¹ Ni sa kaya vakamatata a Yalo Tabu ni ra na vuki tani eso mai na vakabauta ena gauna i muri i ei ni ra vakarogoca e so a yalo dau veivakacalai kei na odra i vakavuvuli a tevoro. ² Ena odra dauveivakaisini era sa vosa dai, sa tomani a odra lewa e loma me vaka i na kakaumea katakata. ³ Era sa dau tarova a vakawaji, ara sa vakatabuya a kakana eso, sa valata a Kalou mera kania ka vakaviavinakatakina ko ira sa vakabauta ka kila ai vakavuvuli jina. ⁴ Ni sa vinaka a meca taucoko sa valata a Kalou, sa sega bau a meca me beci; kevaka e da sa vakavinavinaka nita kania. ⁵ Ni sa vakasarasarataki ena vosa ni Kalou kei na masu. ⁶ Kevaka ko sa vakananumi ira a veiwekani i na veika i ei ko sa qai talatala vinaka i Jisu Karisito, sa vakatuburi cake i na vakabauta. ⁷ Mo biuta laivi ai tukuni vakavuravura kei na vosa lialia ni yalewa qase, ia mo dau vakaogai ga ena lotu. ⁸ Ni sa yaga vakalailai ga a ogaoga ni veika vakayago, ia a lotu sa yaga i na meca taucoko, ni sa yalotakini kina a ka ni bula i ei, kei na ka ni bula talega sa bera mai. ⁹ Sa jina a vosa, a sa yaga me vakabauji vakalevu. ¹⁰ Ena vuku ni ka i ei, keitou sa vakalialai kina, ka daucakacaka, ni keitou sa vakararavi kina Kalou bula, ai vakabula ni tamata taucoko, a odra jina era sa vakabauta. ¹¹ Mo vakarota ka vakatavuvulitakina a veika i ei. ¹² Me kakua ni dua e beci iko ni ko se cauravou jiko, ia mo yaco mo i vakarau vei ira era sa lotu, ina vosa, i valavala, ina loloma, ina vakabauta, kei na yalosavasava. ¹³ Me yacova a qou lako tale yani, mo gumatua ena dau wili vola, e na dauveivakaroji, ina veivakatavulici. ¹⁴ Mo kakua ni weletakina ai solisoli sa tu vei iko, o koya sa soli vei iko ina parofisai, kei na veitabaki ni ligadra ai talatala qase. ¹⁵ Mo vulica a veika i ei, mo dau vakananuma a veika i ei, me rairai kina i matadra a tamata ni ko sa vuku cake mai na meca taucoko. ¹⁶ Mo vakaraici iko vakavinaka, kei na vakavuvuli; ni o valata jikoga a vei meca i ei, ena vakabulai iko, kei ira talega era sa rogoci iko