¹ Sa bogi ono sa qai kauji Pita kei Jemesa, kei Joni na tacina, ko Jisu, a sa kauji ratou vakajikijiki kina dua na ulunivanua cecere. ² A sa matalia na yagona e matadratou, a sa rarama na matana me vaka na mata ni siga, ka sa vulavula mai na ona i sulu me vaka na rarama. ³ Ka raica, sa basika vei iratou ko Mosese kei Ilaijia, a ratou sa veivosaki kaya. ⁴ Sa qai vosa ko Pita, ka kaya vei Jisu," Na Turaga, sa vinaka na wetatou tiko eke, kevaka ko ni sa vinakata, me keitou tara iai e tolu na vale vakacevaceva, e dua me omunu, ka dua me wei Moses, ka me dua me wei Ilaijia." ⁵ Ni sa vosa jiko ko kea, raica sa dua o lumilumisa sa vakarurugi iratou, ka raica, sa rogo e dua mai na o, sa kaya, " Oqo na qou gone ni toko, au sa dau vinakata vakalevu, dou vakarogoci kea." ⁶ Ia ni ratou sa rogoca na tisaipeli, eratou sa cuva vakatoboicu ka ra sa rere vakalevu. ⁷ A sa lako mai ko Jisu ka tarai iratou,ka kaya, "Tucake kakua ni rere." ⁸ Ia ni ratou sa tucake, ratou sa sega ni raica e dua tale, ko Jisu duadua ga. ⁹ Ia ni ratou sa lako sobu jiko mai na ulunivanua, sa vakarota vei iratou ko Jisu ka kaya, "Kakua ni kaya vei dua na ka sa rairai, ka vakalailai mada me tucake tale mai na mate na luve ni tamata." ¹⁰ A sa tarogi kea ko iratou na ona tisaipeli, ka kaya, " A cava era kaya kina na vunivola ni sa dodonu me mata mai ko Ilaitia?" ¹¹ A sa vosa ko Jisu, ka kaya vei iratou, "Sa lako jina mada mai ko Ilaijia, me vukia na ka kece me vinaica tale. ¹² Ia kau sa kaya vei kemudou, sa lesu eke ko Ilaijia a ra sa sega ni kilai koya, a ra sa valata vei kea a meca taucoko ga, era sa vinakata, era na vakararawataka vaka talega kina na Luve ni Tamata." ¹³ Eratou sa qai kila na tisaipeli, ni sa qai vosataki Joni Dauveipapitaiso vei iratou ko kea. ¹⁴ Ia ni ratou sa yaco vei ira na lewe levu, sa lako mai vei kea e dua na tamata, ka tekiduru vua, ka kaya. ¹⁵ "Kemunu na Turaga, ni lomani koya mada luvequ-tagane ni sa tauvi kea a riva, a sa rarawa vakalevu, sa bale vakalevu kina na buka waqa, ka vakalevu talega ki wai. ¹⁶ Ia kau a kauta veiratou a omuni tisaipeli, a ratou sa sega ni vakabulai kea rawa. ¹⁷ Sa qai vosa ko Jisu, ka kaya, "Ai tabatamata tawa vakabauta ka yalo vakatani, a cava na kena dede meu vosoji kemudou? Kauji kea mai vei au ki ai." ¹⁸ Sa qai vunauca na tevoro ko Jisu, a sa lako tani mai vei kea, a sa bula na gone ena tiki ni siga koya. ¹⁹ Era sa qai lako vakajikijiki mai na Tisaipeli vei Jisu era kaya, "Ena vuku ni cava keitou sa sega ni vakatalai kea tani kina." ²⁰ A sa kaya vei ira ko Jisu, "Ena vuku ni dou sa sega ni vakarauta, niu sa kaya vakaijina vei kemudou ke vaka e tu vei kemudou na vakabauta e vaka na sore ni mosita, dou na kaya kina ulunivanua iai, 'Lako laivi ki kea,' ka na lako tani, a sa sega na ka e dredre vei kemudou. ²¹ Ia ko ira sa vakaoqo, era sa sega vakatalai tani wale, ena daumasu ga kei na daulolo. ²² Ia ni ra sa lako voli e Kalili, sa kaya vei ira ko Jisu, ena soli yani na Luve ni tamata, kina ligadra na tamata. ²³ Ka ra na vakamatei kea, ka na vakaturi cake tale mai ko kea enai katolu ni siga, a sa rarawa vaka levu na lomadra. ²⁴ Ia ni ra tadu ki Kapenaumi, sa lako mai vei Pita, ko ira sa kumuna vata na soli ki na vale ni Kalou, ka kaya, "Sa sega li ni ia na soli ki na vale ni Kalou na nomudoui vakavuvuli." ²⁵ Sa kaya ko kea, "So solia." Ia ni sa curu ki vale, sa vosa taumata ko Jisu ka kaya, "A cava ko lewa Saimoni era sa taroga vei cei nai vakacavacava se na soli ko ira na Turaga vakavuravura? Vei ira na nodra gone, se vei ira ga na tani? ²⁶ Sa kaya vua ko Pita, "Vei ira ga na tani," sa kaya ko Jisu, "Sa oai lalaga na gone." ²⁷ Ia meda kakua ni vakacalai ira, mo lako ki matasawa, ka viritaka na siwa, ka taura na ika, ka yavi mada mai, ia niko sa basuka a drakana, ko na raica kina edua silini, oqori mo kauta, ka solia vei ira me nodarui tavi.