14
Ia kevaka e tubera a mataboko ko a mataboko, e rau na sikalutu ruarua enai keli.
15
Sa qai vosa ko Pita ka kaya vua," Mo ni tukuna mai vei keitou a vosa vakatautauvata i ei."
16
A sa kaya ko Jisu," Oi kemudou talega, dou sa ta kila rawa?
17
Dou sa sega beka ni kila a ka kecega sa curu kina gusu sa lutu kina kete, a sa biu yani kina benubenu?"
18
Ia a veika sa curu mai a gusu, sa lako jina mai a yalo, veika i ei, sa vakadukadukalitakina a tamata.
19
Ni sa curu mai a yalo a nanuma ca, a daulaba, a dauyalewa, a dau dara, a dau butako, a dau veibetaki vakailasu, a dau vosavakacaca.
20
A veika i ei sa vakadukadukalitakina a tamata, ni sa kana ka tawa vuluvulu madaga.
21
Sa qai lako tani ko Jisu ka laki veiyasana ko Taia kei Saitoni.
22
Ka raica ka dua a yalewa ni Kenani ni sa laki mai yasana ka sa tagi vua, ka kaya," Ni lomani au mai na Turaga a Luvei Tevita: Na luvequ yalewa ka rarawa vakalevu ni sa curumi koya e dua a jimoni."
23
A sa tawa kaya e dua a meca ko koya, a sa lako mai ko ira a ona i jisaipeli ka masuji koya ka kaya," Vakatalai koya tani: ni sa mai tagi muri keta jikoga ko koya.
24
Ka sa vosa ko Jisu ka kaya," Au sa tawa ni talai vei ira a tani, vei ira ga a sipi ni mataqali e Isireli era yali tu."
25
Sa qai lako mai a yalewa ka cuva vua ka kaya," Kemunu a Turaga, ni vukei au mai."
26
Ka sa vosa ko koya ka kaya,"Sa sega bau ni vinaka me kau a kedra a lalai, me biu vei ira a koli."
27
Ka sa kaya a yalewa," E jina ga: a Turaga ko ira a koli era sa kania a mirimiri ni kakana sa lutu mai ena odra tepeli a odra turaga.
28
Ka qai vosa ko Jisu ka kaya vua,"Yalewa, sa levu a omu vakabauta: me yaco vei iko me vaka na ka ko sa vinakata." A sa bula na luvena yalewa ena tikini siga koya.
29
Ka sa lako tani mai ki kea ko Jisu ka lako voleka kina wasawasa ko Kalili: a sa cabe cake kina ulunivanua ka jiko sobu kina.
30
Ka ra sa lewe vuqa sara sa lako mai vua, era sa kauta mai a lokiloki, a mataboko, a galu, a gera, ka lewe vuqa tale; a ra sa kotomi ira sobu kina yava i Jisu: a sa vakabulai ira ko koya.
31
Ka ra sa kurabui kina ko ira a lewe vuqa, ni ra sa raica sa vosa rawa a galu, sa bula a gera, sa lako rawa a lokiloki, a sa rai rawa a mataboko: a ra sa vakacacautakina a Kalou i Isireli.
32
Ka qai kacivi ira mai a ona jisaipeli ko Jisu, ka kaya," Au sa lomani ira a lewe vuqa, sa qai bogi tale era sa jiko ga vei au, a sa sega a ka me ra kania ia kau sa segu ni via vakatalai ira yani ni ra sa sega ni kania, de ra malumalumu ena wakolo.
33
Ka sa kaya vua a ona jisaipeli,"Eda sa rawata mai veii a madrai e lekutu, me ra mamau kina ko ira a lewe vuqa i ei?"
34
Ka sa kaya vei ira ko Jisu,"E vica ai puli madrai sa jiko vei kemudou?" A ra sa kaya e vitu ka sa a ika lalai.
35
Ka sa vosa ko koya vei ira a lewe vuqa, me ra jiko sobu ena qele.
36
Ka sa taura ko koya ai puli madrai e vitu kei na ika, a sa vakavinavinakatakina, ka sa dovia, ka sa solia vei ira a ona jisaipeli, ia ko ira a jisaipeli era sa solia vei ira a lewe vuqa.
37
Ka ra sa kana kecega, ka ra sa mamau, ka ra sa tomika vata a veika ka sa dovi, ka sa vitu a sova ka sinai kina.
38
Ia ko ira ka kana, era sa lewe va a udolu a tagane, ia ko ira a yalewa kei na gone era sa ta wili kina.
39
Ka sa talai ira yani a lewe vuqa ko koya, a sa qai vodoka a waqa, ka sa tadu kina yasayasa vaka Makitala.