¹ E na gauna mai ei sa rogoca ko Eroti a Turaga ai rogorogo kei Jisu. ² A sa kaya vei ira a ona tamata dauveiqaravi kai ei ko Joni a dauveipapitaisotaki ka sa tu cake tale mai na mate, ka sa ia mai vei koya a kaukauwa mana. ³ Ko Eroti sa vesuki Joni ka biuji koya ki vale-ni-veivesu, baleji Erotiasa, na waji Filipi, a tacina. ⁴ A sa kaya vua ko Joni," E tabu vei iko o tauri koya me wajimu." ⁵ Ia ni sa via vakamatei koya, a sa rerevakini ira a lewe vuqa ni ra sa vakasama ni sai parofita ko koya. ⁶ Ia ni sa vala oji a magiji ni siga ni sucu i Eroti, sa meke e matadra a goneyalewa a luvei Erotiasa ka sa marautakina ko Eroti. ⁷ O koya i ei sa yalatakina vua ko koya ka bubului kina me solia vua a meca taucokoe kerea vua. ⁸ Ia ni sa vakavulici koya mada ko jinana ko kaya vua," Solia mai vei au i ei ena dua a dari a ului Joni a dauveipapitaisotaki. ⁹ Sa qai burisi a tui: ia sa kaya ga me soli ena vuku ni ona bubului ina vukudra talega era sa kana vata. ¹⁰ A sa talai koya ka me musu mai a ului Jone mai na vale-ni-veivesu. ¹¹ Sa qai kau mai ina dua a dari ka soli vua a goneyalewa: ka sa kauta vei jinana. ¹² A ra sa qai lako mai a ona tisaipeli ka kauta a yagona ka buluta. Ni oji, era sa laki kaya vei Jisu. ¹³ Ia ni sa rogoca ko Jisu sa soko vakatikitiki tani ina waqa kina dua a vanua lala; ia ni ra sa rogoca a lewe vuqa era sa taubale e vanua mai a veikoro ka muri koya. ¹⁴ A sa lako mai ko Jisu ka boki ira a lewe vuqa, a sa lomani ira, a sa vakabulai ira a odra tauvimate. ¹⁵ Ia ni sa yakavi mai sa lako mai vei koya ko ira a ona tisaipeli ka kaya," Sa vanua lailai i ei ka sa kala a siga: mo vakatalai ira yani i ei kina veikoro lalai me ra volia kina a kedra." ¹⁶ A sa kaya vei ira ko Jisu," Sa sega ni yaga vei ira me ra lako, mo dou solia vei ira e dua a meca me ra kania." ¹⁷ A ra sa kaya vua," Sa jiko i ei e lima ga a puli madrai kei rua a ika." ¹⁸ A sa kaya ko Jisu," Dou kauta mai vei au." ¹⁹ Sa qai vosa vei ira a lewe vuqa ko Jisu ka kya vei ira me ra jiko sobu ina co. A sa taura a lima ai puli madrai kei a rua a ika, a sa tacake ki lomalagi ka lotutakina. A sa dovia a veipuli madrai, ka solia vei ira a tisaipeli, ia ko ira a tisaipeli era sa solia yani vei ira a lewe vuqa. ²⁰ A ra sa kana ka mamau. A ra sa tomika vata a vo ni ka sa dovi; a sa jinikarua ai su sa sinai kina. ²¹ Ia ko ira era sa kana era sa lewe lima beka a udolu ka tawa wili kina ko ira a yalewa kei ira a gone lalai. ²² Sa qai vakaroji ira a ona tisaipeli ko Jisu me ra vodoka a waqa ka mada yani ki tau kadua, me sa vakatalai ira mada yani a lewe vuqa ko koya. ²³ Ia ni sa vakatalai ira oji a lewe vuqa, sa qai lako cake kina ulunivanua me masu. Ia ni sa yakavi mai, sa jiko duaduaga ko Jisu. ²⁴ A sa jiko i loma ni matasawa a waqa ka sa suaigelegele ena ua, ia sa liova a cagi leca. ²⁵ Ia ina i kava ni wase ni bogi, sa lako vei ira ko Jisu ka taubale e dela ni wai. ²⁶ Ni ra raici koya a tisaipeli ni sa taubale e dela ni wai, a ra sa taqaya ka kaya," Sa dua a yalo." A ra sa qoqolou ni ra sa rere. ²⁷ Sa vosa vei ira ko Jisu ka kaya," Dou vakacegu, koi au ga; dou kakua ni rere." ²⁸ A sa vosa ko Pita ka kaya vua," Turaga kevaka oi kemuni oqori, kacivi au meu lako yani vei kemuni ena dele ni wai." ²⁹ A sa kaya ko Jisu," Lako mai." Ia ni sa sobu mai ko Pita, ka sa laki dele ni wai me laki vei Jisu. ³⁰ Ia ni raica ko Pita ni sa kaukauwa a cagi, sa qai rere: Ia ni sa vakatekivu me lutu dromu, sa kaci sara ko koya," Turaga ni vakabulai au." ³¹ A sa dodoka yani a ligana ko Jisu, a sa tauri Pita ka kaya vua," Ko iko sa lailai a omu vakabauta, ko sa vakajijiqa ina vuku ni cava?" ³² Ia ni rau sa vodo ki waqa ko Jisu kei Pita, sa ruru a cagi. ³³ Ia ko ira a tisaipeli mai waqa, era sa cuva ka lotu vei Jisu," Sa jina sara kemunu sa Luve ni Kalou." ³⁴ A ra sa lako ki tai kadua, a ra sa yaco kina vanua ko Kenisareji. ³⁵ Ia ni ra sa kilai koya ko ira a tamata mai na yasana koa, era sa talatala ki na yasana kecega sa vakavelivelita, a ra sa kauji ira kecega mai vua era sa tauvimate. ³⁶ A ra sa masuji koya me ra tara walega a tutu ni ona i sulu: a ra sa bula sara ko ira kecega sa tara.