¹ Ena gauna mai ei sa laki loma ni were-ni-sila ko Jisu. A ra sa viakana a ona tisaipeli, a ra sa dodoka yani a ligadra ka bejia a vei sola ni sila, ka kania. ² Ia ni ra sa raica a Farisi, era sa kaya vei Jisu," Raica ko ira a omui tisaipeli era sa valata a meca tawa dodonu ena siga ni vakacecegu.'' ³ Ia ko Jisu sa kaya vei ira," Dou sa sega ni wilika a meca ka valata ko Tevita, ni sa viakana kei ira a tamata era jiko vata? ⁴ Ni sa curu ko koya kina vale ni Kalou ka kania a madrai sa douraici, oqori sa tawa tara vua se vei ira sa jiko vata kaya, vei ira duaduaga a bete? ⁵ Dou sa ta beka ni wilika e nai vunau, ni ra sa vakacacana a siga ni vakacecegu ko ira a bete ena le ni soro, ka ra sa ta cala kina? ⁶ Ia au sa kaya vei iko, o koya sa levu cake mai a vale ni soro sa jiko i ei. ⁷ Ia kevaka dou sa kila ai balebale ni vosa kai i ei, au sa vinakata a yalololoma ka segai ai soro, dou na ta beitakini ira era sa tawa cala. ⁸ Ni sa Turaga talega ni siga ni vakacecegu a luve ni Tamata. ⁹ Sa qai lako tani mai ko Jisu ka curu kina odra vale ni lotu. ¹⁰ Ka raica sa jiko kina e dua a tamata sa malai a ligana. A ra sa tarogi Jisu a Farisi ka kaya," E tara me ia a veivakabulai ina siga ni vakacecegu, se sega bau? Ka ni ra via beitakini koya me cala. ¹¹ A sa kaya vei ira ko koya," O cei vei kemudou, kevaka e dua ga a ona sipi, ia kevaka e mani lutu a sipi kina loma ni dua a qara ena siga ni vakacecegu, ena ta beka ni laki taura ka tubera cake mai? ¹² Ka vakaivei a kena uasivi cake a tamata mai a sipi! O koya i ei sa tara me vala a ka vinaka ena siga ni vakacecegu. ¹³ Sa qai kaya ko Jisu vua a tamata," Dodoka mai a ligamu." A sa dodoka yani, a sa vakabulai ka yaco me vaka a ligana kadua. ¹⁴ Ia ko ira a Farisi era sa curu yani ki tuba ka bosea se ra vakamatei ka vakaivei? ¹⁵ Ia ni sa kila ko Jisu, sa lako tani mai kea: a ra sa muri koya a lewe levu ka sa vakabulai ira vakaduaduaga ko koya. ¹⁶ A sa vakaroji ira ko koya me ra kakua ni tukuna vua e dua tale. ¹⁷ Me yaco me jina ga kina a meca e a kaya ko Aisea a parofita. ¹⁸ Raica a qou i talatala ko koya au sa jigitakina. A qou gone ni toko, au sa vinakaji koya vakalevu mai na vunilomaqu. AU na solia vua a qou Yalo Tabu. Ia ena tukina ko koya lewa dodonu vei ira a kai matanitu tani. ¹⁹ Ena tawa veileji se tagi ena domolevu. Ena sega bau e dua rogoca a domona mai na soqata ni koro. ²⁰ Ena tawa ni musulakini a gasau sa bibivoro ko koya. Sa bokoca a wa-ni-cina e kubou walega. Ka me tala mada yani a lewa dodonu me gumatua. ²¹ Ena yacana era sa vakararavi kina a kai matanitu tani. ²² Sa qai kau mai vei koya edua sa curuma e dua a tevoro, sa mataboko ka galu talega: a sa vakabulai koya ko koya, ia sa vosa ka rai kina ko koya sa mataboko ka galu. ²³ A ra sa kurabui a lewe vuqa ka kaya," Ko koya i ei e luve i Tevita se segai?" ²⁴ Ia ni ra sa rogoca ko ira a Farisi era sa kaya," Ko koya ka i ei e tawa wacarai ira a tevoro e kaukauwa ga i Pielisipupi a odra turaga a tevoro." ²⁵ A sa kila ko Jisu a odra vakanananu ka kaya vei ira," A matanitu yadua sa veisei vakai koya, ena vakarusai kei na koro yadua se vale sai vei veicaji vakai ira e tawa tudei. ²⁶ Ia kevaka sa wacarai Setani ko Setani sa qai veisei a ona matanitu, ena qai tudei vakaivei a ona matanitu? ²⁷ Ia kevaka au sa vakuturimi ira tani a tevoro ina kaukauwa i Pielisipupi, sa qai kaukauwa i cei era sa vakuturimi ira jiko kina ko ira a omudou? O koya