¹ Oi kemuni nai kai Kalatia, dou sa sesewa, o cei beka sa lawakitakini kemunu, ni sa vakaraitakina oji ina matamunu ko Karisito me vaka ni sa vakoji kina kauvelatai. ² Ka iei duadua ga a meca au taleitakina meu kila mai vei iko: Dou sa rawata a Yalo Tabu ina vuku ni cakacaka ni vunau, se e na omudou rogoca a vakabauta? ³ Dou sa seseva vaka iei me? Ni dou sa tekivu ina Yalo Tabu, dou sa qai jinia beka ina meca vakayago? ⁴ Kemudou sa vosota a meca e levu vaka iei me sega bau a betena, se sega? Kevaka sa jina ga ni sa sega ni yaga. ⁵ O koya sa dausolia a Yalo Tabu vei kemudou kei na cakacaka mana eso ina kemudou maliwa; sa rawata oqo ina cakacaka ni vunau, se ni sa rogoca a vakabauta? ⁶ Me vakatakini Eparama ni sa vakabauta a Kalou, a sa okaji vua mei valavala dodonu. ⁷ O koya mo dou kila, ni o ira era sa muria a vakabauta era sa luvei Eparama. ⁸ Nai Vola Tabu sa raica makawa tu mai ni Kalou e na vakadonui ira a veimatanitutani ina vakabauta, sa vunautakini mada i mada vei Eparama ai tukutuku vinaka ka kaya, ⁹ "Ena vakalougatataki a veivanua kecega e na vukumu. Koya iei era sa vakalougatataki vata kei Eparama nai dauvakabauta, ko ira era sa muria a vakabauta. ¹⁰ Era sa burisitaki ko ira era sa vakararavi ki na cakacaka ni vunau, me vaka sa volai e na burisitaki ko ira yadua era sa sega ni muria jiko ka valata a meca taucoko sa volai ina vola i vunau. ¹¹ Iei sa qai matata ni sega bau a vakadonui ina mata ni Kalou inai vunau, baleta a tamata yalododonu e bula ga ina vuku ni vakabauta. ¹² Ia sa sega ni kani vakabauta a vunau, is ko koya ga sa valata a cakacaka ni vunau me bula kina. ¹³ Sa voli keta ko Karisito mai na veicudruvi ni vunau, ni sa burisitakini ko koya ena vukuda, ni sa volai, "Sa burisitaki ko ira yadua sa rube ina kau." ¹⁴ Me yaco kina a kani veivakalougatataki ka mei Eparama ina vuku i Karisito Jisu me lako mai vei ira a matanitu tani; meta rawata talega kina a Yalo ka yalataki, nita sa vakabauta. ¹⁵ Oi kemudou a veiwakani; au sa vosa vaka tamata ga: Kevaka sa tamata ga sa ia a veiyalayalaji ka sa vakajinajinataki, sa qai sega e dua e vakatawayaga taka se vakaikuritaka. ¹⁶ Oqo a vosa ni yalayala sa vosataki vei Eparama kei ira a ona kawa. Sa sega ni kaya ko koya, "Vei ira a veikawa me vaka ni sa lewe levu a kawa, ia me vaka ni sa duabauga vei koya a omu kawa, o koya a Karisito. ¹⁷ I ei au sa kaya, a veiyalayalaji ka vakaijinajina takina i mada a Kalou,sa sega ni vakatawayagatakina a vunau ni sa yaco ni oji mada e va a drau ka tolusagavulu a yabaki, me sega kina ni mana a vosa ni Kalou. ¹⁸ Io kevaka sa yaco mai ai votavota ina vuku ni vunau, sa qai sega ina vuku ni yalayala: ia a vosa ni yalayala ga ka solia vei Eparama a Kalou. ¹⁹ Sa qai cava ai naki ni vunau? Sa vakaikuritaki baleta a talaidredre, me yacovi ira a kawa i Eparama sa yaco vei ira a vosa ni yalayala, a ra sa kaya a agilosi ina gusu i vi dua a dau tataro. ²⁰ Sa duabauga a Kalou sa sega ni vaka kina ko ira dautaro ²¹ Erau sa qai veisagasaga beka ai vunau kei na vosa ni yalayala ni Kalou? E segai sara. Kevaka sa soli ai vunau me rawa kina a veivakabulai, ai valavala dodonu talega sa rawa ni lako mai ina vuku ni vunau. ²² Ia ai Vola Tabu sa sogolajia a meca kecega sai valavala ca, sa valata iei a Kalou me soli kina a ka sa yalatakina ina vuku ni vakabauji Karisito Jisu vei ira era sa vakabauta. ²³ Ia ni se bera ni yaco mai a vakabauta, eda, vakatawai ka sogolati jiko inai vunau, me yacova ni sa vakatakilai mai a vakabauta. ²⁴ Sa qai yaco kina ai vunau mei vakavuvuli me tuberi keta vei Karisito, meta vakadonui kina ina vuku ni vakabauta. ²⁵ Ia ni sa yaco mai a vakabauta sa qai sega ni veitaliatakini keta jiko ai vakavuvuli. ²⁶ Ni dou sa lewe ni Kalou kei kemudou kecega ni dou sa vakabauji Karisito Jisu. ²⁷ Ni sai Karisito dou sa vakaisulutaki kemudou kina, oi kemudou yadua sa papitaiso vei Karisito. ²⁸ Sa qai sega a Jisu se a kai matanitu tani, sa sega a bobula, se ai taukei, sa sega a tagane, se a yalewa: Ni dou sa daubauga oi kemudou kecega ena vukui Karisito Jisu. ²⁹ Ia kevaka dou sa wei Karisito, dou sa qai kawa i Eparama kei nai taukei me vaka a vosa ni yalayala