¹ Ia mo kila i ei ni na yaco mai a veika dredre e mai vakataojioji ni gauna i ei. ² Ko ira a tamata era sa lomani era ga a tamata, era sa daulomana a i lavo era sa daubale, era sa viavialevu, era na vosa vakacaca, era na talaidredre keivei ira a odra qase, era sa sega ni vakavinavinaka, era sa sega ni yalosavasava. ³ Era sa caca a veiwekani, era sa dau yaloyoto ka dai tale, era na dau veibeitaki vakailasu, era na sega ni rawa na yalodra, era na dau buriburisi, era sa dau caji ira a tamata vinaka. ⁴ Era na dauveisoliyaki me mate, era sa qoqo sodrosodro, era na yalolevu, era na lomana vakalevu a marau, ara na lomana vakalailai a Kalou. ⁵ Sa odra ga a lotu vakarairai, ka sega bau vei ira a meca jina, ia mo lako tani mai vei ira sa vaka i ei. ⁶ Sa jiko kei ira e so era sa cuni vakailawaki kina veivale eso, ara sa daurawai ira a yalewa sesewa sa sipa tu vei ira a i valavala ca, era sa kau vakatani e na gagadre ca e levu. ⁷ Era sa dauvatavulici jiko ka sega ni ra rawata mera kila sara a jina. ⁸ Ia sa vakatakini Jani kei Jabri. Koi rau i ei rau sa qaji Mosese, a ra sa qajia vaka kina a meca jina: a tamata lomaduka ka sega ni vinakaji a odra vakabauta. ⁹ Ia era sa sega ni tubucake me levu, sa vakavotui vei ira a tamata kecega a odra lialia, me vakatakina a odrai qori. ¹⁰ Ia ko iko, ka sa daumuria a qou i vakavuvuli, a qou i valavala, a qou i naki, a qou vakabauta, a qou vosota vakadede, a qou loloma, a qou vosota a ca. ¹¹ A veivakacacani, a veivakararawataki; a meca sa yaco vei au mai. Anitioki, mai Ikoniona mai Lasitira; a kalevu ni veivakacacani kau a vosota; ia ka sa vakabulai au a Turaga mai na meca taucoko i ei. ¹² Ia ko ira taucoko era via lotu vei Karisito era na vakacacani. ¹³ Ia ko ira a tamata a kei ira a dauvetemaki, era na tubu cake mera ca sara, ni ra sa dauvalata a veivakacalai, ka ra sa vakacalai talega ko ira. ¹⁴ Ia ko iko mo tudei ena meca ko sa vakatavulici kina ka vakabauta, ni ka sa kila ko cei sa vakatavulici vei iko. ¹⁵ Ni ko sa kila ai Vola Tabu ni ko se gone, I qori sa vakavukui iko rawa mo bula ni ko sa vakabauji Karisito Jisu. ¹⁶ Sai koya a Kalou sa vakavuna nai Vola Tabu kecega, a sa yaga i ei mei vakavuvuli, me vunauca a ca, me ia kina a vakatavuvuli e na ka e dodonu. ¹⁷ Me yaco kina a tamata ni Kalou me vakarau tu ni sa vakarautaki ki na i valavala dodonu kecega.