i ei era sa vakalewai kemudou kina. ²⁸ Ia kevaka au sa wacarai ira a tevoro ina kaukauwa ni Yalo Tabu, sa qai yaco jina vei kemudou a matanitu ni Kalou. ²⁹ E rawa vakaivei vua e dua me curuma a ona vale a qaqa, me kovea mai a ona i yau, ka sega ni vesuka mada a qaqa? E na qai vesu e muri a ona i yau. ³⁰ Ko koya sa tawa totaki au sa to tani; ia ko koya sa sega ni kumuna vata sa duibiubiuta. ³¹ O koya ka i ei au sa kaya kina vei kemudou, ai valavala ca, kei a odra vosa ca kecega a tamata sa rawa me ra tawa burisitakini a tamata era sa vosavakacacatakina a Yalo Tabu. ³² Ia ko koya yadua sa vosavakacacatakina a Luve ni tamata, ena rawa me kakua ni burisitakini kina, ia ko koya sa vosavakacacatakina a Yalo Tabu, ena tawa sara ni rawa me kakua ni burisitakini ina gauna i ei se na gauna sa muri mai. ³³ Mo valata a vunikacu me vinaka, ena vinaka talega kina a vuana, se valata a vunikacu me ca, ena ca talega a vuana; ni sa kilai a kau ena vuana. ³⁴ Oi kemudou a kawa ni gata, ni dou sa tamata ca, e rawa vakasara vei kemudou mo dou vosatakina a ka vinaka? ³⁵ Ni sa vosatakina a gusuda a meca sa osota tu a lomada. A tamata vinaka sa kauta mai a ka vinaka mai na vinaka ni lomana; kei ira a tamata ca mai na lomana e ca. ³⁶ Au sa kaya vei kemudou, ena siga ni veilewai, a tamata vakaidinaga e na lewai e na vuku ni veivosa kecega era sa cavuta. ³⁷ Ni ko sa vakadonui e na vuku ni omu vosa, ka ko sa burisitakina e na vuku ni omu vosa. ³⁸ Sa qai vosa e so a Farisi kei na vunivola ka kaya," Vakavuvuli keimami sa via raica e dua ai vakatakilakila mai vei iko." ³⁹ A sa vosa ko koya ka kaya vei ira, ai tabatamata ca koi valavalaca, sa vakayasava ai vakatakilakila, ia ena sega bau ai vakatakilakila me soli kina, ai vakatakilakila ga i Jona a parofita. ⁴⁰ Me vaka ga ni a tolu a siga ka tolu a bogi ko Jona ina loma ni kete ni ika levu, ena siga tolu ka bogi tolu vaka talega kina a Luve ni tamata ena loma ni qele. ⁴¹ Ko ira a tamata mai Ninive era na tucake ena gauna ni veilewai ka vakajinajinatakina a odra cala ai tabatamata i ei, ni ra sa veivutuni ina vunau i Jona; ka raica e dua i ei sa uasivi vei Jona. ⁴² Ena tucake a radini Ceva ena veilewai ka vakajinajinatakina a odra cala ai tabatamata i ei, ni a lako mai ko koya mai a yasana vakayawa sara e vuravura me rogoca a vuku a vuku i Solomoni ; ka raica sa dua e ke sa uasivi vei Solomoni. ⁴³ Ia ni lako tani a yalo tawasavasava mai vua a tamata, sa qai veilakoyaki voli ina vanua dravuisiga, me vakayasava ai vakacegu, a sa tawa boka. ⁴⁴ A sa kaya, au na lesu tale kina qou vale kau a lako mai kina, ia ni sa lesu tale sa boki ni sa lala tu, a sa taviraki vinaka tu ka vakaiukuukutaki. ⁴⁵ A sa lesu tale ka kauta tale mai e vitu a yalovelavela sa uasivi vei koya ina ca, a ratou sa curuma ka jiko kina, a sa ca vakalevu e muri a tamata mai i ei, ka ca vakalailai i mada. ⁴⁶ Ia ni sa vosa jikoga ko koya vei ira a lewe levu, raica sa tu e tautuba a jinana kei matacina, eratou sa via vosa vua. ⁴⁷ Sa qai kaya vua e dua, Raica, sa tu e tautuba a jinamu kei iratou a tacimu, eratou sa via vosa vei iko. ⁴⁸ Sa qai vosa ko Jisu ka kaya vei ira, vei ira sa kaya vua," O cei a jinaqu? Se ko cei ko iratou a taciqu? ⁴⁹ A sa dodoka yani a ligana ki ivei ira a ona tisaipeli ka kaya," Raica a jinaqu kei ira a taciqu." ⁵⁰ Ko koya yadua sa valata a loma i Tamaqu sa jiko mai lomalagi, sa koya i ei a jinaqu, kei a ganequ kei a taciqu.