¹ Ko koya i ei a luvequ mo vakaukauwatakini iko ina loloma sa tu vei Karisito Jisu. ² Ia a meca ko a rogoca mai vei au ena odra maliwa a lewe levu ai vakajinajina, mo solia vei ira a tamata yalo jina era sa rawata mera vakavulici ira a tani. ³ Mo vosota a vei meca dredre vata kei au me vaka a sotia vinaka i Karisito Jisu. ⁴ Sa sega bau a sotia sa lako ki nai valu me vakaogai koya tale ina cakacaka ni bula i ei; me vinaka kina vua sa jigitakini koya me sotia. ⁵ Ia ko koya sa gumatua ina veiqito, sa tawa vakaisalataki vakaturaga kevaka sa tawa valata me vaka a kena i valavala. ⁶ Ai vakatawa ni were sa cakacaka, me sa kania mada i mada a mana. ⁷ Vakananuma na ka au kaya jiko, ni Turaga ena solia vei iko na kila ko ena vuku ni meca taucoko. ⁸ Vakananumi Jisu Karisito na kawa i Tevita, ko koya sa vakaturi cake mai na mate me vaka a qou i tukutuku vinaka. ⁹ Ko koya i ei au sa vosota kina a ca, me vaka a tamata caka ca, ia kau sa vesuki kina, ia a Vosa ni Kalou sa tawa vesuki. ¹⁰ O koya i ei au sa vosota kima a meca taucoko ina vukudra era sa digitaki, mera rawata talega a bula sa yaco ena vuku i Karisito Jisu, kei a veivakalougatataki sa tawa mudu. ¹¹ Sa jina sara a vosa, kevaka eta sa mate vata kaya, eda na bula vata talega. ¹² Kevaka eta sa vosota a ca, eta na lewa vata kaya: kevaka eta na cakitakini Koya, ena cakitakini keta talega ko Koya. ¹³ Kevaka eta sa sega ni yalojina, sa yalojina jikoga ko Koya. ¹⁴ Mo vakananumi ira ina veimeca i ei, ia mo vakaroji matua ina mata ni Turaga me ra kakua ni veibatakina a vosa, a meca sa tawa yaga ka sa vakacalai ira era sa rogoca. ¹⁵ Gumatua sara mo vakaraitakini iko mo vinaka ina mata ni Kalou, a tamata dau cakacaka sa sega bau a meca me madua kina, mo wasea vakadodonu ai vakavuvuli jina. ¹⁶ Mo dou lako tani mai na talanoa e sega a betena, baleta ni na liutakini kemudou ga ki na i valavala tawasavasava e levu sara. ¹⁷ Ia a odra vosa ena kakana jiko me vaka a vijikoso ca: sa vakakina ko Imeneo kei Filito. ¹⁸ Koi rau sa lako tani mai na jina, ni rau kaya ni tucake tale mai na mate e sa yaco oji ka sa vakarusa a odra vakabauta e so. ¹⁹ Ia a yavu dei ni Kalou sa tu ga, sa vaka i ei a meca sa volai kina; Na Turaga sa kilai ira era sa ona; Ko ira yadua era sa kaya a yaco mai ni Turaga mera lako tani mai na veika sa tawa savasava. ²⁰ Ena loma ni vale levu, sa sega ni jiko walega kina a bilo koula kei na bilo siliva, ia sa jiko talega kinaa bilo kau kei na bilo qele, e so e talei ka so e sega ni talei. ²¹ Ena vuku ni ka i ei, kevaka dua e sa vakasavasavatakini koya mai na meca ka i ei, ena yaco me bilo talei, tawasei tani me yaga vua a Turaga ka vakarautaki kina i cakacaka vinaka kecega. ²² Ia mo dro tani mai na gagadre ca vakacauravou ka muria yalododonu, a vakabauta, a loloma kei na veivinakaji kei ira a tamata kece sara era masuta a Turaga i na yalosavasava. ²³ Mo tarovi iko mai na vosa vakalialia ka sa dau vakavuna a veileji ²⁴ E tabu ni veileji a i talatala, ia me yalovinaka vei ira a tamata kece sara, me dau vakatavuvuli ka dauvosota. ²⁵ Me vakatavulici ira era sa dauveivoraji ena yalomalumalumu, de solia beka vei ira a Kalou a veivutuni mera kila kina a ka jina. ²⁶ Ka mera yaco mera bula tale mai nai cori ni tevoro, ni sa vakabobulatakini ira ko me vaka a ona lewa.