¹ Sa oji tale e jini ka va a yabaki au sa qai lako cake tale i Jeruisalemi kei Panapasa ka kauji Taito talega. ² Ia sai vakavuvuli ga kei na raivotu kau sa lako cake kina, ka vunautakina vei ira ai tukutuku vinaka kau a vunautakina vei ira a vei matanitu tani, ia sa vuni ga vei ira era sa rogo,de sega ni yaga a qou kada iei se qou kada i mada. ³ Ia sa sega ni vakasaurarataki me cilivi ko Taito keirau sa jiko vata a kai Kirisi. ⁴ E segai ina vukudra a mata veiwekani era sa lako lo mai mera vakaraica a weta lalaga eta sa rawata nida sa tu vata kei Karisito Jisu, mera vakabobulatakini keta kina. ⁵ Ia keitou sa sega ni talairawarawa e na dua a gauna vei ira me tudei kina vei keitou a jina ni tukutuku vinaka ⁶ Ia ko ira era sa dau rogo nira sa ka levu cake (se ra vaka beka i vei sa ka walega vei au; sa sega ni vinakata vakailoa e dua a tamata a kalou);- Ko ira era sa daurogo, sa sega bau a meca era sa vakaikunitakina vei au. ⁷ Sa tawa vaka kina ia nira sa boka niu sa lesi meu vunautakina ai tukutuku vinaka vei ira era sa tawa cili, me vakai Pita ai apisitolo vei ira era sa cili. ⁸ O koya sa cakacaka i na loma i Pita mei apisitolo vei ira era sa cili, sa cakacaka ina lomaqu talega ina vukudra a veimatanitu tani. ⁹ Ia ko iratou ko Jemesa kei Kifa kei Joni eratou sa daurogo ni ratou sa duri, ni ratou sa kila a loloma ka soli vei au, eratou sa vakabauji au kei Panapasa e na veitauri liga i matau ni keitou sa duavata, ka me keirau lako vei ira era sa sega ni lotu, ia ko iratou vei ira era sa cili. ¹⁰ Ni sa lomadra iei me keitou nanumi ira a dravudravua, a ka talega i ei kau sa gumatua kina. ¹¹ Ia ni sa lako mai ki Anitioki ko Kifa, au sa voraji koya ina matana votu ni sa dodnu me vunauci. ¹² Ia ko Kifa sa dau kana vata kei ira a matanitu tani ni se bera nira yaco mai ko ira e so mai vei Jemesa: Ni ra sa yaco mai, sa lako tani ko koya, ni sa rere vakini ira era sa cili. ¹³ Ko ira talega a Jiu, era sa vo,era as ia vatakaya a veivakaisini a sa kauvakatani talega ko Panapasa ina odra veivakaisini. ¹⁴ Ia niu sa raica a odra i valavala nira sa sega ni muria jiko a jina ni tukutuku vinaka; au sa kaya vei Kifa e na matadra kecega, "Kevaka ko sai valavala jiko vakatakini ira sa matanitu tani, ni ko sa Jiu, ka sega ni vakatakini ira a Jiu, a cava ko sa vakasauraratakini ira kina era sa matanitu tani, mera i valavala me vakatakini ira a Jiu?" ¹⁵ Oi keta eta sa Jiu nita sucu mai, ka sega ni matanitu tani I valavala ca. ¹⁶ Ia nita sa kila ni sa sega bau a tamata me vakadonui ina vuku ni cakacaka ni vunau, ena vuku ga ni vakabauji Jisu Karisito, eta sa vakabauji Karisito Jisu koi kete meta vakadonui kina nita sa vakabauji Karisito, ka sega ga ina cakacaka I vunau; no sa sega tamata ni vakadonui ina vuku ni cakacaka I vunau. ¹⁷ Ia kevaka eta sa vakasaqara jiko meta vakadonui vei Karisito ka raici nita sai valavala ca, sa qai vu beka ni valavala ca a Karisito? E sega bau sara! ¹⁸ Ia kevaka kau sa tara cake tale a ka kau sa basurakina sobu, au sa kai au kina niu sa tamata ca. ¹⁹ Ni sa koya a vunau au sa mate kina ki na vunau meu bula kina vua a Kalou. ²⁰ Keirau sa vakoji vata kei Karisito kina Kauveilatai, ia sa sega ni koi au jina sa bula jiko, a Karisito ga sa bula ina lomaqu, ia a qou bula vakayaqo ka iei, au sa bula jiko kina niu sa vakabauta a Luve ni Kalou, koi koya ka lomani au, ka soli koya ina vukuqu. ²¹ Au sa qai sega ni vakatawayagatakina a loloma ni Kalou; ni sa qai sega ni yaga a mate i Karisito; kevaka sa rawa a veivakadonui inai vunau.