¹ Ia au sa kaya, e na gauna kece ni ona gone o koya ai taukei, e sega bau saraga a ona duidui mai vua e dua a bobula, e dina ga ni o koya e na taukena a ka kecega. ² Ia sa lewai koya ko ira ai vakavuvuli kei ira me yaco mada a gauna sa lokuca i mada ko tamana. ³ Sa vaka kina koi keta mai mada, nida se gone jiko, sa lewai keta a veivunika sa vakavuravura me vaka eda bobula. ⁴ Ia ni sa yaco jina sara a kena gauna, sa qai tala yani a Luvena a Kalou, o koya sa sucu mai vua a yalewa, sa sucu me lewai koya a vunau. ⁵ Sa valata iei me voli ira kina sa lewai ira a vunau, meda vakabauji kena meda luvena bau. ⁶ Ia ni dou sa qai Luvena, sa tala a Kalou a yalo ni Luvena kina lomada, o koya sa dau kaci, "Apa Tamai kemami." ⁷ O koya oqo, dou sa sega tale ni bobula, a luvena ga, kevaka ko sa luvena ko sa qai taukei i na vuku ni Kalou. ⁸ Ia e na gauna koa, ni dou se sega ni kila a Kalou, dou na dauqaravi ira sa sega ni odra i tovo me Kalou. ⁹ Ia iei ni dau sa kila a Kalou, na jina ga ni sa qai kilai kemudou a Kalou, dou sa qai lesu tale vaka i vei ki na vei vuni ka sa malumalumu ko ka wale, ka dou sa vinakata mo dau qarava tale? ¹⁰ Dou sa vavakatabuya a siga e so, kei na vula eso, kei na gauna e so, kei na yabaki e so. ¹¹ Au rere ena vukumudou de na qai tawa dua a betena a qou cakacaka e na vukumudou. ¹² Oi kemudou a veiwekani, au sa masuji kemudou, mo dou vakataki au, niu sa vakataki kemudou i dou sa sega ni valata vei au e dua a cala. ¹³ Ia dou sa kila, niu a vunautakina i mada vei kemudou ai tukutuku vinaka, sa baca tauvimate a yagoqu. ¹⁴ Ena vuku ni tuvaki ni yagoqu, sa vakatovolei kemudou, dou sa sega ni beci au se vakasisilatakini au; ia dou sa vakacegui au me vaka au sa agilosi ni Kalou; me vakatakini Karisito Jisu. ¹⁵ Sa qai tu i vei a omudou marau i mada? Niu sa vakajinajina vei kemudou, kevaka sa rawarawa dou leuta tani a matamudou ka solia mai vei au. ¹⁶ Au sa qai yaco meu omudou meca niu sa vosatakina vei kemudou a ka jina. ¹⁷ Era sa qai gumatua e na lomani kemudou, e sega bau inai valavala vinaka, io era sa vatawasei kemudou tani mo dau gumatua ina lomani ira. ¹⁸ Ia sa ka vinaka a gumatua jikoga i na cakacaka vinaka me kakua ni vala walega niu sa jiko vata kei kemudou. ¹⁹ Na luvequ lalai, oi kemudou au sa taratara tale kina, me buli mada a Karisito i na lomamudou. ²⁰ Ia au sa via jiko vei kemudou nikua ka me duatani a domoqu: niu sa nuinui ca ina vukumudou ²¹ Dou kaya mai vei au oi kemudou sa via vauci inai vunau, dou sa sega beka ni rogoca ai vunau? ²² Ni sa volai, sa lewe rua a luvei Eparama tagane, e dua sa sucu mai vua a yalewa sa bobula ka dua mai vua a yalewa sa galala. ²³ E dua sa sucu mai vua a yalewa bobula me vaka kina veika vakayago, la kenai I karua sa mai vua a yalewa galala me vaka a yalayala. ²⁴ A veika iei sa kenai balebale; ni sa rua a veiyalayalaji, e dua vei rau mai na ulunivanua ko Saineai, sa vakasucu gone mera bobula, oqoni ko eka. ²⁵ Ia ko eka iei a ulunivanua ko Saineai mai Arapea, a sa tautauvata kei Jeruisalemi ka tu nikua, sa bobula jiko kei ira a luvena. ²⁶ Ia ko Jeruisalemi mai cake sa galala, o koya sa jinada taucoko. ²⁷ Me vaka a volai, "Mo reki, ko iko a yava sa sega ni vakaluveni; Mo tabalakina a kaci, ko ira sa sega ni taratara: Ni sa lewe levu a luvena ko koya sa biu ka lewe lailai vua sa vakawaji." ²⁸ Ia koi keta a veiwekani, eta sa vakatakini Aisake, nita sa gone ni vosa ni yalayala. ²⁹ Ena gauna mai ei o koya sa sucu vakatamata sa vakacacani koya sa sucu vakayalo, a sa vaka kina i mada, a sa vaka talega kina iei. ³⁰ Ia, a cava mada sa kaya ai Vola Tabu? "Vakatala laivi a yalewa bobula kei na luvena, ni rau sa sega ni taukei vata a luve ni yalewa bobula kei na luve ni galala. ³¹ Ni sa vaka iei kemuni a veiwekani, eta sa sega ni luve ni yalewa bobula, ia eta sa luve ni yalewa galala