¹ Ko Karisito e sa sereki kemudou; mo dou tudei ka kakua tale ni vakataotaki jiko inai vua mo dau bobula kina. ² Raica, koi au ko Paula, au sa kaya vei kemudou, kevaka dou sa valata jiko a veicilivi, e na vakatawayagatakini kina vei kemudou a Karisito. ³ Au sa vakadinadina tale vei ira a tamata yadua era sa cilivi, ni ra sa rawa tu mera muria ai vunau taucoko. ⁴ Dou sa tawase tani mai vei Karisito, oi kemudou kecega sa vaka mo dou vakadonui e nai vunau, dou sa bale mai na loloma. ⁵ Ena vuku ni vakabauta eta sa waraka ka vakanuinui kina, ina veivuke ni Yalo Tabu meta vakadonui kina. ⁶ I na vuku ni vakabauji Karisito Jisu, sa tawa yaga me cili se me tawa cili, sa yaga ga a vakabauta sa daucakacaka ena loloma. ⁷ Kemudou, sa kada vinaka jiko mai, ko cei sa tarovi kemudou mo dou kakua kina ni talairawarawa kinai vakavuvuli jina? ⁸ A veivaksaurarataki iei e sega ni lakomai vei koya sa kacivi kemudou. ⁹ E dua a luveni lailai sa valata me tubu ai buli taucoko. ¹⁰ Au sa lomadei ina Turaga ni dou na sega ni lomavakatani, ia ko koya ga e vakayavalaji kemudou, ena rawata a kenai sau. ¹¹ Kemunu a veiwekani, kevaka kau sa vunautakina jiko a veicilivi, a cava au sa vakacacani kina? Sa qai cegu a veivakatarabetaki ena vuku ni kauvelatai. ¹² Ko ira era sa vakayavalaji kemudou, au sa vinataka mera muduki laivi. ¹³ Vei kemuni a veiwekani, dou sa kacivi mo dou lalaga, is no dou kakua ni vakayagatakina a omudou lalaga me vaka kina a meca vakayago, no dou is tiko ga a veivuke ni veilomani vakai kemudou. ¹⁴ Ni sa vala ai vunau taucoko ina dua ga ai vakaro: Mo lomani koya a kai omu me vaka ko sa lomani iko. ¹⁵ Ia kevaka dou sa veikaji ka veijilomi vakai kemudou, dou raica vinaka de dou veikabi vakai kemudou. ¹⁶ Ia au sa kaya, dou lako voli ena Yalo Tabu ka dou na sega ni valata kina a gagadre ca ni tovo vakayago. ¹⁷ Ni sa veivala a gagadre ca ni tovo vakayago kei na Yalo Tabu, ka sa veivala a Yalo Tabu kei nai tovo vakayago: a rau sa veimecaki kei rau iei; dou sa sega ni valata kina a veika dou sa vinakata. ¹⁸ Ia kevaka sa liutakini kemudou a Yalo Tabu dou sa qai sega ni lewai I nai vunau. ¹⁹ Ia sa vaka iei a cakacaka ni tovo vakayago, a dauveidrivaji, a daudara, ai valavala sa tawa savasava, a garogaro ca, ²⁰ a dau qaravimatakau, a dauvakadraudrau, a dau veicaji, a dau veiqoji, a daubriburisi, a dauveiba, a veisei vakavuravura, a veisei ni lotu, ²¹ a dauvuvu, a daumateni, a daumarau vakalialia kei na veika sa vaka kina: a veika ka iei au sa kaya vei kemudou, me vaka au sa kaya makawa talega ni na tawa rawata a matanitu ni Kalou ko ira era valata a veika vaka iei. ²² Ia a vua ni Yalo Tabu a loloma, a reki, a vakacegu, a vosota vakadede, a yalomalua, a yalololoma, a vakabauta, ²³ a yalomalumalumu, ai valavala malua: sa sega ai vunau sa burisitakini kina a veika iei. ²⁴ Ko ira era sa wei Karisito Jisu era sa vakota kina kauvelatai ai tovo vakayago kei na kena dodomo ca kei na kena gagadre ca. ²⁵ Kevaka eta sa bula ina Yalo Tabu, meta lako voli talega ina Yalo Tabu. ²⁶ Meta kakua ni saga meta dokai walega, se veiburisitaki, se veivuvutaki.